Ljósmæðrablaðið - 01.11.1979, Blaðsíða 41

LJÓSMÆÐRABLAÐIÐ
89
tengsl milli hinnar verðandi móður og þeirra, sem gæta
hennar heilsu og heilsu barns hennar eru kannski enn meiri í
dag í okkar streitufulla þjóðfélagi. Konurnar mega aldrei fá
það á tilfinninguna, að þær séu í höndum tækja. Þær treysta
þeim sem stýra tækjunum, ekki tækjunum sjálfum. Fyrir-
rennarar ykkar sýndu skjólstæðingum sínum nærgætni og
skilning og veittu þeim andlegan stuðning, gerið þið slíkt hið
sama og ljóminn yfir ljósmæðrastéttinni mun aldrei minnka.
Við skólaslit er það háttur aldraðra lærifeðra að gefa holl
ráð og kannski er ég búinn að gera það nú þegar. Annað
atriði, sem ég tel mikilvægt er að um leið og þið haldið
áfram að læra í hinum mikilvæga skóla reynslunnar, að þið
verðið alltaf opnar fyrir því sem horfir til framfara. Besta
leiðin er að endurmennta sig eins oft og eins mikið og hægt
er.
Engar breytingar hafa orðið á kennsluliði skólans og vil ég
þakka mínum samkennurum fyrir velunnin störf og sam-
starf, sem hefur alltaf verið til mestu fyrirmyndar. YFirleitt
þykir það nægilegt aðalstarf að vera skólastjóri skóla á
Islandi, hjá skólastjóra Ljósmæðraskóla íslands er þetta
aukastarf, og það hefur verið hægt að sinna því á viðeigandi
hátt einungis með því að aðrir starfskraftar hafa tekið á sig
hluta af byrðinni á svo frábæran hátt.
Ég vil þakka matráðskonunni og hennar starfsliði fyrir
þessar góðu veitingar. Ef ég á að segja eins og er, kvíði ég
alltaf fyrir því á hverju ári, að þurfa að standa hér fyrir
framan ykkur öll og halda hátíðlega ræðu, en hlakka til að
borða þessar fínu brauðsneiðar og kökur, sem að auki eru
ókeypis á þessum síðustu og verstu tímum.
Kæru fyrrverandi nemendur, nýútskrifaðar ljósmæður,
þið hafið valið ykkur ábyrgðarmikið lífsstarf, en ég hefi þá
trú, að það að verða öðrum að liði í lífinu veiti meiri
lífsuppfyllingu en allt annað.
Ég þakka ykkur fyrir samveruna og óska ykkur alls góðs í
framtíðinni.
Hjartanlega til hamingju, lifið heil.