Kjarninn - 14.11.2013, Blaðsíða 52

03/09 kjarninn ViðTAL
Ó
lafur Adolfsson er stór maður. Hann var enda
miðvörður íslenska knattspyrnulandsliðsins
um tíma. Undanfarin ár hefur Ólafur, sem er
lyfjafræðingur, einbeitt sér að rekstri lyfja-
verslana. Hann opnaði fyrst apótek á Akra-
nesi, sem heitir Apótek Vesturlands, árið 2007 og hóf harða
samkeppni gegn lyfjakeðjunni Lyfjum og heilsu sem var þar
fyrir á fleti. Í þeim leik er hann lítill fiskur í stórri tjörn.
Samkeppnin var raunar það hörð til að byrja með að Lyf
og heilsa misbeitti markaðsráðandi stöðu sinni til að reyna
að gera út af við apótek Ólafs. Það hefur verið staðfest af
Samkeppniseftirlitinu, héraðsdómi og Hæstarétti. Lyfjum
og heilsu var á endanum gert að greiða 100 milljónir króna
í stjórnvaldssekt fyrir brotið. Vesturlendingar voru það
ánægðir með innkomu Ólafs á markaðinn að þeir völdu hann
Vesturlending ársins árið 2009.
Hefði getað hætt rekstri
Hæstaréttardómur í málinu féll í mars 2013. Ólafur segir að
kvörtun hans til Samkeppniseftirlitsins yfir athæfi keðjunnar
hafi verið hringd inn snemma í júlí 2007. Því hafi liðið rúm
sex ár frá því að málið fór af stað þar til endanleg niðurstaða
fékkst í það. Ólafur segir þetta allt of langan tíma. „Á fyrstu
árunum var þetta gríðarlega erfitt. Það er bagalegt að mál
sem varða samkeppnislög þurfi að taka svona langan tíma.
Í sjálfu sér hefur þetta mál þróast á þann veg að ég kem út
sem ákveðinn sigurvegari í því. En sú staða hefði auðveldlega
getað verið uppi að ég hefði lokað um áramótin 2007/2008.
Það var raunverulegur möguleiki.
Það er erfitt fyrir aðila sem eru að byrja á markaðnum að
mæta svona grófum samkeppnislagabrotum. Við höfum séð
úrskurði vera að falla fyrirtækjum í hag sem þegar eru hætt
rekstri eða hafa verið tekin yfir af samkeppnisaðilum. Það
þarf því úrræði hjá Samkeppniseftirlitinu þar sem þeir kveða
upp bindandi úrskurð sem síðan er hægt að fara með lengra
þannig að málin taki ekki nema 6-12 mánuði að hámarki.“
Viðtal
Þórður Snær Júlíusson
thordur@kjarninn.is
„Ég skil ekki af
hverju það þarf
að taka svona
langan tíma
að selja Lyfju,
sérstaklega á
meðan fyrir-
tækið er svona
stór þátttakandi
á markaði.“