Dagblaðið Vísir - DV - 29.03.2019, Síða 54

54 PRESSAN 29. mars 2019
H
lýr haustdagur í byrjun
september 1980 var um
margt mjög sérstakur fyrir
Robert (Bobby) Shafran,
19 ára, frá Scarsdale, sem er
skammt frá New York-borg. Upp
var runninn fyrsti dagur hans í
Sullivan Community College í
Loch Scheldrake. Margir nemend-
ur sem hann mætti, heilsuðu hon-
um innilega, buðu hann velkom-
inn aftur og allir kölluðu þeir hann
Eddy.
Þetta vakti að vonum nokkra
undrun hjá Bobby þar sem hann
hafði aldrei áður komið þarna.
Þegar hann sagði fólki að hann héti
Bobby en ekki Eddy brosti fólk,
klappaði honum á öxlina, faðmaði
og hló. Þegar hann hafði fundið
herbergi sitt á heimavistinni flýtti
hann sér inn og læsti. Augnabliki
síðar var bankað. Það var Micha-
el Domnitz, sem hafði verið her-
bergisfélagi Edwards (Eddy) Gal-
land önnina á undan. Hann vissi
að gamli herbergisfélagi hans
hafði alls ekki í hyggju að koma
aftur í Sullivan Community en
maðurinn, sem stóð fyrir fram-
an hann, var nákvæmlega eins og
Eddy Galland, í smáatriðum.
„Ert þú ættleiddur og fæddur
12. júlí 1961?“
Spurði hann vantrúaður. Bobby
svaraði báðum spurningunum ját-
andi.
„Þú átt tvíburabróður.“
Þetta grunaði hvorki Bobby né
fjölskyldu hans. Ungu mennirnir
voru í uppnámi yfir þessari upp-
götvun og hlupu í næsta símaklefa
og hringdu í Eddy Galland sem
bjó á Long Island með foreldrum
sínum. Skömmu síðar settust þeir
upp í Volvo-bifreið Bobbys og óku
í einum áfanga til Long Island en
þangað komu þeir seint um kvöld.
Þeir knúðu dyra og Eddy opnaði.
Tvíburarnir störðu á spegilmynd
sína
Eins og lygasaga
Fjölmiðlar fengu fljótlega veður
af málinu og byrjuðu að fjalla um
Bobby og Eddy sem höfðu verið
aðskildir sex mánaða gamlir og
komið í fóstur hjá sitthvorri fjöl-
skyldunni. Nokkrum vikum síð-
ar lagði nemandi við Queens
College í New York dagblað fyrir
framan skólabróður sinn, David
Kellman, og benti á ljósmynd af
Eddy og Bobby. David stífnaði upp
og horfði vantrúaður á myndina.
Eddy og Bobby líktust honum í
einu og öllu. Hann hringdi í Eddy
og nokkrum dögum síðar voru þrí-
burarnir sameinaðir á nýjan leik.
Bræðurnir höfðu alist upp
við mjög mismunandi aðstæður.
Bobby hjá fjölskyldu í efstu lög-
um samfélagsins, Eddy hjá milli-
stéttarfjölskyldu og David hjá
verkamannafjölskyldu.
Eftir að þríburarnir hittust og
saga þeirra var opinberuð undr-
uðust margir að enginn hefði sagt
þeim að þeir væru þríburar. Þá
vakti það undrun að þremur árum
áður en fjölskyldurnar ættleiddu
drengina höfðu þær allar ættleitt
stúlkur og þá í gegnum Louise
Wise Service. Þetta truflaði þó ekki
þríburana sem svifu nánast á skýi
og nutu samvistanna.
„Við erum stór fjölskylda og við
elskum hver annan.“
Sögðu þeir einum rómi í viðtali
við NBC Today 1980 og bættu við
að þeir hlökkuðu til að eiga gott líf
saman. Þeir voru stöðugt í kast-
ljósi fjölmiðla, innanlands sem
utan. Þeir fluttu að lokum saman
í íbúð í Queens og lífið lék við þá.
Eina skiptið sem þeir sýndu for-
tíð sinni áhuga var á fyrri helmingi
níunda áratugarins en þá höfðu
þeir uppi á móður sinni og heim-
sóttu hana. Þetta var í eina skipt-
ið sem þeir hittu hana og því hefur
verið haldið vandlega leyndu hver
hún er. Hún var 19 ára þegar hún
eignaðist þá. Hún upplýsti aldrei
hver faðir þeirra er. Hún glímdi
við andleg veikindi á þessum tíma
og síðar. Hún gaf þríburana strax
til ættleiðingar eftir að hún ól þá,
en hún eignaðist reyndar fjórbura
en fjórði drengurinn var andvana
fæddur.
Líkir og ólíkir
Árið 1988 opnuðu þríburarnir
veitingastaðinn Triplets Rouman-
ian Steakhouse í Soho í New York.
