Dagblaðið Vísir - DV - 01.11.2019, Blaðsíða 28

Ferðafélag Íslands
Hann er ljós yfirlitum, hárprúður og brosmildur og einstaklega gjöfull á gríðarlega smitandi
hlátur. Hann er grannvaxinn og hár
yfir meðallag og segist heita John,
sem er nú alls ekki algengt nafn á
gegnheilum Íslendingi. Þeir heita
nú flestir bara Jón. Til viðbótar
segist hann reyndar heita Snorri,
eins og goðinn og rithöfundurinn
Sturluson sem margir telja að hafi
klifið á hæsta tind allra rithöfunda í
heiminum á sinni tíð.
Þessi Snorri okkar er líka
svakalegur þegar kemur að því að
kljást við tinda. Hann hefur nefnilega
klifið fjóra af hæstu tindum heims.
Hann vann það þrekvirki árið
2017 að klífa næsthæsta fjallið á
jarðarkringlunni, K2 sem er 8.611
metrar yfir sjávarmáli. Á undan
hafði hann klifið fjallið Lhotse og til
að kóróna klifurhringinn í einni og
eiginlega sömu ferðinni „skaust“
hann snöggvast á Broad Peak. Á
þessu ári kleif hann svo Manaslu sem
er það áttunda í röðinni yfir hæstu
fjöll heims og einungis fimm fjöll eru
talin vera erfiðari viðureignar.
Allir þessir tindar eru yfir átta
þúsund metrar á hæð. Til að átta
sig á hæðinni þá er hver um sig
langtum hærri en flugvélar fljúga í
innanlandsflugi en lítið eitt lægri en
þoturnar fljúga almennt þegar þær
fara með himinskautum milli landa.
Það fer vel á því að þessi mikli
háfjallamaður leiði Ferðafélag
unga fólksins enda hefur hann með
kappsemi komið þessum nýja anga
af meiði Ferðafélagsins í góðan vöxt.
„Markmiðið er að hvetja ungt fólk
á aldrinum 18 til 25 ára til að ferðast
um landið sitt, kynnast landinu og vera
úti í náttúrunni í góðum félagsskap
og fá jafnvel fróðleik í kaupbæti,“ segir
fjallagarpurinn spurður út í þennan
nýlega félagsskap.
Fullyrða má að öryggið sé
uppmálað í öllum ferðum því reynsla
Johns Snorra er gríðarleg enda hefur
hann gengið víða, verið í skátum og
björgunarsveitum og oft komist í
hann krappann. Þannig verður það
samt ekki í þessum ferðum enda
áherslan á þægilegar göngur þótt
stundum geti aðeins reynt á.
„Mitt markmið er að allir sem vilja
eigi að komast með og taki með sér
góða skapið – ef ekki þá verður bara
séð fyrir því,“ segir John Snorri og
hlær. „Það er mikilvægt að njóta og
fræðast og vera klæddur eftir veðri.
Svo þarf maður auðvitað að taka
með sér nesti og það er allt í lagi að
gera það líka í styttri ferðunum.“
Gott fyrir byrjendur
Ferðafélag unga fólksins er mjög
hentugt fyrir þá sem eru að stíga
sín fyrstu skref í fjallamennsku og
er líka frábær vettvangur til að
hitta aðra á svipuðum aldri með
svipuð áhugamál. FÍUng býður upp
á fjölbreytta dagskrá af stuttum
dagsferðum á vorin og haustin en á
sumrin er farið í nokkrar lengri ferðir.
John Snorri er að teikna upp
veturinn núna og árið allt og er að
raða ferðunum niður í dagbókina.
Hann hefur fengið til liðs við sig haug
af ungu fólki sem stýrir því með
honum hvert verður farið. Í vetur
og vor var farið m.a. á Helgafell,
Akrafjall og Glym og í sumar var
farið á Hvannadalshnjúk, Sveinstind,
Fimmvörðuháls og í Þórsmörk.
Núna í október var svo farið á
Móskarðshnúka. Örugglega verður
gengið um svipaðar slóðir að einhverju
marki en svo farið eitthvað allt annað.
Dagsferðir eru allar ókeypis fyrir
félagsmenn en árgjald í FÍUng er
3.800 krónur.
