Morgunn - 01.06.1983, Qupperneq 99

Bækur og tímarit
Kynstur af bókum um dulsálarfræði (parapsychology;
vísindalegar sálarrannsóknir) koma út á hverju ári, á
ensku og öðrum tungumálum. Nokkrir íslendingar fylgjast
sæmilega með helstu tíðindum á þeim vettvangi og yrði
fengur að reglubundinni greinargerð um þau skrif hér í
Morgni — þannig að fleiri fengju að njóta.
Besta ráðið til að fylgjast með rannsóknum í dulsálar-
fræði er auðvitað að gerast áskrifandi að „Journal of
Parapsychology" eða „Journál of the American Society
for Psychical Research“ eða öðrum slíkum ritum. Ritin
tvö, sem hér eru nefnd eru t.d. keypt af Háskólabókasafni
og vísa ég áhugasömum lesendum þangað. 1 ritunum er
gerð grein fyrir tilraunum. Þar eru hugleiðingar um rann-
sóknirnar og dulræn fyrirbæri. Tengsl við nútímaþekkingu
eru rædd. Viðfangsefnin eru fjölbreytileg, en strangar
kröfur um sannleiksgildi og röksemdafærslu eru gerðar
í ritunum.
Ég mæli eindregið með slíkum viðurkenndum ritum dul-
sálarfræðinga við ungt fólk og raunar aðra þá, sem finna
forvitnina vakna hjá sér. Það væri verðugt keppikefli
þeirra að skrifa síðan greinar fyrir lesendur Morguns um
það, sem menn verða áskynja við lestur á vönduðum og
áreiðanlegum skrifum um sálarrannsóknir.
7