Morgunblaðið - 10.11.2007, Blaðsíða 31

vaxtarsprotar
MORGUNBLAÐIÐ LAUGARDAGUR 10. NÓVEMBER 2007 31
Það næsta hjá okkur er að fylgja opn-uninni eftir með frekari kynningu ásalnum og finna flöt fyrir þá mögu-leika sem eru fyrir hendi. Við höf-
um fengið góð viðbrögð hjá fólki sem kemur
hér og tekur síðan með sér fólk í næstu
heimsókn,“ sögðu hjónin Ólafur Sigur-
jónsson og Bergþóra Guðbergsdóttir sem nú
í ágúst opnuðu sýningarsal í Forsæti í Flóa-
hreppi.
Það var 19. ágúst síðastliðinn sem að þau
opnuðu formlega sýningarsal í uppgerðu
húsnæði á hlaðinu í Forsæti. Salurinn heitir
Tré og list, lifandi listasmiðja og í salnum er
til sýnis kjarninn úr verkstæði Sigurjóns
Kristjánssonar, föður Ólafs, sem var mikill
völundur, hagur á tré og járn. Þarna eru
verkfæri, merkur smíðisgripur, þriggja
þráða spunavél og svo mótor sem knúði vél-
ar á verkstæðinu.
„Þetta er minn grunnur, en í þessu um-
hverfi byrjaði ég að standa við smíðar,“
sagði Ólafur sem er trésmíðameistari og
þekktur hagleiksmaður fyrir handverk sitt
og smíðisgripi ásamt því að vera tónlistar-
maður og kórstjórnandi. Í næsta húsi er
smíðastofa hans þar sem m.a. er heil flugvél
í smíðum.
Að húsið hæfði verkefninu
Þau hjónin hönnuðu sjálf umgjörð sýning-
arsalarins og gáfu því góðan tíma, en sal-
urinn er í húsi þar sem var áður fjós og síð-
ar kartöflugeymsla. Bergþóra fékk síðan þá
hugmynd að nýta húsið til annarra hluta og
gerðu þau þá hugmyndina um sýningarsal-
inn að veruleika. „Við töluðum mikið um
þetta og veltum því vel fyrir okkur hvaða
form við hefðum á þessu. Okkur fannst mik-
ilvægt að húsið hæfði verkefninu,“ sagði
Bergþóra en húsið er viðarklætt að innan,
með steinlögðu gólfi og góðri lýsingu þannig
að listmunirnir njóta sín vel. „Það var mjög
gaman að geta gert hugmyndirnar að veru-
leika og finna ánægjuna af því þegar þetta
var að verða til,“ sagði Bergþóra.
Ólafur sá að sjálfsögðu um smíðina við
innréttingu salarins og Bergþóra segist hafa
unnið með honum sem handlangari. Þá
komu synir þeirra að verkinu og réttu hjálp-
arhönd, enda heilmikið verk að breyta fyrr-
verandi fjósi og kartöflugeymslu í glæsilegan
listsýningarsal.
Þegar komið er inn í salinn blasa við list-
munir í glerkössum. Um er að ræða smíð-
isgripi, könnur og fleira, sem Ólafur hefur
rennt og svo útskorna trélistmuni eftir
Siggu á Grund. Þau eru bæði sprottin upp
úr frjósömum jarðvegi handverksmanna í
fyrrum Villingaholtshreppi en feður þeirra
áttu gott samstarf við smíðar og handverks-
vinnu. Á veggjunum eru ljósmyndir eftir
Ólaf, en þau hjónin ætla að bjóða listamönn-
um að sýna myndir sínar í salnum ásamt því
að gefa tónlistarmönnum kost á því að vera
með tónleika þar. Svo hafa Ólafur og Sigga
á Grund hugleitt þann möguleika að halda
námskeið í listsmíði og útskurði.
Tónlistin víkur fyrir smíðinni
„Grunnhugmyndin hjá okkur er að Berg-
þóra verði safnstjóri í kringum þessa starf-
semi okkar,“ sagði Ólafur. „Já, og við ætlum
okkur að skapa möguleika til þess að Ólafur
geti stundað listsmíði sína í meira mæli. Við
munum leggja áherslu á þetta ásamt Siggu á
Grund. Sýningargripir þeirra verða hérna og
hægt að nálgast listmuni eftir þau, sem
verða til sölu þegar fram líða stundir,“ sagði
Bergþóra.
„Minn draumur er að hafa heilsu og getu
til að smíða sem mest af listmunum. Ég er
með margar hugmyndir sem banka fast á
dyrnar og vilja verða til og hef auk þess ver-
ið beðinn um fjölda verkefna. Ég hef sinnt
tónlistinni hingað til, við kórstjórn og fleira,
en nú mun þetta listform taka við þó auðvit-
að verði tónlistin á sínum stað til afþrey-
ingar. Svo er það líka draumur okkar að við
getum starfað við þetta bæði tvö,“ sagði
Ólafur en hann smíðar listmuni af ýmsu tagi.
Nefna má skírnarfontinn í kirkjunni á Haga
á Barðaströnd sem Ólafur smíðaði í sam-
starfi við Siggu á Grund sem skar hann út.
„Við vonum að við getum höfðað vel til
fólks með þeirri sérstöðu sem við byggjum
upp hérna. Það er vaxandi umferð með
ströndinni og um þetta svæði og með betri
vegi mun hún aukast enn frekar,“ sögðu
hjónin Ólafur Sigurjónsson listasmiður og
Bergþóra Guðbergsdóttir kona hans í For-
sæti í Flóahreppi.
Fjósi og kartöflugeymslu
breytt í listsýningarsal
Morgunblaðið / Sigurður Jónsson.
Í Forsæti Bergþóra Guðbergsdóttir og Ólafur Sigurjónsson í nýja sýningarsalnum í Forsæti.
Í Forsæti í Flóahreppi hefur gamla fjósið fengið nýtt og virðulegra hlutverk. Sigurður Jónsson
hitti á bænum húsráðendur sem sáu sjálf um hönnun sýningarýmisins.
Vaxtarsprotar nefnist verkefni sem snýst um
atvinnusköpun í sveitum og hefur fjölmennur
hópur fólks á Suðurlandi og í Húnaflóa tekið
þátt í því.