Skírnir - 01.09.1989, Page 171

SKÍRNIR
HÁSKÓLI. SAMFÉLAG . . .
421
kennslu. En eftir að vissum mörkum er náð vinnst ekkert við það að
bera meira fé í störf að kennslu eða rannsóknum. Af þessu má
gjörla sjá að fjársýsla verður, hversu nauðsynleg og brýn sem hún
kann að vera, ekki talin til frummarkmiða, ef horft er á háskóla sem
samfélag. Og af því verður aftur að draga þá ályktun að ekki sé rétt
að skoða stjórn og stjórnsýslu háskólanna einkum, hvað þá ein-
vörðungu, undir sjónarhorni fjármálanna. Fjármálin sjálf, eins og
reyndar stjórnsýslan öll, gefa ekkert það af sér ein og sér sem við-
kemur meginmarkmiðum háskólasamfélagsins og því verður að
fella hvorttveggja, fjármálin sérstaklega og stjórnsýsluna almennt,
undir meginmarkmiðin en ekki öfugt. Því hæfir stjórnun eftir
markmiðum fremur stjórn háskólans en stjórnun eftir fjármunum.
IV
Það sem rakið hefur verið að framan nægir greinilega ekki til að
rökstyðja nákvæmar tillögur um stjórnsýslu eða stjórnarfar há-
skóla enda hefur aðeins verið rædd ein almenn hlið af tveimur eða
fleirum sem á því eru að skoða þekkingarsamfélag háskóla. Þó má
úr því draga saman ályktanir um heildarsjónarmið sem hafa verður
í heiðri þegar hugað er að stjórnsýslu Háskóla Islands.
1. Leitast verður við að greina að þau mál sem verða að vera sam-
eiginleg og hin sem hentast er að séu dreifð.
2. Gæta verður þess að hin sameiginlegu mál séu rædd sem víðast
í háskólanum og leitast sé við að ná fram ekki aðeins samþykki
heldur samstöðu um þau.
3. Gæta verður þess að framselt vald innan háskólans og saman-
söfnuð ábyrgð gagnvart umhverfinu séu takmörkuð við sam-
eiginleg málefni og í samræmi við vilja og hag samfélagsins alls.
4. Nauðsyn er að skipulag stjórnsýslu og allar reglur sem hún
verður að lúta eða framfylgja séu eins einfaldar og kostur er.
5. Ábyrgð á sameiginlegri þjónustu og framkvæmd verður að vera
sem skýrust, einkvæmust og stöðugt undir þeim reglum sem
slíku eru settar af æðsta valdhafa háskólans.
6. Stjórnsýsla má ekki verða sjálfstætt verkefni, né heldur svo
viðamikil að hún skyggi á og skekki meginhlutverk háskólans.