Fréttablaðið - 26.11.2011, Blaðsíða 28

26. nóvember 2011 LAUGARDAGUR28
H
éðinn Halldórsson starfar á
svæðisskrifstofu UNICEF
í Amman í Jórdaníu, en
undir hana heyra 20 lands-
skrifstofur samtakanna
í Norður-Afríku og Mið-
Austurlöndum. Héðinn starfar að kynning-
armálum í sex manna teymi, sem hefur það
verkefni að safna upplýsingum um stöðu
kvenna og barna og miðla þeim áfram.
Stuðningur fólks er mikilvægur
„Það sem við erum helst að fást við um þess-
ar mundir eru afleiðingar þeirrar gríðar-
legu ólgu sem hefur verið í þessum heims-
hluta allt þetta ár vegna arabíska vorsins.
Það hefur verið í nógu að snúast við að vera
málsvari barna til dæmis í Egyptalandi,
Jemen, Sýrlandi og Líbíu,“ segir Héðinn.
„Svo ég nefni einhver af þeim verkefnum
sem UNICEF hefur sinnt má nefna að við
höfum tekið á móti sýrlensku og líbönsku
flóttafólki og mætt þörfum barna, kvenna
og fjölskyldna sem hafa þurft að yfirgefa
heimili sín. Þá hefur UNICEF nýlega staðið
fyrir mjög stórri sendingu af berklabóluefni
til Íraks, milljón skömmtum, og með því náð
að vernda öll írösk börn gegn þessum skelfi-
lega sjúkdómi.“
Þá er ekki síður mikilvægt að safna saman
upplýsingum um ástandið í löndunum og
að miðla þeim áfram í nafni samtakanna,
svo að borgarar annars staðar í heiminum
haldi áfram að styðja þarft starf UNICEF.
„Ef maður skoðar til dæmis Jemen hafa
hundrað börn látist í átökum frá því í janú-
arbyrjun. Á því þarf að vekja athygli. Við
segjum líka frá þeirri röskun sem hefur
orðið á daglegu lífi barna í þessum heims-
hluta, í kjölfarið á arabíska vorinu. Þúsundir
barna komast til dæmis ekki í skóla vegna
þessa ástands.“
Héðinn hefur starfað á svæðisskrifstof-
unni í Amman í Jórdaníu í nokkra mánuði,
en hann var áður hjá UNICEF í Jemen. Á
báðum stöðum sá hann svart á hvítu hvern-
ig peningarnir, sem UNICEF safnar í gegn-
um heimsforeldra, komast til skila. „Þegar
maður sér hvernig samtökin vinna og veit í
hvað peningunum er veitt áttar maður sig
enn betur á því hvað stuðningur fólks er
mikilvægur.“
Börn misnotuð á margs konar hátt
„Ég er að vinna að verkefni sem miðar að því
að hjálpa börnum sem hafa orðið viðskila við
fjölskyldur sínar og lifa án nokkurs stuðn-
ings eða verndar fullorðinna. Þetta er einn
af stóru þáttunum í hjálparstarfi UNICEF,“
segir félagsfræðingurinn Sólveig Svein-
björnsdóttir sem starfar á vegum UNICEF
í Eþíópíu. Hún býr í höfuðborginni Addis
Ababa, þar sem hún starfar við að byggja
upp barnvæna félagsþjónustu. Hún segir
að mikil þörf sé þar á, enda mikill skortur á
þjónustu og stuðningi við efnalítið fólk í Eþí-
ópíu. „UNICEF styður við barnaverndarstarf
í Eþíópíu, meðal annars með því að byggja
upp barnvæna félagsþjónustu,“ segir Sólveig.
Starf Sólveigar felst í að ferðast á milli sex
héraða og heimsækja félagsmálayfirvöld
á stöðunum. „Við vinnum náið með félags-
málayfirvöldum og veitum þeim tæknileg-
an stuðning og sérfræðiaðstoð. Við erum að
vinna í því að setja upp kerfi til þess að leita
uppi fjölskyldur barna, sem þau hafa af ein-
hverjum ástæðum orðið viðskila við, og sam-
eina þær á ný. Þetta er allt frá ungbörnum
upp í 18 ára. Oft koma börnin úr sveitinni til
að vinna í höfuðborginni, jafnvel ekki eldri
en 7 ára gömul. Þessi börn eru misnotuð á
margs konar hátt. Þar sem mikil fátækt er
eru börn oft notuð til að afla tekna og for-
eldrarnir eru oft ekki meðvitaðir um mis-
notkunina.“
Félagsþjónustan byggð upp
Kerfið sem verið er að byggja upp felur líka í
sér þátttöku menntamála- og heilbrigðisyfir-
valda. Í raun er verið að byggja upp félags-
þjónustuna í landinu frá grunni. „Þetta er
yfirgripsmikið verkefni sem á eftir að taka
mörg ár. Við erum rétt á byrjunarstiginu,“
útskýrir Sólveig. Sólveig hefur unnið fyrir
önnur hjálparsamtök og Flóttamannastofn-
un Sameinuðu þjóðanna, og hefur starf-
að bæði á Srí Lanka og í Súdan. Hún hefur
því talsverða reynslu og á gott með að bera
saman starf UNICEF og annarra sambæri-
legra samtaka. „Það sem ég kann að meta
við UNICEF er að samtökin vinna náið með
stjórnvöldum við að byggja upp eitthvað sem
er varanlegt. Við hjálpum við að setja upp
kerfi, aðstoðum við þjálfun og menntun fólks.
