Húnavaka - 01.05.2016, Blaðsíða 177

H Ú N A V A K A 175
var gefin rík réttlætiskennd og var föst fyrir ef á þurfti að halda. Hún var
kraftmikil, jákvæð, glaðlynd og örlát. Hún hafði góða og sterka nærveru. Lára
glímdi við illvígan sjúkdóm síðasta árið sem hún lifði. Hún tókst á við erfið
veikindi af styrk og æðruleysi.
Útför Láru Sveinbergsdóttur fór fram frá Seltjarnarneskirkju þann 10.
febrúar. Jarðsett var í Fossvogskirkjugarði.
Séra Ægir Fr. Sigurgeirsson.
Kristjana Sigurbjörg Lárusdóttir
frá Skagaströnd
Fædd 12. júní 1926 – Dáin 23. febrúar 2015
Kristjana Sigurbjörg, eða Stella eins og hún var alltaf kölluð, fæddist á bænum
Vindhæli sem stendur rétt fyrir innan Skagaströnd. Foreldrar hennar voru
Lára Kristjánsdóttir, f. 1901, d. 1993 og Lárus G. Guðmundsson, f. 1896,
d. 1981. Þeim Lárusi og Láru varð fjögurra barna auðið og var Sigurbjörg
næst elst. Systkini hennar voru Soffía Sigurlaug,
f. 1925, d. 2010, Guðmundur, f. 1929, d. 2002 og
Guðrún Ingibjörg, f. 1930, d. 2010.
Fyrstu æviár Stellu bjó fjölskyldan á Vindhæli
en flutti út á Skagaströnd árið 1935 í hús sem
Lárus byggði og heitir Herðubreið. Stella átti
bjart ar bernskuminningar frá Vindhæli og Skaga-
strönd. Ung kynntist hún eiginmanni sínum,
Jörgen Friðrik Berndsen, f. 1922, d. 2012, kallaður
Junni, enda voru þau nágrannar og leiksystkin frá
barnæsku.
Börn Stellu og Jörgens eru: Bára f. 1943, mað-
ur hennar var Helgi Þór Jónsson og eignuðust
þau þrjá syni. Fritz f. 1947, eiginkona hans er
Indíana Friðriksdóttir. Börn þeirra eru þrjú. Lára f. 1948, eiginmaður hennar
er Jón Karl Scheving. Dætur þeirra eru þrjár. Bjarki f. 1949, börn hans eru
fjögur. Yngst er Regína f. 1965, eiginmaður hennar er Bragi Þór Jósefsson.
Börn þeirra eru þrjú.
Fyrstu árin eftir að Bára fæddist bjó Stella í foreldrahúsum með barnið.
Hún fór 18 ára gömul til náms í Reykjaskóla í Hrútafirði í einn vetur. Hún var
alla tíð handhög, námskeið í sauma- og prjónaskap nýttust henni vel.
Þegar Stella var um tvítugt fluttu þau til Siglufjarðar. Jörgen fór þangað til
þess að læra húsasmíði í Iðnskóla Siglufjarðar, þar vann hann fulla vinnu og
stundaði nám en Stella sá um heimilið og vann í síldinni. Þau bjuggu á
Siglufirði meðan Jörgen kláraði námið. Þar eignuðust þau marga góða vini og
héldu þau vináttubönd mörg hver alla tíð.
Stella og Jörgen fluttu, ásamt börnum sínum, aftur til Skagastrandar og