Fréttatíminn - 19.09.2014, Blaðsíða 12

Á síðasta Kirkjuþingi var ákveðið að setja ferming-arfræðslu á oddinn næstu
fjögur árin. Við vissum að þetta
lá í loftinu og þjófstörtuðum því í
raun á síðasta ári þegar út kom nýtt
fræðsluefni fyrir fermingarbörn
en þetta var í fyrsta sinn í áratugi
sem fræðsluefnið er endurskoðað
svo rækilega. Í raun má líkja þessu
við byltingu,“ segir Elín Elísabet Jó-
hannsdóttir, fræðslufulltrúi Bisk-
upsstofu. Fræðsluheftið ber heitið
„Con Dios“ sem þýðir „Með Guði.“
Efnið er þýtt og staðfært frá Sví-
þjóð en nokkrir íslenskir prestar á
Norðurlöndunum hafa unnið með
efnið á síðustu árum og bera því vel
söguna. „Þetta er ekki eins og hefð-
bundin kennslubók heldur sett upp
eins og tímarit með fjölda mynda,
þarna eru stuttir textar og létt orða-
lag. Við erum ekki að tala neina
himnesku heldur bara mannamál,“
segir Elín.
Húmor og gæska
Óhætt er að segja að fermingar-
fræðsluefnið hafi verið fært til nú-
tímans. Í Con Dios er meðal annars
vitnað í lagatexta söngkonunnar
Pink um Guð sem plötusnúð og lífið
sem dansgólf, þar er auglýsing um
þvottaefni sem er ekki merkt Svans-
merkinu heldur Kristi og er sagt
„Áhrifaríkt gegn synd. Þvotturinn
verður tandurhreinn – í hvert skipti.“
Þá er tilvitnunin í Jesú þar sem hann
segir „Allt sem þér viljið að aðrir
menn geri yður, það skulið þér og
þeim gera“ myndskreytt með mynd
af nuddolíu. „Húmorinn og gæskan
er alltaf í fyrirrúmi,“ segir Edda
Möller, útgáfustjóri Þjóðkirkjunnar.
Auk heftisins sem fermingar-
börnin fá eru sérstakar kennslu-
leiðbeiningar fyrir presta og ýmis
óhefðbundin verkefni, en þeim er
þó í sjálfsvald sett hvernig þeir
vinna með efnið þar sem hver
prestur skipuleggur sjálfur ferm-
ingarfræðsluna í sinni sókn. „Con
Dios“ var í fyrsta skipti notað á Ís-
landi í fermingarfræðslu þeirra sem
fermdust í vor en foreldrar þeirra
fermingarbarna sem nú voru að
byrja í fermingarfræðslu fengu
auk þess nýtt foreldrahefti „Con
Dios“ þar sem raunar er alls ekkert
fjallað um unglinga heldur um lífið,
trúna og tilveruna. En það er meira
sem stendur fermingarbörnum og
foreldrum þeirra til boða, sem og
prestum sem sjá um fermingar-
fræðslu, því Hildur Björk Hörpu-
dóttir og Jóhanna Gísladóttir, sem
báðar útskrifast sem guðfræðingar
í desember, hafa sett upp sérstakan
fræðsluvef sem byggir á spegluð-
um kennsluháttum, eða vendinámi.
„Vendinám felst í að heimavinnan
fer fram í kennslustofunni en fyrir-
lestrarnir fara fram heima. Við höf-
um lesið inn fyrirlestra fyrir ferm-
ingarbörn, setjum inn glærur og
spurningar til ígrundunar, og svo
mæta þau í fermingarfræðsluna og
við vinnum með efnið,“ segir Hildur.
Fræðsluefnið á iPad
Venjan er að guðfræðinemar komi
í starfskynningu á Biskupsstofu á
síðasta námsári sínu og þegar Hild-
ur og Jóhanna mættu þangað í vor
vildi svo til að þær fengu að heyra
um þann draum Elínar fræðslufull-
trúa að þróa speglaða kennsluhætti
í fræðslunni. „Þær réttu síðan mjög
hógværar upp hönd og sögðust vera
búnar að vinna slíkt efni fyrir ferm-
ingarfræðslu,“ segir Elín. Talið er
að um eitt þúsund fermingarbörn á
höfuðborgarsvæðinu noti fræðslu-
vefinn sem þær settu upp en þau fá
einfaldlega vefslóð og lykilorð og
geta síðan nálgast alla fyrirlestra í
iTunes í gegn um Podcast og þann-
ig auðveldlega hægt að setja þá á
snjallsíma, spjaldtölvu eða mp3-spil-
ara. „Könnun meðal foreldra ferm-
ingarbarna sýndi að þeir vilja taka
meiri þátt og þeir geta horft á þessa
fyrirlestra með börnunum sínum
Jóhanna bendir á að unglingar
hafi þétta dagskrá og það hafi sýnt
sig að þeir kunna vel að meta að
fermingarfræðslan sé ekki sett fram
eins og hefðbundinn kennslutími.
„Vendinám hefur líka þann kost
að það hentar jafnt þeim sem eru
lesblindir eða eiga við námserfið-
leika að stríða og svo þeim sem eru
jafnvel á undan í námi. Öll standa
þau jafnfætis í verkefnavinnunni,“
segir hún. Jóhanna starfar einnig
sem æskulýðsfulltrúi í Langholts-
kirkju og var vefurinn fyrst prufu-
keyrður þar hjá séra Guðbjörgu Jó-
hannesdóttur og séra Guðmundi
Karli Brynjarssyni í Lindakirkju.