Það er verið að byggja upp frá grunni.“
Bæta líf barna um allan heim
Í nær 160 löndum og svæðum víðs vegar um heim starfar fólk á vegum Barnahjálpar Sameinuðu þjóðanna, UNICEF, stærstu
barnahjálparsamtaka í heimi. Hólmfríður Helga Sigurðardóttir sló á þráðinn til tveggja íslenskra starfsmanna Barnahjálparinnar,
þeirra Héðins Halldórssonar, sem býr í Amman í Jórdaníu, og Sólveigar Sveinbjörnsdóttur, í Addis Ababa í Eþíópíu.
FLÓTTAMENN Í JEMEN Þessa fjölskyldu hitti Héðinn Halldórsson í Al-Mazraq-flóttamannabúðunum í Jemen, þar sem UNICEF vinnur öflugt starf. Konur og börn eru meirihluti flóttamanna. MYND/HÉÐINN HALLDÓRSSON
… fæst allt þetta:
■ 1 moskítónet sem kemur í veg fyrir
malaríusmit
■ 10 bólusetningar gegn mislingum
■ 100 prótínríkar kexkökur sem hjálpa
börnum í neyð
■ 100 skammtar af ormalyfi gegn sníkju-
dýrasýkingu
■ 1000 lítrar af vatni hreinsuðu með vatns-
hreinsitöflum
Hægt er að styrkja UNICEF með stökum
framlögum, með því að kaupa rautt nef og
með því að gerast mánaðarlegur styrktarað-
ili. Allar nánari upplýsingar á www.unicef.is.
FYRIR 2.000 KRÓNUR…
Dagur rauða nefsins verður haldinn 9. desember
næstkomandi. Dagurinn er landssöfnun fyrir
UNICEF, Barnahjálp Sameinuðu þjóðanna, en á
bak við hann stendur fjöldi grínara og annarra
listamanna. Þeir sameina krafta sína í skemmti-
og söfnunarþætti sem sýndur verður í opinni
dagskrá á Stöð 2.
Aðalkynnar kvöldsins verða Þorsteinn Guð-
mundsson og Ilmur Kristjánsdóttir en auk þeirra
koma fjölmargir listamenn að þættinum. Þeirra
á meðal eru Spaugstofan, Steindi Jr., Ari Eldjárn,
Ólafía Hrönn Jónsdóttir, Guðlaug Elísabet Ólafs-
dóttir og margir fleiri.
Þetta verður í fjórða skiptið sem dagur rauða
nefsins er haldinn á Íslandi. Í undangengin skipti
hafa þúsundir Íslendinga bæst í hóp styrktar-
foreldra UNICEF – heimsforeldra. Þeir fjármunir
sem hafa safnast hafa verið notaðir til að bæta
aðstæður barna um allan heim.
Sala á nefjunum hófst á fimmtudag þegar
Vigdís Finnbogadóttir, verndari heimsforeldra
UNICEF, setti upp fyrsta nefið í ár. Rauðu nefin
eru seld um land allt og skátar bjóða þau til
sölu. Í ár er um að ræða þrjá
mismunandi karaktera:
Skottu, Skjóðu og
Skrepp.
SKOTTA, SKJÓÐA OG
SKREPPUR
Í AMMAN Í JÓRDANÍU Héðinn hefur það verkefni
að safna og miðla upplýsingum um ástand kvenna
og barna í Norður-Afríku og Mið-Austurlöndum.
SÓLVEIG SVEINBJÖRNSDÓTTIR Myndin er tekin
í Harar-héraði í austurhluta Eþíópíu, einu af sex
héröðum sem Sólveig heimsækir reglulega vegna
vinnu sinnar. MYND/ÚR EINKASAFNI