Tímarit Máls og menningar - 01.03.1996, Side 118

Svar ritstjóra
Kæri Þorgeir.
Ég þakka þér falleg orð í minn garð og tímaritsins. Það var þarft og gott að
þú skyldir upplýsa lesendur um þinn þátt í íslenskri kvikmyndasögu. Ég læt
þeim Geirlaugi, Þorvarði og Sigurjóni eftir að svara athugasemdum þínum
við orð þeirra og skrif, en spurningarnar sem þú beindir til mín varðandi
fræga fólkið, þekkingarsvið þess og veruleikaflóttann eru spennandi, þótt
ekki hafi ég svar við þeim á reiðum höndum. En einhverra hluta vegna varð
mér hugsað til tékkneska heimspekingsins Karels Kosiks og viðtals við hann
sem birtist í TMM í árslok 1993, þar sem hann segir meðal annars:„Kjarni
nútímasögunnar og „lok“ hennar felast í því að ofvöxtur er hlaupinn í
aukaatriðin, menn eru hættir að greina kjarnann frá hisminu, hismið er
orðið að kjarna og öfugt: fólk er sífellt á harðahlaupum á eftir því sem ekkert
er, eltist í sífellu við aukaatriðin, en lætur aðalatriðin gersamlega framhjá sér
fara." Er þetta ekki einmitt málið?
Bestu kveðjur,
FR
108
TMM 1996:1