Fréttatíminn - 06.02.2015, Page 36

Hliðrænn áhorfandi rekinn út af
É
Ég fékk, starfs míns vegna, skeyti frá
Ríkisútvarpinu á mánudaginn þar sem
ég var minntur á þann ánægjulega við-
burð, eins og það var orðað, er útvarps-
stjóri, innanríkisráðherra og forstjóri
Vodafone hittust í þeim tilgangi einum að
slökkva á hliðrænu kerfi, svokölluðu. Ég
hafði svo sem enga hugmynd um hvað
hliðrænt kerfi var en sá við nánari lestur
að þar var átt við þær sjónvarpsútsend-
ingar sem við höfum búið við frá upphafi
sjónvarps hér á landi, í hartnær 50 ár. Á
sömu stundu lauk síðasta áfanga í upp-
byggingu á stafrænu dreifikerfi Vodafone
og Ríkisútvarpsins. Fram kom í tilkynn-
ingunni að sjónvarpsútsending yrði frá
og með þessum sama mánudegi alfarið
á stafrænu formi sem þýddi stórbætta
þjónustu um land allt.
Ekki dreg ég þá fullyrðingu í efa en
veit samt ekki hvort útvarpsforstjórarnir
og ráðherrann gátu leyft sér að tala um
ánægjulegan viðburð í þessu samhengi.
Ég er alls ekki viss um að þeir hafi kynnt
sér aðstæður á litlu heimili í Kópavog-
inum, áður en skrúfað var fyrir þetta hlið-
ræna kerfi. Við hjónakornin erum með
voðalega fínt tölvusjónvarp í sjónvarps-
herbergi okkar, með mörgum fjarstýr-
ingum og fleiri fítusum en ég kann frá að
greina. Við vorum ákaft hvött til þess af
afkomendum okkar og tengdabörnum,
öllum tæknilega sinnuðum, að kaupa
svona apparat. Þá gætum við horft á hinar
ýmsu sjónvarpsrásir að vild og til baka í
tíma. Værum sem sagt ekki háð útsend-
ingartíma stöðvanna, værum okkar eigin
dagskrárstjórar.
Við létum þetta auðvitað eftir okkar
tæknisinnaða fólki og höfum síðan horft
á sjónvarp í háskerpu og rambað fram og
aftur í tíma. Það er þægilegt þótt ég við-
urkenni að hafa ekki náð fullum tökum
á þessu tækniundri. Fyrir það fyrsta skil
ég ekki af hverju þarf fleiri fjarstýringar
en eina á þessi tól – og í annan stað af
hverju ekki er að finna takka á sjónvarps-
tækinu sjálfu þar sem stendur „On og
Off“, kveikt eða slökkt. Slíkur búnaður
myndi auðvelda mér lífið, einkum þegar
ég finn ekki fjarstýringarnar. Það gerist
stundum þótt við séum bara tvö í heimili
– en oftar þegar barnabörnin hafa komið
í heimsókn og flandrað milli stöðva, mun
betur að sér í þeim fræðum en afinn og
amman.
Það skal þó tekið fram að nefnd amma
er betur að sér í tækni þessa skynvædda
sjónvarpstækis en afinn enda stjórnar
hún yfirleitt fjarstýringunum. Ég læt mér
það vel líka og horfi á það sem hún velur.
Stöku sinnum kemur þó fyrir að
smekkur okkar á sjónvarpsefni fer ekki
alveg saman. Mín góða kona er, líkt og
Lukku-Láki, skjótari en skugginn að
skjóta þegar íþróttaefni birtist á skjánum.
Þegar bolti eða íþróttapeysa birtist þar er
hún svo snögg á fjarstýringuna að augað
nemur vart myndbrotið. Þess utan sæki
ég stundum í nördalega fréttaþætti eða
náttúrulífsþætti frá Afríku – sem sannar-
lega eru ekki allra.
