Fréttablaðið - 14.04.2011, Blaðsíða 34

14. APRÍL 2011 FIMMTUDAGUR4 ● fréttablaðið ● brúðkaup
Kristín Arna Sigurðardóttir og Jökull
I. Elísabetarson giftu sig í Fríkirkjunni
22. desember 2010. Brúðkaupsveislan
var í Iðnó og þangað voru þau ferjuð
í vagni sem sjö sleðahundar drógu.
Brúðkaupsnóttinni eyddu þau á Hótel
Holti og fóru síðar í brúðkaupsferð
til Írans. „Hélt það væri klisja að
brúðkaupsdagurinn væri besti dagur
ævinnar,“ segir Jökull, „en hann var það
svo sannarlega.“
Jökull I. Elísabetarson, stærðfræðing-
ur og knattspyrnumaður, og Kristín Arna
Sigurðardóttir, leikskólakennari og nemi,
völdu óvenjulegan dag fyrir brúðkaupið
sitt. 22. desember hefur þó sérstaka merk-
ingu í lífi þeirra og að sögn Kristínar kom
aldrei annar dagur til greina fyrir brúð-
kaupið. „Við trúlofuðum okkur þennan dag
árið 2007,“ segir hún, „þannig að við ákváð-
um að halda okkur við hann.“
Kristín fór líka óvenjulega leið við kaup
á brúðarkjólnum. „Ég keypti hann á eBay,“
segir hún hlæjandi. „Það er að segja, ég
pantaði saumaskapinn á honum á eBay. Það
var saumastofa í Kína sem saumaði hann,
ég bara valdi sniðið og sendi þeim málin
af mér. Þær sendu mér svo kjólinn þegar
hann var tilbúinn og hann smellpassaði,
þótt ég hefði aldrei getað mátað hann.“
Brúðkaupið hófst klukkan 18 og degin-
um eyddu þau sitt í hvoru lagi, Kristín við
undirbúning fyrir brúðkaupið á herberg-
inu sem þau leigðu sér á Hótel Holti, en
Jökull í sjósundi með bandarískum vini
sem mætti í brúðkaupið. „Ég var ekkert
stressaður,“ segir Jökull. „Hafði auðvitað
heyrt þetta allt saman, að brúðkaupsdag-
urinn væri besti dagur ævinnar og allt það,
en fannst þetta ekkert svo mikið mál. Ég
verð nú seint kallaður þessi væmni gaur,
en ég get svarið það að þegar ég var kom-
inn í kirkjuna og sá Kristínu og allt fólkið
okkar þá kom eitthvað yfir mig sem ég hef
aldrei upplifað áður. Þetta var svo sannar-
lega besti og skemmtilegasti dagur sem
ég hef upplifað.“ Kristín segist hins vegar
hafa verið mjög stressuð og athöfnin sé í
hálfgerðri móðu. „Það sem ég man best
eftir er þegar við sátum í kirkjunni og ég
leit á Jökul og sá að hann horfði þannig á
mig að mér fannst ég vera fallegasta kona
í heiminum.“
Þegar athöfninni var lokið beið vagn
dreginn af sjö Síberíu-sleðahundum fyrir
utan kirkjuna og brúðhjónin fóru hring í
kringum Tjörnina í vagninum áður en þau
mættu í veisluna í Iðnó. „Það var ótrú-
leg upplifun,“ segja þau bæði. „Það hafði
snjóað á meðan athöfnin stóð yfir og þegar
við komum út var allt hvítt, en himinn-
inn stjörnubjartur og algjör stilla. Þetta
var eins og í ævintýri.“ Og ævintýrið hélt
áfram, í Iðnó biðu þeirra hundrað vinir og
ættingjar og þar rak hvert skemmtiatrið-
ið annað. „Garpur tvíburabróðir minn var
veislustjóri,“ segir Jökull, „og hann kom
mér svo sannarlega skemmtilega á óvart.
Það voru haldnar ræður og gert stólpa-
grín að okkur, Helga Braga kom og gerði
okkur að fíflum, og þetta var alveg óskap-
lega skemmtilegt kvöld. Iðnó er líka hinn
fullkomni staður fyrir brúðkaupsveislu,
þetta er svo fallegt hús og gott fólk sem
vinnur þar.“
Ævintýrinu lauk ekki morguninn eftir
brúðkaupið því nokkrum vikum seinna
fóru ungu hjónin í brúðkaupsferð til Írans
í hópferð með ömmu brúðgumans, Jóhönnu
Kristjónsdóttur. „Þetta var alveg æðisleg
ferð,“ segir Jökull. „Það var ótrúleg upplif-
un að upplifa menninguna og söguna þarna
og sjá bæði hvernig fólkið lifir og lifði. Það
er líka alltaf svo gaman að ferðast með
ömmu, hún er svo mikið heima hjá sér í
þessum löndum. Svo var líka bara svo
mikið af góðu fólki með okkur, þetta var
alveg ógleymanleg ferð.“
Enn fleiri ævintýri eru í vændum hjá
Kristínu og Jökli því í september eiga þau
von á sínu fyrsta barni, níu mánuðum eftir
brúðkaupið. „Já, við vildum auðvitað ekki
að barnið yrði bastarður,“ segir Jökull
hlæjandi. „En í alvöru þá var það nú ekk-
ert atriði að níu mánuðir væru á milli brúð-
kaups og fæðingar, þótt það sé óneitanlega
skemmtileg tilviljun.“ - fsb
Hann horfði þannig á mig að mér
fannst ég fallegasta kona í heimi
Vagn dreginn af sjö sleðahundum flutti brúðhjónin
til veislunnar.
Kristín Arna Sigurðardóttir og Jökull I. Elísabetarson giftu sig í Fríkirkjunni 22. desember 2010.
Gjafakort – þá fá allir eitthvað fallegt!
Blue Lagoon gjafakort eru fáanleg í verslunum Bláa Lónsins
á baðstað, að Laugavegi 15, Blue Lagoon spa og Hreyfingu í Glæsibæ.
Gisting í Bláa L
óninu – Lækningalind Blue Lagoon húðvörur Líkamsrækt Einkaþjálfun
Aðgangur í Bláa Lónið Spa meðferðir Snyrtimeðferðir Nudd Veitingar á LAVA
Gjafakort