Menntamál - 01.10.1952, Page 31

MENNTAMÁL
101
skóla, lauk prófi þaðan 1899, og síðar í kennaraskólanum
í Johnstrup á Sjálandi og lauk þar kennaraprófi 1908.
Ennfremur dvaldist hann sumarlangt við nám í Kennara-
háskólanum í Kaupmannahöfn. Má af þessu marka, að
hann hefur lagt óvenjumikla stund á að búa sig vel undir
ævistarf sitt, og munu ekki margir barnakennarar á land-
inu hafa verið svo vel undir starf sitt búnir á þeim tíma.
Jón mun hafa haft betri not af kennaranámi sínu af
þeim sökum, að hann hafði reynslu af starfinu, áður en
hann settist í kennaraskóla. Farkennslu hafði hann stund-
að á árunum 1899—1905. Þegar heim kom 1908, gerðist
hann skólastjóri barnaskólans á Sauðárkróki. Því starfi
gegndi hann til loka síðasta skólaárs.
Mörgu fleira en kennslustörfum og skólastjórn hefur
Jón sinnt. Hann átti sæti í hreppsnefnd Sauðárkróks 24
ár og var oddviti hennar 21 ár. Málefni kirkju og kristins
dóms hafa honum verið hjartfólgin, og enn fremur hefur
hann unnið ósleitlega að áhugamálum góðtemplara.
Jón er tvíkvæntur. Fyrri konu sína Geirlaugu Jó-
hannesdóttur gekk hann að eiga 1912. Varð þeim 10 barna
auðið, sem nú eru öll uppkomin. Hann missti konu sína
1932, meðan sum barnanna voru enn í bernsku og eitt
nýfætt. Árið 1940 kvæntist hann Rósu Stefánsdóttur
matreiðslukennara. Hafa þau alið upp fósturdóttur.
Á. H.