Frjáls verslun - 01.10.2009, Blaðsíða 18

18 F R J Á L S V E R S L U N • 1 0 . T B L . 2 0 0 9
mynt,“ segir Friðrik. „Það er auðvelt að lækka verð en erfitt að ná því
upp aftur.“ Þetta er reynsla sem á jafnt við um fisk og ferðir.
„Íslenska krónan hefur lengi verið meira eins konar reiknieining
en eiginlegur gjaldmiðill sem gengur kaupum og sölum á erlendum
mörkuðum,“ segir Friðrik. „Það er vitanlega afar erfitt fyrir fyrirtæki í
alþjóðaviðskiptum að þurfa að notast við þannig mynt, en ég tel jafn-
framt að upptaka evru ein og sér myndi litlu breyta til batnaðar. Það
verður að ná fyrst tökum á sveiflukenndu efnahagslífinu, en ég veit
ekki hvort okkur tekst það. Veiðimannseðlið er ennþá ríkt í okkur og
stundum veiðist vel og þá sláum við upp veislu.“
bæta þjónustuna
„Aðferðin til að auka tekjurnar er að bæta gæðin og þjónustuna,“
segir Friðrik. „Við getum ekki tekið endalaust við fleiri ferðamönnum
en við getum aukið tekjurnar ár frá ári með því að bjóða verðmeiri
þjónustu.“
Friðrik sér þannig ekki fram á að til landsins komi milljón manns
á ári í náinni framtíð.
„Við erum einfaldlega ekki tilbúin að taka við þeim fyrr en við
höfum styrkt innviðina mun betur,“ segir Friðrik. „En samt eru
miklir möguleikar á vexti í greininni með því að bjóða meiri þjónustu
lengri tíma ársins og fleiri möguleika á afþreyingu.“
„Ferðaþjónusta er þess konar grein að það er hægt að auka tekj-
urnar verulega á skömmum tíma, til dæmis með vel heppnaðri
auglýsingaherferð en þá þarf að vera hægt að taka sómasamlega
við ferðamönnum,“ segir Friðrik. „Um leið hefur verð þjónust-
unnar mikið að segja og ferðaþjónustan þolir því illa hækkanir á
sköttum og gjöldum sérstaklega núna, þegar litið er sérstaklega til
hennar við að hjálpa hraustlega til við að ná hærra atvinnustigi.“
Trúaður á jaðaráhrif
„Það er fleira að sjá á Íslandi en bara allra þekktustu staði,“
segir Friðrik. „Gestunum þykir margt merkilegt sem heima-
menn sjá ekki. Hinn nýstofnaði Vatnajökulsþjóðgarður
býður til dæmis upp á svo gríðarlega möguleika að við höfum ekki
hugmyndaflug til að sjá það allt fyrir okkur.“
„Erlendir ferðamenn koma til Íslands fyrst og fremst til að upplifa
náttúruna. Þeir vilja fara út á land, lifa sig inn í veðrið, víðernið, sum-
arbirtuna, vetrarmyrkrið og norðurljósin,“ segir Friðrik. „Það er hins
vegar misvægi í fjárfestingum milli Reykjavíkur og landsbyggðarinnar.
Bankarnir hafa verið mun fúsari til að lána í framkvæmdir í Reykjavík
en úti á landi. Möguleikarnir á vexti eru hins vegar að mínu mati mestir
utan höfuðborgarinnar.“
„Ég er trúaður á svokölluð jaðaráhrif,“ segir Friðrik. „Vöxturinn
verður mestur á jöðrum þeirra svæða sem nú eru mest sótt. Á Suð-
urlandi flyst t.d. ferðamannastraumurinn austar. Ferjuhöfnin við
Bakkafjöru stuðlar meðal annars að þessu og á eftir að stórauka áhug-
ann á Vestmannaeyjum.“
gisting á þremur stöðum
Hótelhaldarinn á Rangá er vel í sveit settur í ljósi þessa. Í Hótel
Rangá á Hellu eru um 50 herbergi. Það er flaggskipið í flotanum.
Síðan er sama fyrirtæki með 20 herbergi í lúxushóteli við Hrauneyjar
og auk þess 80 herbergi í gömlum vinnubúðum vegna virkjanafram-
kvæmda þar. Það kallar Friðrik 0-stjörnu hótelið sitt til gamans.
Síðan eru 12 herbergi í litlu lúxushóteli á Skógum.
Friðrik kom upphaflega að þessum rekstri sem ráðgjafi eftir að
hann hætti hjá SH árið 1999. Síðan kom hann inn sem einn eigenda
árið 2003 og hefur haft hótelreksturinn að aðalstarfi síðan.
Friðrik lýsir sjálfum sér sem „algerum sveitamanni“ og að hann hafi
aldrei náð að festa rætur á mölinni þótt það hafi orðið hlutskipti hans
að búa þar. Hann er Norðlendingur - frá Bjargi í Miðfirði – en hefur í
þrjá áratugi verið með annan fótinn í hestabúskap í Fljótshlíðinni.
Ferðir og fiskur
Hann segist fyrst og fremst vera markaðsmaður og frá þeim sjón-
arhóli séð sé munurinn á fiski og ferðum ekki mikill.
Rekstri Hótels Rangár er skipt upp í eignarhaldsfélag um húsin og
svo rekstrarfélag. Reksturinn hefur gengið vel en þyngra er fyrir fæti
hjá eignarhaldsfélaginu um sinn, meðal annars vegna erlendra skulda
sem hafa hækkað mikið í gengisfallinu.
Friðrik vill líkja ferðaþjónustunni núna við sjávarútveginn eins og
hann var fyrir 30 árum. Menn hugsa oft meira um magn en gæði og
innviðir eru of veikir, sérstaklega utan Reykjavíkur.
„Það þarf að leggja meiri áherslu á gæðin og þjónustuna og fá
meira út úr fjárfestingunum. Það gerum við jafnframt með því að
bjóða upp á stöðugt fjölbreyttari og meiri afþreyingu,“ segir Friðrik.
„Síðast en ekki síst er það skylda okkar að fara vel með mjólkurkúna,
náttúruna okkar. Hún er perlan sem dregur gestina til okkar.“
BERÐU SAMAN VERÐ
OG ÞJÓNUSTU
NÆST ÞEGAR ÞÚ FLÝGUR
HVERS VEGNA VELUR ÞÚ ICELANDAIR?
• Í flugvélum Icelandair er meira bil á milli sæta og gott rými fyrir alla farþega.
• Hver farþegi hefur sinn eigin skjá á sætisbakinu fyrir framan sig.
• Rafmagnsinnstungur eru í hverju sæti á Economy Comfort og Saga Class
til hleðslu á tækjum.
• Aukið athafnarými og betri stuðningur við líkamann gera flugferð með
Icelandair ánægjulegri.
HUGURINN BER ÞIG
AÐEINS HÁLFA LEIÐ