Morgunblaðið - 23.11.2019, Síða 54

54 ÍÞRÓTTIR
MORGUNBLAÐIÐ LAUGARDAGUR 23. NÓVEMBER 2019
 Knattspyrnumaðurinn Árni Vil-
hjálmsson hefur gengið frá samningi
við úkraínska úrvalsdeildarfélagið Ko-
los Kovalivka, en samningurinn gildir
út þetta keppnistímabil. Kolos er að-
eins sjö ára gamalt félag og leikur nú í
fyrsta skipti í úrvalsdeildinni, þar sem
það er í áttunda sæti af tólf liðum þeg-
ar leiknar hafa verið 14 umferðir. Árni
er fyrsti erlendi leikmaðurinn í sögu
Kolos. Hann varð síðasta vetur fyrsti
Íslendingurinn til að spila í Úkraínu.
Hann lék þá seinni hluta tímabilsins
með Chernomorets Odessa, sem láns-
maður frá Nieciecza í Póllandi, og
gekk mjög vel, skoraði 7 mörk í 14
leikjum, en náði ekki að koma í veg
fyrir að liðið félli úr úrvalsdeildinni.
 Breiðablik hefur skipt um banda-
rískan leikmann hjá kvennaliði sínu í
körfuknattleik því samningi hefur ver-
ið sagt upp við Violet Morrow og í
staðinn hefur Danni Williams verið
fengin til félagsins. Williams kemur frá
Texas þar sem hún lék með háskólaliði
Texas A&M, sem er eitt af þeim sterk-
ustu í bandaríska háskólaboltanum,
eins og fram kemur á Facebook-síðu
körfuknattleiksdeildar Breiðabliks.
Hún lék síðast í Púertóríkó og varð
meistari með liði sínu þar.
 Körfuboltamaðurinn Gunnar Ólafs-
son er farinn frá spænska félaginu
Oviedo. Félagið rifti samningi sínum
við Gunnar og Bandaríkjamanninn Tre
Coggins í gær. Oviedo er í 16. sæti af
18 liðum í spænsku B-deildinni.
Gunnar lék með Keflavík á síðustu
leiktíð, en hann er uppalinn hjá Fjölni.
Gunnar getur ekki spilað hér á landi
fyrr en á næsta ári, þar sem fresturinn
til að ganga frá félagsskiptum hér á
landi rann út fyrir skömmu.
 Knattspyrnumarkvörðurinn ungi
Jökull Andrésson skrifaði í gær undir
nýjan samning við enska knattspyrnu-
félagið Reading. Samningurinn gildir
til 2022. Jökull gekk ungur í raðir
Reading og skrifaði undir fyrsta at-
vinnumannasamning sinn er hann
varð 17 ára gamall á síðasta ári. Þrátt
fyrir að vera aðeins átján ára hefur
Jökull spilað með U23 ára liði Reading
á tímabilinu og hefur hann einu sinni
haldið hreinu í fimm leikjum. Jökull
spilaði með aðalliði Reading á undir-
búningstímabilinu og er þriðji mark-
maður aðalliðsins.
 Svanhildur Ylfa Dagbjartsdóttir
skrifaði í gær undir þriggja ára samn-
ing við knattspyrnudeild FH. Svanhild-
ur Ylfa er fædd 2003 og er því aðeins
16 ára gömul. Skoraði hún eitt mark í
tíu leikjum með HK/Víkingi í úrvals-
deildinni á síðustu leiktíð.
 Haukur Helgi Pálsson og Martin
Hermannsson munu ekki fá frí
frá félagsliðum sínum til að
spila með íslenska landsliðinu í
körfuknattleik í forkeppni
heimsmeist-
aramótsins
sem fram
fer í febrúar.
Ekkert hlé
verður á
keppni félagsliða
Hauks Helga og
Martins á þessum
tíma. Af þeim sök-
um fær landsliðið
ekki notið krafta
þeirra. Haukur var
heldur ekki með í
landsleikjum í ágúst.
