Morgunblaðið - 28.07.2016, Síða 4

4 FRÉTTIRInnlent
MORGUNBLAÐIÐ FIMMTUDAGUR 28. JÚLÍ 2016
Austurvegur 69 - 800 Selfoss Lónsbakki - 601 Akureyri Sólvangi 5 - 700 Egilsstaðir Sími 480 0400 jotunn@jotunn.is www.jotunn.is
Massey Ferguson
sláttutraktorar
Verð frá
Kr. 379.000
Toro
sláttutraktorar
Verð frá
Kr. 849.000
Gróðurhús
Plast og gler
Verð frá
Kr. 69.132
Sláttuvélar
Frá Massey Ferguson og Toro
Verð frá
Kr. 89.000
SLÁTTUVÉLAR
& GRÓÐURHÚS
Kristján H. Johannessen
khj@mbl.is
„Við erum búin að grafa upp 43 grafir og nokkuð stæðilega
kirkju sem hefur verið stafverkshús með torfveggjum,“
segir Guðný Zoëga, mannabeinafræðingur og deildarstjóri
fornleifadeildar Byggðasafns Skagfirðinga, í samtali við
Morgunblaðið.
Vísar hún í máli sínu til þess að í sumar hefur fornleifa-
deild safnsins, í samstarfi við bandaríska fornleifafræðinga
frá Massachusetts-háskóla í Boston, unnið við rannsóknir í
Hegranesi í Skagafirði undir merkjum skagfirsku kirkju-
og byggðasögurannsóknarinnar. Hluti af verkefninu er
uppgröftur kirkjugarðsins sem er við bæinn Keflavík og
segir Guðný hann hafa verið tekinn í notkun skömmu eftir
kristnitöku, um árið 1000, og var fólk grafið þar fram á
fyrstu áratugi 12. aldar.
Guðný segir uppgröftinn hafa leitt ýmislegt áhugavert í
ljós. „Við sjáum t.a.m. hvernig grafirnar voru merktar á
sínum tíma, það er eitthvað sem við höfum ekki séð áður.
Steinar hafa verið lagðir við bæði höfuð- og fótenda grafa á
yfirborði. En einnig voru steinar lagðir í grafirnar, ofan á
kistur og þá sem í þeim voru,“ segir hún. Aðspurð segist
Guðný ekki vita hvers vegna steinunum var komið fyrir
með þessum hætti. „Þetta er þó þekkt úr samtíða kirkju-
görðum erlendis, en þessi siður er nú löngu horfinn.“
Þá hefur einnig komið í ljós að kirkjugarðurinn í Kefla-
vík var, líkt og margir kirkjugarðar úr frumkristni, kynja-
skiptur, þ.e. konur lágu norðan megin kirkju og karlar
sunnan megin. Það sama má sjá í sumum íslenskum og er-
lendum miðaldakirkjugörðum. „Kynjaskiptingin hér virð-
ist hins vegar vera talsvert meira afgerandi en víðast ann-
ars staðar þar sem hún virðist alger og nánast án
undantekninga,“ segir Guðný, en siður þessi lagðist að
mestu af snemma á miðöldum.
Aðspurð segir hún sjaldnast muni að finna í þessum
görðum, en hópurinn fann þó fallegan silfurpening.
Ljósmyndir/Byggðasafn Skagfirðinga
Uppgröftur Kirkjugarðurinn er hringlaga og 17 metrar í þvermál, en búið er að grafa þar upp alls 43 grafir.
Fornir siðir litu dags-
ins ljós í Skagafirði
 Steinum var komið fyrir í og ofan á kistum látinna
Leifar Myndin sýnir beinagrind konu sem grafin var í
kistu, en ofan á fótenda hennar var steini komið fyrir.
Skúli Halldórsson
sh@mbl.is
Lögreglustjóri lögreglunnar á Vest-
urlandi hefur verið boðaður á fund
bæjarráðs Akraness í dag. Hyggst
ráðið taka fyrir málefni lögreglunnar
í kjölfar umfjöllunar Morgunblaðs-
ins í gær, um niðurskurð hjá fáskip-
uðu lögregluliði embættisins.
Regína Ásvaldsdóttir, bæjarstjóri
á Akranesi, segir bæjaryfirvöld líta
stöðu lögreglunnar alvarlegum aug-
um, en þau mótmæltu harðlega stað-
setningu lögreglustjóra við samein-
ingu lögregluembættanna árið 2014
og bentu ráðuneytinu ítrekað á að
kaupstaðurinn væri sá langfjöl-
mennasti á Vesturlandi, á Akranesi
væri fjöldi af-
brota mestur í
fyrirhuguðu um-
dæmi, auk þess
sem þar væri
starfandi miðlæg
rannsóknardeild
fyrir allt Vestur-
land.
Þannig sé
Akranes með um
helming allra
hegningar- og sérrefsilagabrota í
umdæminu, auk þess sem um 60% af
alvarlegustu brotunum séu framin
innan bæjarins.
„Svörin sem ráðamenn gáfu okkur
voru að með sameiningunni yrði
styrking á löggæslunni á Akranesi,
meðal annars með tilkomu sólar-
hringsvakta sem áður höfðu verið
lagðar af,“ segir Regína.
