Kirkjuritið - 01.02.1959, Blaðsíða 9

KIRKJURITIÐ
55
um svo nefnt ferðaprestsstarf. Fóru þá prestar í heim-
sóknir til ýmissa staða á landinu, einn eða tveir saman
— eða prestur og leikmaður — og voru þá fluttar guðs-
þjónustur í kirkjum og erindi — framhaldsskólar heim-
sóttir o. s. frv. Þótti þessi starfsemi gagnleg, og var að
góðu getið. Á seinustu árum hefir þetta starf farið þverr-
andi. Annar þáttur í starfi Prestafélags Islands hefir hins
vegar mjög aukizt seinustu árin, en það er þátttaka í sam-
starfi Prestafélaga Norðurlanda. Árið 1956 var sameigin-
legur prestafundur Norðurlanda haldinn hér í Reykjavík,
og stóð það að nokkru í sambandi við Skálholtshátíðina,
þó að fundurinn væri ekki samtímis henni. Var þetta stór-
viðburður í kirkjulífi voru og merk tímamót. Svo heppi-
lega vildi til, að veður var hið fegursta alla fundardagana
og fundurinn einstaklega ánægjulegur. Létu erlendir þátt-
takendur hið bezta yfir fundinum og móttökum öllum í
þeim fjölda blaðagreina, er þeir skrifuðu eftir heimkom-
una. Þess má geta, að bæði ríkisstjórn og Reykjavíkurbær
studdu Prestafélagið rausnarlega, til þess að fundurinn
mætti sem bezt takast og verða oss til sóma, sem og varð.
Ekki verður svo skilið við 40 ára sögu Prestafélags Is-
lands, að ekki sé getið nokkurra þeirra manna, sem mest
og bezt hafa unnið í þjónustu þess. Ég gat áðan um starf
Sigurðar P. Sívertsens prófessors, síðar vígslubiskups, sem
af lifandi áhuga starfaði fyrir félagið, meðan heilsa ent-
ist, og með einlægri þrá eftir því að vinna kirkju þessa
lands til heilla það, er hann mátti. Hann lézt 9. febr. 1938.
Við starfi hans tók, bæði við formennsku og ritstjórn,
Ásmundur Guðmundsson prófessor, nú biskup, og má um
hið merka starf hans segja það sama og fyrirrennara hans.
Magnús Jónsson prófessor var í fjölmörg ár í stjórn, um
tíma formaður í fyrstu, og lengi ritari. — Hann var í
tnörg ár meðritstjóri Kirkjuritsins. Eru landskunn giftu-
rík störf hans að hverju því, sem hann tók að sér. Ég
minnist einnig hér margra ára starfa séra Bjarna Jónsson-
ar vígslubiskups, séra Friðriks Hallgrímssonar dómprófasts