Morgunblaðið - 29.01.2005, Qupperneq 22

22 LAUGARDAGUR 29. JANÚAR 2005 MORGUNBLAÐIÐ
MINNSTAÐUR
HÖFUÐBORGARSVÆÐIÐ
ÁRBORGARSVÆÐIÐ
Selfoss | „Ég vil gjarnan láta þann draum rætast að
geta verið með vinnustofu þar sem fleiri konur væru að
vinna og hver um sig gæti unnið fyrir sig og kannski að
einhverju leyti saman,“ segir Edda Björk Magn-
úsdóttir, sauma- og listakona á Selfossi, sem starfrækir
Listasmiðjuna Rísl að Eyravegi 27 á Selfossi.
Edda segist alltaf hafa verið mikið fyrir handavinnu
og í skóla hafi hún alltaf verið prjónandi. Hún fór í
handavinnu- og fatahönnunarskóla í Hellerup í Dan-
mörku og segir það hafa gefið sér mikið. Edda Björk er
ein fjölmargra kvenna sem vinna að því að koma á fót
eigin fyrirtæki og skapa sér þannig starfsvettvang til
að fella að aðstæðum sínum og áhugamálum en það er
krefjandi að koma á fót eigin starfsemi.
„Ég er búin að sauma heima í 13 ár fyrir Fatabúðina
í Reykjavík, einkum sængurfatnað og sé núna um allar
sérpantanir fyrir búðina. Það eru næg verkefni í kring-
um þetta en ég vil gera meira,“ segir Edda sem var bú-
in að hugsa mikið um og fást við saumaskap úr flís-
efnum.
Eftir nokkurt hlé við annan saumaskap en sæng-
urfatnaðinn, tók Edda upp þráðinn með flísið og stofn-
aði Listasmiðjuna Rísl á Selfossi. Í þeirri smiðju saum-
ar hún af krafti alls kyns flísfatnað fyrir börn og
fullorðna. Einnig saumar hún vöggusett með ísaumi
eftir óskum fólks og til þess notar hún nýja og full-
komna saumavél með tölvustýringu. Þá málar hún líka
á vöggusettin og segir það einnig vinsælt.
Vinnur með bindi frá
þjóðþekktum mönnum
Flíssaumið er mest húfur af ýmsum gerðum sem hún
merkir að vild kaupenda. Svo tekur hún að sér alls kon-
ar hefðbundin verkefni saumakvenna s.s. að stytta bux-
ur og lagfæra eitt og annað eins og gengur. Auk þess
fæst hún við að sauma ýmsa muni svo sem flösku-
skreytingar, töskur, lampaskerma og ljósaseríur þar
sem hún notar karlmannabindi.
„Sjáðu,“ segir hún og sýnir fullan kassa með bindum
frá þekktum mönnum eins og Árna Johnsen og Geir
Haarde fjármálaráðherra. „Það er gaman að vinna með
bindin og ýmislegt hægt að gera,“ segir Edda Björk.
„Mér finnst saumaskapurinn skapandi starf sem veit-
ir sköpunarþörfinni innra með manni mikla útrás. Ég
verð einhvern veginn alltaf að vera að búa til eitthvað
nýtt og helst það sem aðrir eru ekki að gera. Ég get alls
ekki setið við saumavélina og saumað eitthvað í miklu
magni eins og í verksmiðju. Ég verð fljótt leið á því að
gera marga hluti eins og þess vegna eru vörurnar mínar
hver með sínu móti. Listakonan í mér bannar mér að
gera lengi það sama,“ segir Edda Björk Magnúsdóttir,
sauma- og listakona á Selfossi, sem tekur glöð á móti
gestum inn á vinnustofuna sína.
Morgunblaðið/Sigurður Jónsson
Flaska með bindi Saumaskapurinn er starf sem veitir
sköpunarþörfinni útrás, segir Edda Björk.
Skapar sér starfsvettvang sem fellur að áhuganum á
handavinnu og saumaskap og stofnar fyrirtæki
Ég verð alltaf
að vera að búa
til eitthvað nýtt
Eyrarbakki | Stofnað hefur verið fé-
lag um endurbyggingu Miklagarðs á
Eyrarbakka og heitir það Búðarstíg-
ur 4 ehf. Félagið var stofnað hinn 21.
janúar sl.
Kynningarfundur um félagið og
fyrirætlanir þess var haldinn
fimmtudaginn 27. jan. í borðsal
Hússins. Þar var einnig til kynning-
ar aukning hlutafjár hins nýja fé-
lags.
Tilgangur félagsins er að ráðast í
endurbætur húss sem nefnist Mikli-
garður, Búðarstíg 4 á Eyrarbakka,
og annast síðan útleigu þess til fyr-
irtækja og einstaklinga, sem áhuga
hafi á að vera með rekstur í húsinu.