Eitt
ogannað
FÓTBOLTI
Sindri Sverrisson
sindris@mbl.is
„Þetta verður ekki endilega voða-
lega skemmtilegt næstu vikurnar
en ég horfi fram á við og veit að það
er stórt ár fram undan,“ segir Al-
freð Finnbogason, landsliðs-
framherji í knattspyrnu.
Eftir að hafa lagt mikið á sig í
sumar til að koma skrokknum í sitt
besta ástand, í kjölfar þess að meið-
ast í kálfa í apríl, var Alfreð kominn
á fulla ferð með liði sínu Augsburg
og nýlega búinn að skora gegn Bay-
ern München og Schalke. Þá dundi
hins vegar á honum áfall í formi
Leicester-mannsins Caglars Söyün-
cüs sem hrinti Alfreð í jörðina með
harkalegum hætti í landsleik Tyrk-
lands og Íslands á dögunum. Alfreð
fór úr axlarlið og spilar ekki meira
á þessu ári.
„Vanalega þegar svona gerist lít-
ur maður bara á það sem óhapp og
ég er ekki að fara að erfa þetta
neitt. Hann [Söyüncü] var mjög
sorrí og bað liðsfélaga að koma því
til skila til mín. Það breytir auðvitað
ekki stöðunni en það er fínt að vita
af því að hann vissi upp á sig sök-
ina. Þetta er algjör óþarfi, þegar þú
spilar boltanum, að fleygja mann-
inum til í leiðinni. Tyrkirnir elska
það kannski svolítið á sínum heima-
velli að æsa upp stuðningsmennina
með svona löguðu. En þetta er bara
búið og gert. Núna er endurhæfing
hjá mér sem ég ætla að tækla al-
mennilega,“ segir Alfreð, sem eftir
síðustu ár hjá Augsburg þekkir
hann það fullvel að þurfa að æfa
einn í meiðslum á meðan félagar
hans fá að vera með boltann á tán-
um. Hann segir bataferlið vera um
átta vikur og stefnir á að geta spilað
í fyrsta eða öðrum leik eftir jólafrí, í
lok janúar. Alfreð hefur áður meiðst
á öxl en ekki farið úr axlarlið.
„Læknarnir sem skoðuðu mig
sögðu að í 99% tilfella hefðu menn
farið úr axlarlið við svona tilfelli.
Það voru margir þættir sem spiluðu
saman og gerðu að verkum að það
var óhjákvæmilegt að svona færi.
Hann kom svolítið á „blindu“ hlið-
ina hjá mér, ég ætlaði að fara að
spila boltanum og var á ferð en ekki
í jafnvægi, völlurinn harður og ég
lendi þannig að ég gat ekkert varið
mig. Það er leiðinlegt að lenda í ein-
hverju svona slysi, sem maður get-
ur ekkert gert í, eftir að hafa unnið
mikla vinnu til þess að jafna sig af
meiðslum. Núna hef ég haft nokkra
daga til að svekkja mig á þessu og
er búinn að snúa blaðinu við og far-
inn að horfa jákvæðum augum fram
á við,“ segir Alfreð.
Síðustu ár verið mjög „slitin“
Nú er ljóst að Grindvíkingurinn
verður utan vallar vegna meiðsla í
195 daga af 365 á árinu 2019, eða
meira en helming ársins. Hann var
frá keppni í 153 daga á árinu 2018
og missti einnig af stærstum hluta
leiktíðarinnar 2016-2017. Þegar Al-
freð hefur getað spilað hefur hann
hins vegar raðað inn mörkum, en
hvernig er andlega heilsan eftir svo
tíð og erfið meiðsli?
„Hún hefur nú verið nokkuð góð.
