Frjáls verslun - 01.10.2009, Blaðsíða 89

F R J Á L S V E R S L U N • 1 0 . T B L . 2 0 0 9 89
e n d u r m e n n t u n
Punkturinn yfir i-ið
Ófeigur Tryggvi Þorgeirsson er yfirlæknir slysa- og bráðadeildar
Landspítalans. Hann hélt til Bandaríkjanna að loknu læknanámi
við Háskóla Íslands árið 1989. Hann stundaði árin 1992–1995
nám í almennum lyflækningum við University of Connecticut,
árin 1995–1997 var hann í námi í heimilislækningum við
University of Massachusetts og árin 1997–1999 var hann
aðstoðarprófessor við heimilislæknadeild University of
Massachusetts og yfirlæknir legudeildar við UMass-Memorial
Medical Center í Worcester í Massachusetts. Eftir að hann flutti
aftur til Íslands árið 1999 var Ófeigur yfirlæknir í nokkur ár á
lyflæknissviði HSS á Selfossi, hann var yfirlæknir gæsludeildar
á vegum slysa- og bráðasviðs LSH, hann var settur sviðsstjóri
slysa- og bráðasviðs LSH frá október 2006–mars 2007 og hann
hefur verið yfirlæknir slysa- og bráðadeildar Landspítalans frá
2005.
„Ég held að það sé voðalega gott að örva hausinn á sér
með því að fara aftur í nám. Innst inni fannst mér ég þurfa að
taka upp þráðinn á ný og byrja að læra aftur. Ég sá þetta sem
frábært tækifæri og frábært nám,“ segir Ófeigur sem er á
öðru ári í stjórnun í lýðheilsufræðum og heilbrigðisþjónustu við
Háskólann í Reykjavík. „Mér finnst þetta vera punkturinn yfir i-ið
á því sem ég var að læra fyrir tólf árum síðan.“
Það fylgir því óneitanlega álag að vera bæði í vinnu og námi. „Þetta
virkar sem minna álag af því að þetta er gefandi og skemmtilegt.“
Ófeigur segist hafa verið óöruggur við að fara aftur í háskólanám.
„Ég hafði áhyggjur af því að ég væri að gera mistök en svo var þetta
besta ákvörðun sem ég hef tekið í langan tíma og ég sé ekki eftir
þessu. Þetta er svo skemmtilegt; ekki bara námið heldur að setjast
á skólabekk með öðru fólki. Ég er að gera það sem mig langar
virkilega til að gera. Þegar ég var í námi áður fyrr var ég búinn að vera
samfleytt í skóla árum saman og það var komin svolítil þreyta í mann
en núna er kominn áhugi og vilji. Ég er að búa til ný tækifæri og þetta
ýtir á mig að fara að gera nýja hluti.“
Ófeigur segist í dag vera gagnrýnni á sjálfan sig og aðra í kringum
sig en þegar hann var í námi á árum áður. „Maður tekur þetta allt
öðrum tökum og þetta er skemmtileg fjölbreytni og upplyfting miðað
við það sem maður hefur gert. Þetta er öðruvísi nám en ég hef
verið í áður. Í háskóla í „gamla daga“ var maður „fóðraður“ – tók við
upplýsingum en gaf ekkert endilega til baka af sjálfum sér. Það taka
allir miklu meiri þátt í kennslunni í þessu námi.“
Læknirinn segir að það sé gott fyrir sig andlega að vera í námi. Og
fyrir heilsuna yfir höfuð. „Ég er léttari – þetta sparkaði aðeins í mig.
Ég er meira til í að prófa eitthvað nýtt. Mér finnst ég ekki vera að
staðna lengur.“
Ófeigur Tryggvi Þorgeirsson. „Maður tekur þetta allt öðrum tökum og þetta er skemmtileg fjölbreytni
og upplyfting miðað við það sem maður hefur gert. Þetta er öðruvísi nám en ég hef verið í áður.“