Tímarit Máls og menningar - 01.03.1996, Side 99

István Örkény
Mínútusögur
Leiðbeiningar um notkun
Þó meðfylgjandi sögur séu stuttar eru þær eigi að síður skrifaðar í fullri
alvöru.
Stærsti kostur þeirra er að þær spara tíma því þær krefjast ekki
fullrar athygli vikum og mánuðum saman.
Meðan við linsjóðum egg, meðan við hringjum (ef það er á tali) er
hægt að lesa eina mínútusögu.
Heilsuleysi eða taugaveiklun er engin hindrun. Við getum lesið þær
hvort heldur sem er sitjandi eða standandi, í hvassviðri eða rigningu
og jafnvel í troðfullum strætisvagni. Flestra þeirra er einnig hægt að
njóta meðan gengið er fram og aftur.
Takið sérstaklega vel eftir titlunum. Höfundurinn hefur reynt að
vera gagnorður og því ekki leyft sér merkingarlausa titla. Áður en við
stígum upp í sporvagn athugum við númer hvað vagninn er. Titlar
þessara sagna eru jafnmikilvægir.
Þetta þýðir auðvitað ekki að nóg sé að lesa aðeins titilinn. Fyrst skal
lesa titilinn, síðan söguna: Það er eina rétta aðferðin.
Athugið!
Ef eitthvað skilst ekki, skal lesa að nýju það sem um ræðir. Sé það
enn óskiljanlegt, er sagan gölluð.
Það er enginn heimskingi til, aðeins slæmar mínútusögur!
Dauði leikarans
Síðdegis í dag, í hliðargötu útfrá Ullö breiðstrætinu, fékk hinn frægi
leikari Zoltán Zetelaki aðsvif og datt.
Vegfarendur komu honum á næsta sjúkrahús en þó allar nýjustu
TMM 1996:1
89