Auðvitað reynir þetta talsvert á þol-
inmæðina og þrautseigjuna hjá
manni, og maður þarf að búa sér til
sinn eigin heim í þessu þegar maður
er ekki að fara að æfa með strákun-
um. Það er ekkert rosalega
skemmtilegt að vera bara inni að
hjóla þegar maður vill vera með á
æfingum og í leikjum, og svo veit
maður líka að það tekur alltaf
nokkra leiki að komast aftur af stað
eftir meiðsli. Mér var farið að líða
virkilega vel í síðustu leikjum, eftir
svona 4-5 leiki plús landsleiki þar
sem maður var kannski á vellinum
en ekki kominn í toppform, sem er
bara mjög eðlilegt. Þetta er 90% í
hausnum, að undirbúa sig fyrir
þetta ferli, og maður þarf að setja
sér lítil markmið þannig að maður
sé ekki að ergja sig á hverjum degi
yfir að vera ekki úti að spila fót-
bolta. Það eina jákvæða er að ég hef
gert þetta áður og veit hvað ég er
að fara út í,“ segir Alfreð og bætir
við:
„Ég er búinn að vinna mikið í því
að koma mér í gott stand og vil
fyrst og fremst geta unnið mína
vinnu og spilað fótbolta. Því miður
hefur síðasta árið verið mjög slæmt
hvað meiðsli varðar, og síðustu tvö
ár hafa verið mjög slitin. Mitt að-
almarkmið er því að koma mér í
stöðugt stand þannig að ég geti
spilað fótbolta næstu árin án þess
að vera alltaf að hugsa um einhver
meiðsli. Ég var á mjög góðri leið
varðandi það markmið en ég
stjórna bara því sem ég get stjórn-
að, svo að ég verði í toppstandi
næstu árin. Það er stórt ár fram
undan hjá landsliðinu og mikið til að
hlakka til, svo það er nóg til að
hvetja mann áfram inn í endurhæf-
inguna.“
Risaséns á að fara á
þriðja stórmótið í röð
Talandi um landsliðið þá er nú
orðið ljóst hverjir andstæðingar Ís-
lands í EM-umspilinu verða, en
vegna þess hve seint umspilið er
munu Íslendingar ekki vita hvort
þeir verði með á EM fyrr en rúm-
um tveimur mánuðum fyrir mótið:
„Þetta er bara mjög sérstök
staða út af þessu nýja fyr-
irkomulagi. Þegar maður hefur far-
ið á EM og HM hefur maður vitað
það í október og getað hlakkað til í
átta mánuði, og allar ákvarðanir í
lífi manns mótast af þessum mótum.
Núna er þetta öðruvísi og mjög sér-
stakt að öllu leyti. Við lítum alla
vega á þetta sem risaséns á að fara
á þriðja stórmótið í röð og þangað
ætlum við. Þetta eru ekki auðveldar
þjóðir sem við munum keppa við og
í stökum leik getur allt gerst, og
þótt maður sé ekki kominn þangað í
huganum núna er maður með það á
bak við eyrað að vera í toppformi
þegar að þessum leikjum kemur.
Við vitum allir hversu skemmtilegt
er að vera á stórmótum og það er
alveg ljóst hversu mikið við viljum
upplifa það nokkrum sinnum í við-
bót. Þetta eru fínar borgir sem við
myndum heimsækja og ef við klár-
um okkar verður þetta skemmtilegt
sumar fyrir alla. Núna hugsar hver
og einn leikmaður um sig, það er
búið að vera mikið um meiðsli og
það ætla allir að vera orðnir heilir
og komnir í toppstand í mars, og þá
gerast pottþétt góðir hlutir,“ segir
Alfreð.
Með þrennu í snjó í Þýskalandi
en óviss með Laugardalsvöll
Alfreð skoraði síðast þrennu í
snjókomu á móti Mainz í febrúar,
og segir ekkert mál að spila fótbolta
á grasvöllum í Þýskalandi í miklum
kulda. Laugardalsvöllur er hins
vegar verri völlur en þeir sem Al-
freð spilar á í þýsku 1. deildinni, og
ekki upphitaður. Því er alls kostar
óvíst að hægt sé að spila á honum í
lok mars.