„Nú er ljóst að það hefur ekki
gengið eftir og okkur finnst það
mjög alvarlegt að ekki sé vakt hér
allan sólarhringinn, í ljósi þess að
hér búa sjö þúsund manns.
Við teljum einfaldlega að hér séu
verkefni og mál sem þarfnast þess að
stjórnun lögreglunnar sé mun nær
vettvangi en nú er raunin,“ segir hún
og bætir við að hún hafi fengið
ábendingar um tilvik þar sem enginn
hafi verið á vakt lögreglunnar í
Akranesi fyrir hádegi í miðri viku.
„Við munum leita skýringa á
þessu á fundi okkar með lögreglu-
stjóranum.“
Funda með lögreglunni
 Bæjaryfirvöld Akraness líta stöðu lögreglunnar alvar-
legum augum  Fullyrðingar ráðamanna ekki gengið eftir
Regína
Ásvaldsdóttir
Viðar Guðjónsson
vidar@mbl.is
Ung kona sem telur að sér hafi ver-
ið byrluð ólyfjan á skemmtistað í
miðborg Reykjavíkur gagnrýnir að
hún hafði hvorki verið send á
bráðamóttöku Landspítalans né
tekin af henni skýrsla hjá lögreglu.
Að sögn Kristjáns Inga Krist-
jánssonar hjá kynferðisbrotadeild
lögreglunnar hefði samkvæmt al-
mennu verklagi átt að senda kon-
una á bráðamóttöku til blóð- og
þvagsýnatöku. Hann segist ekki
þekkja til málsins þar sem viðkom-
andi lögreglumaður starfi ekki í
kynferðisbrotadeildinni og hvert
tilvik þurfi að vega og meta fyrir
sig. Að sögn konunnar kom ítrekað
fram í máli hennar og vinkonu
hennar, sem með var í för, við lög-
reglu að þær teldu að henni hafi
verið byrluð ólyfjan. Í dagbók lög-
reglu segir að konan hafi fundist
inni á salerni og að hún hafi verið
sjáanlega ölvuð. Hún hafi þó gengið
af sjálfsdáðum út af skemmtistaðn-
um.
Fólk leiti á bráðamóttöku
Auk lögreglu var sjúkrabíll kall-
aður á staðinn. Að sögn konunnar
ber hún engan kala til lögreglu-
mannanna sem hafi verið kurteisir.
Hins vegar geti talist ámælisvert að
þeir hafi hvatt hana til þess að fara
heim í leigubíl í stað þess að beina
henni á bráðamóttöku nauðgana.
Hefði stúlkan farið þangað hefði
málið ratað inn á borð rannsóknar-
lögreglu eins og verklag segir til
um og væri því í öðrum farvegi en
nú er. „Verklagið á að vera þannig
að ef grunur leikur á þessu þá á að
senda fólk á bráðamóttökuna og
blóð er tekið úr því,“ segir Kristján.
Hann bendir þó á að lögreglumenn
séu oft í útköllum þar sem drukkið
fólk á í hlut. Þeirra sé að vega og
meta hverju sinni til hvaða úrræða
beri að grípa til. Kristján segir þó
fulla ástæðu til þess að hvetja fólk
sem telji að því hafi verið byrluð
ólyfjan að leita til bráðamóttöku.
Ísköld og skjálfandi
Atvikið átti sér stað á aðfaranótt
sunnudags skömmu eftir miðnætti.
Að sögn ungu konunnar höfðu hún
og vinkona hennar drukkið hóflega
þetta kvöld. Fóru þær í framhald-
inu á ónefndan skemmtistað í mið-
borginni og fengu sér hvítvínsglas á
barnum. Eftir skamma stund hefði
hún gengið nokkur skref og fallið í
gólfið. Að sögn hennar voru þær
einungis búnar að drekka um hálft
hvítvínsglas hvor þegar hún féll í
gólfið. Eftir það man hún lítið sem
ekkert eftir kvöldinu. Atvikalýsing,
það sem eftir lifði kvölds, er að
mestu byggð á frásögn vinkonu
hennar.
Eftir að hafa fallið í gólfið fór
hún inn á baðherbergi þar sem hún
kastaði upp í um 20 mínútur sam-
fellt að eigin sögn. Að sögn vinkonu
hennar varð hún í framhaldinu ís-
köld og skalf. Gat hún með engu
móti tjáð sig þó augun hafi verið
opin. Það næsta sem hún man er
þegar hún vaknaði á heimili sínu
daginn eftir.
Setji sér viðbragðsáætlun
Unga konan segist ekki vilja
koma fram undir nafni þar sem hún
leiti ekki eftir athygli, en vill koma
því á framfæri að mikilvægt sé fyrir
fólk sem lendir í slíkum aðstæðum
að leita til bráðamóttöku. Þá árétt-
ar hún fyrir fólki að hafa augun á
drykkjum sem það hefur meðferðis.
Einnig segir hún mikilvægt að
skemmtistaðir setji sér viðbragðs-
áætlun þegar slík tilvik komi upp.
Hefði átt að
vera send á
bráðamóttöku
 Telur sér hafa verið byrluð ólyfjan
 Var hvött til að fara heim í leigubíl
Ljósmynd/Getty Images
Ólyfjan Atvikið átti sér stað á
skemmtistað í miðborginni.