Húnavaka - 01.05.2016, Blaðsíða 197

H Ú N A V A K A 195
Árni, f. 1911, d. 1987, Þóra, f. 1913, d. 1999, Svava, f. 1915, d. 1990, Gústaf,
f. 1919, d. 1993, Sumarliði, f. 1922, d. 1936, þá Elísabet Þórunn og yngst var
Þorgerður, f. 1928, d. 2015.
Elísabet var á Ísafirði allt til ársins 1944 en kom þá til Blönduóss til systur
sinnar, Þóru, er bjó á Blönduósi með manni sínum, Snorra Arnfinnssyni. Þau
Þóra og Snorri stofnsettu Hótel Blönduós og ráku það.
Á Blönduósi lágu saman leiðir Elsu og Jóhanns Sverris Kristóferssonar,
f. 1921, d. 1995, er fæddur var á Blönduósi. Börn Elsu og Sverris eru fimm:
Kristófer Sverrir f. 1945, kvæntur Önnu Guðrúnu Vigfúsdóttur og eiga þau
einn son. Hildur Björg f. 1947, gift Birni Búa Jónssyni og eiga þau þrjú börn.
Sigurgeir f. 1948, d. 1995, hann lét eftir sig fjögur börn. Jón f. 1958, kona hans
er Jóhanna Harðardóttir, hann á þrjú börn. Yngstur er Sverrir Sumarliði
f. 1964, sambýliskona hans var Júlía Björk Arnardóttir og eiga þau eina dóttur.
Elísabet var félagsmálamanneskja. Hún var í
Kvenfélaginu Vöku og studdi það með ráðum og
dáð og þar formaður í mörg ár. Hún var í
Sambandi austur-húnvetnskra kvenna og þar
einnig formaður í mörg ár. Elsa kom að stofnun
Heimilisiðnaðarsafnsins á Blöndu ósi og sá um
það árum saman. Í mörg ár sá hún um félagsstarf
aldraðra á Blönduósi og veitti því forstöðu. Elsa
var ein af stofnendum Krabbameinsfélags Austur-
Húnvetninga og þar gjaldkeri um skeið. Hún sat
í þjóðhátíðarnefnd og var formaður sögusýningar
Blönduóss á hundrað ára afmæli staðarins. Auk
þess gegndi hún ýmsum félags- og trúnaðarstörfum.
Hún og Sverrir, maður hennar, ráku verslunina
Dverg á Blönduósi um árabil í húsi sínu á Húnabraut 27.
Elísabet vann utan heimilis á Héraðshæli Austur-Húnvetninga en þar var
hún á næturvöktum eða starfaði sem vökukona.
Elísabet safnaði steinum á seinni tíð og átti töluvert safn af steinum sem hún
gaf Blönduósbæ. Hún fór ekki troðnar slóðir og var óhrædd við að prófa
eitthvað nýtt. Á sínum fullorðinsárum tók hún sig til, lærði að mála myndir og
málaði töluvert.
Þegar íbúðir eldriborgara voru byggðar á Flúðabakka á Blönduósi fluttu
Elísabet og Sverrir með þeim fyrstu þar inn. Elsa flutti suður árið 1996 eftir lát
Sverris, þar var hún í leiguíbúð hjá Félagsbústöðum á vegum Reykjavíkurborgar
allt til ársins 2009. Þegar hún kom aftur norður flutti hún á Heilbrigðisstofnunina
á dvalardeild. Hún lést á Heilbrigðisstofnuninni og var útför hennar gerð frá
Blönduóskirkju þann 20. nóvember. Jarðsett var í Blönduóskirkjugarði.
Sr. Sveinbjörn Einarsson.