„Þetta er auðvitað allt annað
dæmi með upphitaðan völl. Mér
finnst oft kaldara hérna í Þýska-
landi en á Íslandi, og frostið miklu
meira, en vellirnir eru alltaf í topp-
standi og við æfum á grasi allt árið.
Því miður höfum við ekki þessa að-
stöðu á Íslandi og við þurfum að
finna út hvaða leið sé best. Þetta
má ekki vera hættulegt umhverfi
fyrir leikmenn. Þó að okkur langi
auðvitað mest að spila heima þá
verður að vera eitthvert vit í því.
Ég man að á móti Króatíu var völl-
urinn gríðarlega harður,“ segir Al-
freð, en sennilegt er talið að Kol-
beinn Sigþórsson hafi meiðst í
HM-umspilinu gegn Króatíu í nóv-
ember 2013 vegna þess að Laugar-
dalsvöllur var ekki í nægilega góðu
ástandi.
Eftir að hafa komið Íslandi á EM
og HM í fyrsta sinn dugðu Íslandi
ekki 19 stig í undankeppni EM að
þessu sinni til að komast beint á
mótið. Hvað finnst Alfreð um
frammistöðu íslenska liðsins í
keppninni?
„Það er hægt að skoða þetta frá
mörgum sjónarhornum. Ef menn
vilja horfa á þetta neikvætt er
örugglega hægt að benda á ýmis-
legt, en ef maður horfir á þetta já-
kvætt þá fengum við fjögur stig
gegn liðinu sem við vorum í beinni
samkeppni við, Tyrkjum. Við feng-
um því miður 0 stig gegn heims-
meistaraliði Frakka, sem er
kannski bara eðlilegt, og það má
segja að eina „klúðrið“ okkar hafi
verið tapið úti á móti Albaníu. Í tíu
leikja keppni er nokkuð gott að að-
eins einn leikur fari úrskeiðis. En
við viljum ekkert vera að fegra
þetta, við lentum í 3. sæti og það
var ekki markmiðið. Þar hjálpaði
ekki til að Tyrkir skyldu taka fjögur
stig gegn Frökkum. En ég sé margt
jákvætt í liðinu. Auðvitað er erfitt
að vera alltaf að bera liðið saman
við 2016-liðið. Fjórum árum síðar,
næsta sumar, væri óskandi að við
værum komnir með fleiri leikmenn
sem gerðu tilkall til sætis í byrj-
unarliðinu. Það eru menn hægt og
bítandi að komast nær, eins og
Mikael [Anderson] og Arnór [Sig-
urðsson], og fleiri banka á dyrnar,
en annars er þetta nokkurn veginn
sama liðið og það er bæði jákvætt
og neikvætt. Á heildina litið var
þetta góð undankeppni og undir
eðlilegum kringumstæðum vær-
um við með svipaðan fjölda
stiga og Tyrkir. Þeir skoruðu í
lok leikja gegn Andorra og Alb-
aníu, og við höfum verið óheppn-
ir með meiðsli eftir mikla heppni í
langan tíma. Við gerðum margt
gott, eftir ekki gott gengi í Þjóða-
deildinni sem varð til þess að marg-
ir afskrifuðu okkur og kölluðu eftir
allsherjar endurnýjun. Meginhlut-
inn af þessu liði er á besta aldri og
getur spilað saman næstu 3-4 árin,
ég er ekki í nokkrum vafa um það.“
Leiðinlegt slys en margt
að hlakka til á næsta ári
 Alfreð á hárréttri leið þegar öxlin fór úr lið  Erfir það ekki við Söyüncü
AFP
Markaskorarar Alfreð Finnbogason er markahæsti leikmaðurAugsburg síðustu ár og Robert Lewandowski marka-
hæsti leikmaður Bayern München og þýsku 1. deildarinnar. Þeir skoruðu báðir þegar liðin mættust í október.