Reksturinn gekk vel og fyrsta árið
var veltan um ein milljón dollara.
En stofnun veitingastaðarins var á
vissan hátt upphafið að endi hins
hamingjusama lífs, sem var bara
hamingjusamt á yfirborðinu. Þrátt
fyrir að bræðurnir væru líkir þá
kom sífellt í ljós að þeir voru einnig
ólíkir á margan hátt. Einnig kom
fljótlega í ljós að þeir höfðu allir
glímt við andleg veikindi á barns-
og unglingsaldri. Allir höfðu þeir
verið lagðir inn á geðdeild en
David hafði oftast verið lagður inn
og hafði dvalið lengi á geðdeildum.
Þegar Bobby hóf nám við Sulli-
van Community College var hann
næstum búinn með skilorðsbund-
inn dóm sem hann hlaut fyrir að-
ild að morði á 87 ára konu, Elodie
Henchel, árið 1978. Dómurinn
komst að þeirri niðurstöðu að
hann hefði ekki komið beint að
morðinu en hann hafði hylmt yfir
með tveimur vinum sínum sem
höfðu stolið tveimur demants-
hringjum frá gömlu konunni áður
en þeir myrtu hana á hrottalegan
hátt.
Rekstur veitingastaðarins gekk
vel og frægt fólk hópaðist þang-
að til að umgangast þríburana. En
þegar betur kom í ljós hversu ólíkir
þeir voru komu brestir í samband
þeirra og það varð ansi stirt. Þetta
endaði með því að Bobby hætti af-
skiptum af rekstri veitingastaðar-
ins 1995 og sleit öllu sambandi við
Eddy og David. Þetta fékk mjög á
Eddy en honum hafði alltaf fund-
ist hann vera nánastur bræðrum
sínum. Hann glímdi við andleg
veikindi og allt virðist þetta hafa
orðið honum svo ofviða að hann
skaut sig í júlí 1995 á heimili sínu
í New Jersey. En þetta hörmulega
sjálfsvíg var ekki það eina sem
skók tilveru fjölskyldnanna þriggja
og þeirra sem fylgdust með.
Tveimur mánuðum eftir sjálfs-
víg Eddys afhjúpaði blaðamaður-
inn og rithöfundurinn Lawrence
Wright, hjá The New Yorker, að
Louise Wise Service hefði séð um
að útvega börn til tilrauna á veg-
um hins þekkta sálfræðings Peters
Neubauer. Ekki var þá vitað um
umfang tilraunanna. Þær snerust
um ótilgreindan fjölda eineggja
tví- og þríbura. Sumir af tvíburun-
um hafa síðan náð saman en aðrir
ekki. En þríburarnir voru einnig á
meðal tilraunadýranna.
Eins og fyrr er getið höfðu fjöl-
skyldur þeirra einnig ættleitt stúlk-
ur þremur árum áður en þeir voru
ættleiddir. Þegar það ferli var í
gangi höfðu fjölskyldurnar gefið í
skyn að þær vildu gjarnan ættleiða
eitt barn til viðbótar. Þegar stúlk-
urnar voru ættleiddar samþykktu
fjölskyldurnar að Neubauer og
starfsfólk hans fengi að gera próf á
stúlkunum öðru hverju til að fylgj-
ast með þroska þeirra.
Á æskuárum þríburanna og
allt þar til þeir hittust 1980 komu
vísindamenn reglulega heim til
þeirra og fjölskyldna þeirra til að
fylgjast með þeim. Meðal þess
sem var kannað voru áhrif erfða
og umhverfis á þroska einstak-
lingsins. Ein af ástæðunum fyrir
þessari leynd var að mæður allra
barnanna, sem tóku óafvitandi
þátt í rannsókninni, voru gyðingar
sem höfðu gefið börn sín til ætt-
leiðingar í gegnum ættleiðingar-
stofu gyðinga.
Þessari umdeildu tilraun Neu-
bauer lauk aldrei. Neubauer lést
2008, 94 ára að aldri. Gríðarlegt
magn gagna, sem hann hafði safn-
að í tengslum við tilraunina, er
geymt í öruggri geymslu í Yale-há-
skólanum og má ekki opna þessi
gögn fyrr en 2065. n
Kaffihlaðborð ýmsar útfærslur, Pinnamatur,
smurt brauð, tertur, o.fl. fyrir erfidrykkjuna
Afgreitt á einnota fötum
tilbúið á borðið
Erfidrykkja
HRINGDU OG PANTAÐU Í SÍMA 555 1810
Hólshraun 3, 220 Hafnarfjörður / S 555 18 10 og 565 1810 / veislulist@veislulist.is / veislulist.is
Þríburarnir
sem fundu hver annan
Aðskildir á kaldrifjaðan hátt og notaðir til tilrauna
Kristján Kristjánsson
ritstjorn@dv.is
Eddy, Bobby og David
DV hefur ekki vitneskju um
hver er hver.