Glóðafeykir - 01.11.1973, Page 27

GLÓÐAFEYKIR
27
Lýsa fá í ljóðaskrá
lista- háu -gripin.
Verkum á hér vel má sjá
Vesturáar svipinn.
Kveðið við stúlku.
Freisting bjóða brjóstin þín,
bros og rjóðar kinnar;
Þú ert góða Gunna mín
gimsteinn þjóðarinnar.
Vor.
Gróa á hjalla grösin smá,
grænka vallarbörðin.
Nú er falleg sjón að sjá:
Sól um allan fjörðinn.
Víst um fjörðinn fyrr ég leit
foldarsvörðinn gróa.
Unir hjörðin öll á beit
út um börð og móa.
Geislar flæða fjalls um skaut,
fegra hæð og buga.
Hér í næði lyngs við laut
leitar kvæði í huga.
Gull í blænum gafst þú mér
geislavæna daga.
Ég í bænum þakka þér
þessa grænu haga.
Ama hrindir sérhvert sinn,
sorg í skyndi dvínar.
Lífsins yndi ég ávallt finn
innan um kindur mínar.