Ritröð Guðfræðistofnunar - 01.09.2013, Blaðsíða 216
Jatum uœr kennimenn Schalholltzstiktis ad uier uilium medtaka toors hog-
bornazta herra kongsins Ordinationem epter þui gud gefur oss sina nad til og
tuor formadur verdur oss tilseigiandis at holldnum ollum kennimannligum
friheitum...26
Yfir samþykktinni grúfði þó skuggi. Á sama tíma og þetta varð á
Þingvöllum sat Ögmundur Pálsson, ellihrumur og blindur, í varðhaldi um
borð í dönsku herskipi úti fyrir Islandsströndum. Hann lést skömmu síðar,
annaðhvort í skipinu á leið yfir hafið eða í haldi í Danmörku. Konungi
mun hafa gramist sú óhollusta við sig, er fram hafði komið hjá biskupi og
á þinginu árið áður. Fræðimenn eru ekki á eitt sáttir um hvaða hlut Gissur
hafi átt að máli við handtöku fyrirrennara síns.27 En víst er að hér voru
orðin tímamót í sögu kirkju og þjóðar.28
Lítúrgísk áhersluatriði í ordinansíunni
Svo skal nu haufd vera ein almennilig messa. sem uier kaullum hamesso. a
sunnudaugum. saker þeirra er sig uilia þionuzta i vanaligum messukladum yfer
skryddu alltare med ueniulegum kaleik og patinu og logande liosum.
Þannig þýðir Gissur Einarsson í upphafi þess kafla kirkjuordinansíunnar,
sem fjallar um messugjörðina. I þessari grein er sem fyrr segir sjónum beint
sérstaklega að tveimur köflum ordinansíunnar, þ.e. um messuna og predik-
unina. Áður en vikið er að samanburði á ólíkum útgáfum ordinansíunnar og
því sem hann leiðir í ljós er rétt að gera stuttlega grein fyrir þeim lítúrgísku
áhersluatriðum sem fram koma í þessum tveimur köflum, en þau fylgja
mjög því sem fram kemur í ritum Lúthers um efnið.
Sjálfur var Marteinn Lúther mikill áhugamaður um helgihaldið. Helstu
rit siðbótarmannsins, þar sem hann fjallar um efnið, eru þessi: 1) Urn
Babýlonarherleiðingn kirkjunnar (1520) þar sem Lúther setur firam lítúrgíska
26 Islenzkt fornbréfasafn X, s. 632.
27 Sem dæmi um andstæð sjónarmið í málinu má nefna að Tryggvi Þórhallsson dregur taum Gissurar
og bendir á að óskynsamlegt hefði verið fyrir hann fjárhagslega að siga dönsku hervaldi á Ögmund
án þess að reikningsskilunum í Skálholti væri lokið (Gissur biskup Einarsson ogsiðaskiptin, s. 113)
en Magnús Jónsson er hins vegar afar neikvæður í garð Gissurar og atburðarásarinnar vorið 1541
og talar um hana sem ,,blett[..] á minningu Gizurar" (Magnús Jónsson, „Alþingi árið 1541“,
Skírnir 1930, s. 177-194, sjá s. 187).
28 Þess má geta að um samskipti Skálholtsbiskupanna tveggja á mörkum kaþólsks og lúthersks
siðar, Ögmundar Pálssonar og Gissurar Einarssonar, hafa verið skrifaðar tvær námsritgerðir til
embættisprófs í guðfræði við HÍ (Erlendur Sigmundsson 1942 og Halldór Gunnarsson 1967).
214