Fékk fjallabakteríuna í
smalamennsku
John Snorri fékk fjallabakteríuna
kornungur og hefur ekki læknast
þrátt fyrir að hafa gengið á þessu
firnaháu tinda og þolað gríðarlegan
kulda og nánast allar hugsanlegar
raunir þess manns sem þarf að ná
settu marki í návígi við himintunglin.
„Ég var sendur í leitir upp á fjöll
að hausti til þegar ég var bara sjö
ára. Fjallkóngurinn sármóðgaði
mig með því að færa mig í bókina
sem hálfan mann því ég var ekki
orðinn fullorðinn. Þannig hófst mín
fjallamennska og ég veit ekkert
skemmtilegra en að vera á fjöllum.
Þótt furðulegt sé frá því að segja þá
er fjallganga afslöppun í öllum sínum
líkamlegu átökum og hún veitir mikla
vellíðan, þetta er í raun hugleiðsla og
næring fyrir líkama og sál.“
24 tindar á 24 dögum
Eins og ráða má af uppþotum Johns
Snorra á háskaleg háfjöll hefur hann
einstaka ánægju af áskorunum.
Síðasta vetur leiddi hann hóp örfárra
afar vaskra göngumanna í mesta
skammdeginu á 24 fjöll í nágrenni
höfuðborgarinnar, á einungis 24
dögum í jólamánuðinum sjálfum.
Með honum í öllum göngum var Páll
Guðmundsson, framkvæmdastjóri
Ferðafélagsins sem er ýmsu vanur,
og honum þótti það vænt um
átökin að núna verður þetta að
öllum líkindum opið verkefni þegar
nær dregur jólum. Í fyrra var þetta
nokkurskonar niðurtalning til jóla, einn
tindur á dag – sama hvernig viðraði.
„Þetta er kannski ekki fyrir hvern
sem er, en hugmyndin er samt að
endurtaka þetta núna í vetur og
bjóða fleirum með í fjörið,“ segir
fjallahöfðingi unga fólksins.
Háskóli Íslands miðlar fróðleik í ferðum
Háskóli Íslands hefur unnið með
FÍUng og mun gera áfram í
vetur. Háskólinn hefur starfað
með Ferðafélagi Íslands frá árinu
2011 að fræðandi gönguferðum í
borgarlandinu undir heitinu með
Fróðleik í fararnesti og hafa þúsundir
nýtt sér þær göngur.
Í göngum FÍUng, sem Háskólinn
veitir liðveislu, kemur vísindamiðlari
eða fræðimaður með í förina og veitir
magnaðan fróðleik um ótrúlegustu
þætti sem tengjast ferðinni sjálfri og
svæðinu sem gengið er um.
John Snorri Sigurjónsson segir
að þetta dýpki ferðina mikið og geri
hana gagnlegri og skemmtilegri.
Sjálfur leiðir hann allar göngur unga
fólksins. Það er ekki amalegt að fá
leiðsögn frá John Snorra, manni sem
hefur m.a. gengið á tindana Manaslu,
Lhotse, K2 og Broad Peak sem allir
eru firnaháir og eftirsóttir á meðal
fremsta fjallafólks veraldar. John
Snorri ætlar meira að segja aftur á
hættulegasta fjalla jarðar, K2 í vetur
– á árstíma þegar ekkert lifandi hefur
komist á þennan fræga fjallstind.
„Af hverju ég ætla mér þetta,“
segir John Snorri og skellihlær
og er eiginlega bara undrandi á
spurningunni. „Ég ætla að sigra sjálfan
mig. Þegar líkaminn öskrar á mig:
hættu þessu, gefstu upp maður!!!!
Þá reynir fyrst vel á mann, og þá
kemur þetta aukaátak sem maður veit
kannski ekki að maður eigi til. Þegar
maður nær að yfirstíga þetta ákall frá
sjálfum sér um að hætta… og kemst á
toppinn, þá hefur maður sigrað tindinn
og líka sjálfan sig.“
MAÐURINN SEM SIGRAR
SJÁLFAN SIG LEIÐIR FÍUNG
 JOHN SNORRI SIGURJÓNSSON HEFUR GENGIÐ Á FJÓRA AF HÆSTU
OG ERFIÐUSTU TINDUM HEIMS
Ferðafél g Íslands