Upphaflega var hús þetta reist
sem verslunarhús upp úr lokum fyrri
heimsstyrjaldarinnar, en sú verslun
fékk dapurlegan endi. Þar var líka
haldin fyrsta heimilisiðnaðarsýning
á Suðurlandi skömmu fyrir 1930.
Um langt árabil var í húsinu neta-
gerð á vegum Hampiðjunnar hf. og
síðan á sjötta og sjöunda tug síðast-
liðinnar aldar var þar til húsa Plast-
iðjan hf. sem framleiddi húsaein-
angrun og einangrun hitaveituröra.
Sú verksmiðja var í raun brautryðj-
andi á þessu sviði hér á landi.
Mikligarður hefur verið umhirðu-
lítill og ónotaður í nokkur ár. Eig-
andi hans var síðast Sveitarfélagið
Árborg, sem hefur nú selt húsið hinu
nýstofnaða félagi. Þarna verða
nokkrir misstórir veitingasalir og
hægt verður að taka á móti allstór-
um hópi gesta. Í fyrirhuguðum sal á
efstu hæð hússins er gott útsýni til
hafsins. Veitingastofan Rauða húsið
mun flytja starfsemi sína í þessi nýju
húsakynni þegar þau verða tilbúin.
Áðurnefndur kynningarfundur
var mjög vel sóttur og reyndar mun
betur en fundarboðendur bjuggust
við og lýstu fundargestir ánægju
sinni og miklum áhuga á framtakinu.
Formaður stjórnar hins nýstofnaða
félags er Ari Björn Thorarensen.
Morgunblaðið/Óskar Magnússon
Mikill áhugi Fleiri gestir sóttu fundinn um endurbyggingu Miklagarðs á
Eyrarbakka heldur en fundarboðendur höfðu reiknað með.
Endurreisn
Miklagarðs
Kópavogur | Fjöldi fólks lagði leið
sína í nýja Nautilus-líkamsrækt-
arstöð í húsakynnum Salalaugar um
síðustu helgi, en þá var stöðin form-
lega tekin í notkun. Greinilegt er að
íbúar í Salahverfi voru farnir að
bíða eftir því að fá líkamsrækt-
arstöð í hverfið, og hafa á annað
þúsund árskort selst á þeirri viku
sem stöðin hefur verið opin.
Stöðin er búin nýjum tækjum og
þegar Morgunblaðið leit í heimsókn
á dögunum var greinileg ánægja
með aðstöðuna hjá viðskiptavinum
sem hömuðust og svitnuðu á hlaupa-
brettum, þrekhjólum, stigavélum og
öðrum heilsuræktartækjum.
Kjartan Már Hallkelsson er
rekstrarstjóri þeirra þriggja Naut-
ilus-líkamsræktarstöðva sem rekn-
ar eru hér á landi, en líkamsrækt-
arkeðjan er upphaflega sænsk og
eru allar stöðvarnar í eigu sænska
fyrirtækisins, og eru reknar stöðvar
á öllum Norðurlöndunum, í Bret-
landi, Sviss og Póllandi.
Allar stöðvarnar eiga það sam-
eiginlegt að vera reknar í samvinnu
við rekstraraðila sundstaða, og
gilda líkamsræktarkortin einnig í
sundlaugarnar. „Ég held að flestir,
sem nýta sér þetta samspil, fari í
sund eftir líkamsrækt, eða fari bara
í sund til þess að breyta til,“ segir
Kjartan. Það er framtíðarsýn fyr-
irtækisins að tengja saman mismun-
andi tegundir líkamsræktar með
þessum hætti, og segir Kjartan það
klárt mál í sínum huga að það styrki
mjög stöðvarnar.
Líkamsræktarstöðin er í nýju
húsnæði Salalaugar í Salahverfi í
Kópavogi, en laugin sjálf er reyndar
ekki tilbúin ennþá. Kjartan segir
það verk vissulega á eftir áætlun, en
reiknað sé með því að hún verði tek-
in í notkun í apríl eða maí. Þangað
til geti gestir aðeins farið í líkams-
rækt í Salahverfinu, en þeir geti
nýtt kort sín í Sundlaug Kópavogs
til að komast í sund.