„Þau hvöttu okkur mikið áfram og
það var gaman hvað Biskupsstofa
tók síðan vel í þetta,“ segir Jóhanna.
Elín tekur fram hvað það sé gleði-
legt að þessi vinna komi úr grasrót-
inni og að þau hafi í raun ættleitt
þetta fullbúna verkefni sem tengist
beint Con Dios.
Ekkert útilokar
kynfæramyndir
Edda bendir á að í grunninn sé boð-
skapurinn einfaldur: „Guð er kær-
leikur, Guð elskar okkur eins og við
erum og við erum aldrei ein á ferð.“
Kaflarnir í Con Dios eru stuttir og
hnitmiðaðir. Þeir fjalla meðal ann-
ars um sjálfsmynd, bænina, fyrir-
gefningu, dauðann og sorgina, og
kærasta og kærustur. Í síðastnefnda
kaflanum er fjallað sérstaklega um
samkynhneigð, og er þetta í fyrsta
skipti sem samkynhneigð er hluti af
prentuðu kennsluefni. „Fermingar-
börnin hafa ekki miklar áhyggjur af
samkynhneigð. Fyrir þeim er hún
ekki meira tiltökumál en að vera
rauðhærður,“ segir Jóhanna og Elín
bendir á að innan kirkjunnar sé nú
litið á samkynhneigð sem eðlilegan
hlut. „Þetta er bara sjálfsagt og eðli-
legt. Við elskum alls konar fólk,“ seg-
ir hún. Í þessum sama kafla er líka
fjallað um klámmyndir og hversu
óraunverulega mynd þær gefa af eðli-
legum samskiptum þar sem kynlíf á
að snúast um virðingu, fyrir sjálfum
sér og öðrum.
Hvaða nálgun prestar fara er þeirra
eigin val, en skemmst er að minnast
þess þegar prestur við Selfosskirkju
fékk kynfræðinginn Sigríði Dögg
Arnardóttur til að sjá um fræðslu
um samskipti kynjanna. Þar sýndi
hún myndir af kynfærum til að varpa
ljósi á hversu margbreytileg þau eru
í útliti. Myndasýningin var kærð af
utanaðkomandi aðila en kærunni
vísað frá. Jóhanna bendir á að nýja
kennsluefnið gefi prestum rými til að
útvíkka hvernig þeir nálgist viðfangs-
efnin. „Það er ekkert sem útilokar að
fræðslan eigi að vera eins og hún var
en það er heldur ekkert sem segir
að hún eigi að vera einmitt þannig.
Hver prestur er í raun með sinn eigin
fermingarskóla,“ segir Hildur og tek-
ur fram að í grunninn snúist þetta um
virðingu og kærleika.
Samfélagið er breytt og kirkjustarf-
ið líka. „Hér áður fyrr máttu börn
ekki koma í jarðarförina hjá afa eða
ömmu. Ég hef heyrt af fólki sem fékk
ekki að kveðja sem börn og það hvílir
enn þungt á því. Kirkjan fylgir eftir
breytingum í samfélaginu, og kristin
trú er bara ljómandi góður lífsstíll
sem snýst um að láta gott af sér leið
og vaxa sem manneskja,“ segir Edda.
Vitanlega er farið vel yfir boðorð-
in í Con Dios og í umræðum varpa
prestar því gjarnan fram hvort ferm-
ingarbörnunum finnist eitthvað vanta
í boðorðin. Yfirleitt er niðurstaðan sú
að þær hugmyndir sem þau fá er þeg-
ar að finna í boðorðunum, jafnvel þó
orðalagið sé kannski skrýtið. Hild-
ur rifjar í lokin upp eitt boðorð sem
fermingarbörnin eru þó sammála um
að mætti gjarnan bæta við: „Það á að
vera slökkt á gemsanum þegar við
erum í bíói.“
Erla Hlynsdóttir
erla@frettatiminn.is
Gagnger endurskoðun var
gerð á fermingarfræðslu Þjóð-
kirkjunnar á síðasta ári þegar
út kom fræðsluefnið Con
Dios. Allt yfirbragð efnisins
er ferskt og lifandi og dæmi
tekin úr dægurmenningunni.
Auk þess hefur verið tekinn í
gagnið fræðsluvefur þar sem
fermingarbörn geta horft á
fyrirlestra á iPad áður en þau
mæta í kirkjuna og vinna með
efni fyrirlestursins.
Bylting í fermingarfræðslu
Fremingarfræðsluefni hefur verið fært til nútímans með fræðsluritinu Con Dios.
12 fréttir Helgin 19.-21. september 2014
www.tskoli.is
Gítarsmíði
Skráning og nánari upplýsingar: Sími 514 9602
www.tskoli.is/gitar | endurmenntun@tskoli.is
Kennari: Gunnar Örn Sigurðsson gítarsmiður.
Námskeið: 22. september – 4. desember 2014.
Kennt er tvö kvöld í viku kl. 17:30–22:00, alls 100 klst.
Verð: 185.000 kr. Allt tréefni er innifalið. Námskeiðið er
styrkhæft hjá flestum fræðslusjóðum stéttarfélaga.
Lærðu að smíða Telecaster, Stratocaster,
Jazz bass, P bass eða Thinline frá grunni.