Þetta er þó ekkert ágreiningsefni á
okkar heimili – enda hef ég átt mitt at-
hvarf í eldhúsinu ef ég hef viljað horfa á
ljón éta antilópur eða spennandi íþrótta-
lýsingu, til dæmis handboltann að undan-
förnu. Frúin hefur, frómt frá sagt, engan
áhuga á handboltalýsingum og breytir
þar litlu hvort Ísland er að keppa eða ekki
en ég hef getað horft á allt þetta að vild
í sjónvarpstæki í eldhúsinu. Þar hef ég
haft aðgang að öðru sjónvarpstæki og
unað því vel, horft á boltann eða annað
spennandi í sjónvarpstæki sem er einfalt
í notkun og hefur aldrei brugðist. Því
fylgir aðeins ein fjarstýring. Með henni
er kveikt og slökkt – og stillt á stöð. Upp
á annað er ekki boðið enda þarf ekkert
annað. Finnist fjarstýringin ekki er hægt
að kveikja og slökkva á sjónvarpstækinu
sjálfu. Þetta er því dásamlegur gripur í
alla staði.
En Adam er ekki lengur í sinni Paradís,
svo er fyrrnefndum útvarpsforstjórum
og ráðherra að þakka – eða kenna, öllu
heldur. Fyrir nokkru sá ég í fréttum að
slökkva ætti á títtnefndu hliðrænu sjón-
varpsútsendingarkerfi en tók það ekki
til mín. Sjónvarpstækið í eldhúsinu er
nefnilega flatskjár, þótt ekki sé hann stór.
Flatskjáir urðu eins konar táknmynd
bruðls Íslendinga fyrir hrun. Þessi skjár
var að vísu keyptur vel fyrir hrun svo ég
mat það svo að með kaupunum á honum
hefði ég ekki beinlínis valdið hruninu –
en í mínum huga var hann engu að síður
nýtískulegt tæki. Því taldi ég skjáinn
móttækilegan fyrir stafræna útsendingu
og fylgdist ekkert með Boga Ágústssyni
þegar hann mætti föðurlegur á skjáinn
og tilkynnti gamaldags og lítt tæknisinn-
uðu fólki að það þyrfti að gera ráðstaf-
anir, kaupa nýjan móttökubúnað, ella yrði
aðeins snjór á skjánum eftir 2. febrúar.
Á mig fóru hins vegar að renna tvær
grímur þegar borði tók að renna í sífellu
yfir eldhússjónvarpið mitt þar sem stóð
svart á hvítu að þetta tiltekna sjónvarps-
tæki væri gamaldags og gott ef ekki eig-
andinn líka. Ég hljóp til og kíkti á sömu
stundu á tölvuvædda sjónvarpið sem
konan horfði á. Þar var að sönnu engin
handboltalýsing í gangi en heldur enginn
borði sem rann yfir skjáinn.
Dómurinn var því einfaldur en um leið
endanlegur. Sjónvarpið í athvarfi mínu
var úrelt – og gott ef ekki eini áhorfandi
þess líka. Bogi, Magnús Geir, Ólöf ráð-
herra og Vodafone-stjórinn höfðu í sam-
einingu dæmt mig úr leik. Ég var rekinn
út af, án þess að hafa brotið af mér.
Ætli það hefði kostað þetta góða fólk
mikið að halda gamla hliðræna rofanum í
réttri stillingu áfram, hvað sem líður staf-
rænni tæknivæðingu? Var sú stilling ekki
einföld og auðskiljanleg, eins og á öðru
gömlu og góðu dóti: „On og Off“?
Jónas
Haraldsson
jonas@
frettatiminn.is
HELGARPISTILL
Te
ik
ni
ng
/H
ar
i
Brakandi góð og vel
bökuð súrdeigsbrauð
að hætti Jóa Fel
Steinbökuð brauð með heilkorni.
Enginn viðbættur sykur!
Nýtt – Toscana, súrdeigsbrauð
með heilkorna hveiti
Kóngabrauð, gróft súrdeigsbrauð
með heilkornamjöli (án hvíts hveitis)
Sveitabrauð, dökkt súrdeigsbrauð
með heilkorni og rúgi
36 viðhorf Helgin 6.-8. febrúar 2015