Morgunblaðið - 01.02.2012, Blaðsíða 6

6 FRÉTTIRInnlent
MORGUNBLAÐIÐ MIÐVIKUDAGUR 1. FEBRÚAR 2012
Baldur Arnarson
baldura@mbl.is
Sprengingin á Hverfisgötu, skammt
frá stjórnarráðinu, var enn í rann-
sókn hjá lögreglunni á höfuðborgar-
svæðinu þegar Morgunblaðið fór í
prentun í gærkvöldi. Hafði þá enginn
verið tekinn höndum vegna málsins.
Grunur beindist að feitlögnum og
lágvöxnum manni á miðjum aldri sem
vitni sá ganga taugastrekktan af vett-
vangi og aka svo á brott í hvítri sendi-
ferðabifreið. Náði vitnið ekki núm-
erinu á bifreiðinni.
Á upptöku öryggismyndavélar
mátti sjá mann bíða við strætisvagna-
biðskýli á Hverfisgötu laust fyrir
klukkan sjö í gærmorgun, skömmu
áður en sprengjan sprakk, og var við-
komandi beðinn að gefa sig fram við
lögreglu sem hugsanlegt vitni.
Götunni lokað í öryggisskyni
Fjarskiptamiðstöð lögreglunnar
barst tilkynning um sprenginguna
um sjöleytið en það leiddi ekki til taf-
arlausra viðbragða lögreglu. Stað-
festi Stefán Eiríksson lögreglustjóri
að yfirfarið yrði hvers vegna við-
brögðin voru þessi.
Um níuleytið barst svo önnur til-
kynning um torkennilegan hlut á
Hverfisgötu. Í kjölfarið var fjölmennt
lið, sérsveit lögreglunnar, sprengju-
sérfræðingar Landhelgisgæslunnar
og lögreglumenn, kallað á vettvang,
auk þess sem slökkvibifreið og
sjúkrabifreið voru sendar á vettvang.
Var Hverfisgötu jafnframt lokað frá
Ingólfsstræti að Lækjargötu.
Hinn torkennilegi hlutur reyndist
vera leifar af sprengjunni sem sprakk
og var vélmenni sem er sérútbúið til
að eyða sprengjum notað til að eyða
henni. Fór eyðingin þannig fram að
vélmennið skaut vatni undir háþrýst-
ingi á sprengjuleifarnar svo þær
sprungu, að því er sérfræðingur, sem
ekki vildi koma fram undir nafni,
upplýsti. Var sérfræðingur sprengju-
deildar Landhelgisgæslunnar sendur
á staðinn í sérútbúnum hlífðarbúningi
eftir að samstarfsmenn hans höfðu
fullvissað sig um að það væri óhætt
en þeir sátu þá í færanlegri stjórn-
stöð neðst í Hverfisgötunni. Byggði
það mat á upptökutæki í vélmenninu.
Upptaka úr myndavél kom að
gagni við tímasetningu sprenging-
arinnar, að því er lögreglan upplýsti
en hún vildi að öðru leyti ekki ræða
rannsókn málsins. Þá vísaði
sprengjudeild Landhelgisgæslunnar
öllum fyrirspurnum til lögreglu.
Fram kom í tilkynningu lögreglu
að frágangur á sprengjunni sýndi að
sá eða þeir sem hana bjuggu til hafi
þurft að búa yfir einhverri kunnáttu.
Um líkt leyti og tilkynningin barst
var haldinn ríkisstjórnarfundur í
stjórnarráðinu. Þótt sprengjan hafi
verið skammt frá stjórnarráðinu þótti
ekki ástæða til að rýma bygginguna,
að sögn Jóhanns Haukssonar, upp-
lýsingafulltrúa ríkisstjórnarinnar.
Voru skrifstofur forsætisráðuneytis-
ins á Hverfisgötu 4-6 rýmdar en þar
starfa um 15 manns. Bað lögregla
jafnframt fólk í nálægum byggingum
að vera ekki nálægt gluggum.
Arna Ævarsdóttir, verslunarstjóri
hjá Sævari Karli, gat ekki opnað
verslunina á Hverfisgötu 6. „Ég var
stöðvuð á horninu fyrir ofan. Lög-
reglan sagði mér að snúa við. Við
opnum klukkan tíu og þetta var svona
korter, tíu mínútur fyrir tíu.“
Ríkissaksóknari er líka með aðset-
ur á Hverfisgötu 6. Sigríður Friðjóns-
dóttir ríkissaksóknari segir starfsem-
ina hafa farið úr skorðum.
„Þeir sem ekki voru þegar mættir
klukkan níu þurftu að bíða þetta af
sér á nálægu kaffihúsi til klukkan ell-
efu. Þeim sem mættu fyrr var gert að
yfirgefa húsnæðið. Þetta hafði þau
áhrif að hér var engin starfsemi til
klukkan ellefu,“ segir Sigríður.
Lokun á Hverfisgötu var aflétt um
hádegi.
Morgunblaðið/Árni Sæberg
Vettvangur rannsóknar Sérfræðingar sprengjudeildar lögreglunnar og Landhelgisgæslunnar voru kallaðir á vettvang. Götuhlutinn var opnaður um hádegisbilið eftir þriggja tíma lokun.
Sprengja á Hverfisgötu
 Lögreglan hefur engan í haldi eftir sprengingu á Hverfisgötu  Tjáir sig ekki um rannsóknina
 Skrifstofur forsætisráðuneytisins rýmdar  Lögregla yfirfer vinnubrögð fjarskiptamiðstöðvar
Torkennilegar Leifar af sprengjunni eftir að þær voru sprengdar upp. Málið rannsakað Stefán Eiríksson lögreglustjóri var á vettvangi.
Í næsta húsi Stjórnarráðið er aðeins steinsnar frá Hverfisgötu 4-6. Tveim tímum eftir sprenginguna var haldinn ríkisstjórnarfundur í stjórnarráðinu.
Morgunblaðið/Júlíus
Morgunblaðið/Árni SæbergMorgunblaðið/Árni Sæberg