Í beinu sambandi
við viðskiptavinina
Nautilus-stöðvarnar eru nú orðn-
ar þrjár, sú fyrsta var opnuð í Suð-
urbæjarlaug í Hafnarfirði, önnur er
í Sundlaug Kópavogs og nú er sú
þriðja opnuð í Salalaug. Kjartan
segir reksturinn ganga vonum
framar. „Það hefur gengið mjög vel
hingað til. Kópavogsbær væri ekki
að taka okkur inn í nýtt mannvirki
nema af því að samstarfið hefur
gengið framar vonum, og það er
það sama í Hafnarfirði. Alls staðar
hefur aðsóknin verið umfram vænt-
ingar svo að bæjarfélögin eru að fá
mikið út úr þessu. Fólkið er ánægt
með að fá góða þjónustu, topptæki
og leiðsögn, auk þess sem verðið er
langt fyrir neðan það sem gengur
og gerist.“
Auk þess að sjá um rekstur á
stöðvunum er Kjartan einnig einn af
þjálfurunum. „Mér finnst það alveg
nauðsynlegt, þá er maður í beinu
sambandi við viðskiptavininn,
skynjar hver þörfin er, hvernig and-
inn er og annað. Ég held ég myndi
ekki vilja sleppa því. Svo er maður
líka að þrífa og er innan um fólkið
allan tímann í öllu, og mér finnst
það bara hið besta mál. Ég er
íþróttakennari að mennt svo mér
finnst gott að vera með þjálfunina í
bland við reksturinn.“
Framtíðarsýnin samspil sundlauga og líkamsræktarstöðva
Morgunblaðið/Jim Smart
Tekið á lóðunum Á annað þúsund korta hefur selst í nýju stöðinni. Kjartan
(t.v.) sýnir Gunnari Þórissyni og Sigtryggi Benediktssyni réttu handtökin.
Mikill áhugi
á líkams-
rækt í
Salahverfi
Reykjavík | Borgarfulltrúar Sjálf-
stæðisflokks hafa fengið svar við
fyrirspurn varðandi ráðningu fram-
kvæmdastjóra þjónustumiðstöðva
borgarinnar. Óskað var eftir upp-
lýsingum og greinargerðum um
umsækjendur sem sóttu um starf
forstöðumanna þjónustumiðstöðva
og teknir voru í viðtal, hvers vegna
öðrum umsóknum frá forstöðu-
mönnum borgarhlutaskrifstofu Fé-
lagsþjónustunnar um störfin var
hafnað og hvort viðkomandi aðilum
hefði verið boðið annað starf. Þá
var spurt hvort launakjör forstöðu-
manna þjónustumiðstöðva yrðu
sömu og laun sviðsstjóra borgar-
innar.
Í svari frá þróunar- og fjöl-
skyldusviði Reykjavíkurborgar
segir að tillaga borgarstjóra um að
ráða Aðalbjörgu Traustadóttur,
Hafdísi Gísladóttur, Óskar Dýr-
mund Ólafsson og Ragnar Þorleifs-
son í störf framkvæmdastjóra
þjónustumiðstöðva hafi byggst á
mati starfshóps um að hlutaðeig-
andi umsækjendur væru hæfastir í
störfin og að matið hefði byggt á
þeim kröfum sem skilgreindar voru
í auglýsingu um störfin. Fram
kemur að greinargerð með rök-
stuðningi hafi aðeins verið tekin
saman um þá umsækjendur sem
talið var að uppfylltu best hæfni-
kröfur.
Um umsóknir forstöðumanna
borgarhlutaskrifstofa Félagsþjón-
ustunnar segir að þær hafi verið
metnar á sama hátt og umsóknir
frá öðrum aðilum. Fram kemur að
hluti af verkefnum nýrra þjónustu-
miðstöðva sé sambærilegur verk-
efnum borgarhlutaskrifstofu en að
auki sjái þjónustumiðstöðvarnar
um fjölmörg verkefni til viðbótar.
„Má þar nefna yfirumsjón með fé-
lags- og þjónustumiðstöðvum,
þjónustuíbúðum, dagdeildum, ung-
lingasmiðjum og frístundaheimil-
um.“ Þar fyrir utan sjái þjónustu-
miðstöðvar um ýmis önnur
verkefni, m.a. sálfræðiþjónustu og
ráðgjöf. Um 900 manns heyra und-
ir þjónustumiðstöðvarnar, í tæp-
lega 600 stöðugildum.
Einn af þremur ráðinn
„Af ofantöldum ástæðum var
ekki talið rétt að veita forstöðu-
mönnum borgarhlutaskrifstofa Fé-
lagsþjónustunnar forgang umfram
aðra umsækjendur,“ segir í svar-
bréfinu. Einn þriggja forstöðu-
manna hafi engu að síður verið
ráðinn framkvæmdastjóri þjón-
ustumiðstöðvar Laugardals-Háa-
leitis, enda í hópi þeirra sem hvað
best uppfylltu hæfnisskilyrði.
Fram kemur að laun framkvæmda-
stjóra þjónustumiðstöðva eru lægri
en laun sviðsstjóra borgarinnar.
Svar borgarinnar við fyrirspurn um
ráðningar við þjónustumiðstöðvar
Ekki talið rétt að
veita forstöðu-
mönnum forgang