Fréttablaðið - 29.08.2020, Síða 28

Ég er glaðvær að upplagi, mér þykir undurvænt um vini mína og ver miklum tíma í
að valdefla aðrar konur í íslenska
tónlistarbransanum. Ég á það
líka til að vera afar hreinskilin og
kaldhæðin en á sama tíma geri
ég mitt besta til að jafna það út
með eins mikilli blíðu og ég get,“
segir kaliforníska tónlistarkonan
og hljóðverkfræðingurinn Zöe
Ruth Erwin, spurð hver hún sé,
þessi kraftmikla kona sem kom til
Íslands upp á sitt einsdæmi til að
sefa sorgir og semja lög.
Vá, hér mun ég deyja
Zöe vissi lítið sem ekkert um
Ísland þegar hún keypti sér f lug-
miða hingað veturinn 2016.
„Þá var faðir minn nýfallinn frá
og ég nýhætt í löngu ástarsam-
bandi. Sú sára lífsreynsla gerði
mig eðlilega dapra en í stað þess
að leyfa því að éta mig upp tók ég
skyndiákvörðun um að ferðast til
lands sem ég hafði aldrei ímyndað
mér að ég ætti eftir að heimsækja.
Það var tilraun til að sjokkera
taugakerfið og skrifa heila plötu,“
segir Zöe sem ætlaði sér upphaf-
lega að dvelja á Íslandi í þrjár vikur
en var hér í þrjá mánuði og samdi
um áttatíu lög.
„Ég lenti í Keflavík á köldum
nóvemberdegi og man enn andar-
takið þegar ég steig út úr f lug-
vélinni og tók andköf þegar ég fékk
ískaldan gustinn framan í mig. Þá
hugsaði ég með mér: „Vá, hér mun
ég deyja“. Daginn eftir dreif ég
mig á kaffihús þar sem fólk sat við
kertaljós um hábjartan daginn og
las bækur yfir kaffibolla. Þá varð
ég gjörsamlega bergnumin og viss
um að hér vildi ég vera.“
Það sem gerir Zöe einmitt hvað
glaðasta er bóklestur í kertaljósum
og með kaffibolla við höndina.
Líka að flakka um íslenska náttúru
tímunum saman með dásam-
lega tónlist í eyrum en við þær
aðstæður semur hún flest sín lög.
„Náttúran og lestur eru mitt
brauð og smjör þegar kemur að
tónlistarsköpun. Að taka sér
drjúga stund í að stúdera munstur
í klaka sem brotnar á frosinni á,
að elta æðar á dauðu lauf blaði eða
hvert áin fer eftir að hún fellur
fram af fossbrún. Ég botna í alvör-
unni ekki í fólki sem semur tónlist
án þess að lesa bækur. Til að verða
góður höfundur verður maður að
lesa. Annað er eins og að segjast
vera atvinnumaður í fótbolta án
þess að hafa nokkurn tímann
horft á fótboltaleik,“ segir Zöe.
Saknar amerísks tacos
Zöe ólst upp í draumaborginni
Los Angeles þar sem fræga og
ríka fólkið hefur margt fundið sér
samastað.
„Ég held að það hafi verið eins
og hver annar staður að alast upp
í LA, maður verður svo vanur
borginni að allur stjörnufansinn
verður eðlilegur. Þó er varla til
jafn streituvaldandi staður til að
alast upp á og maður lærði ungur
að vera kappsamur og ná sem
lengst en það veldur því að maður
missir af því að lifa í núinu og
njóta umhverfisins,“ segir Zöe sem
saknar þess helst frá Los Angeles
að fá sér gott taco.
„Ég er vön því að geta ráfað á
milli úrvals sölustaða á skrýtnum
götuhornum og fengið mér besta
taco í heimi fyrir aðeins 200 kall!“
Zöe segist frá fyrsta degi hafa
fengið hlýjar móttökur hjá
Íslendingum.
„Ég elska Íslendinga. Ég er svo
lánsöm að hafa eignast dásam-
legan vinahóp og vera hluti af
samfélagi skapandi snillinga.
Að vera í andrúmslofti þar sem
fólk hefur ekki aðeins þau áhrif á
mann að vilja verða enn betri tón-
listarmaður og samverkamaður,
heldur líka betri manneskja; það er
ástæða þess að ég lít á Ísland sem
mitt eina heimili. Íslendingar og
Kaliforníubúar eiga svo sitthvað
sameiginlegt, eins og kaldhæðni
og almenna andstyggð á banda-
rískum stjórnmálum,“ segir Zöe
og hlær.
Mikilvægt að vera sjálfbjarga
Zöe er menntaður hljóðverk-
fræðingur.
„Ég held að ég hafi ákveðið að
læra hljóðverkfræði vegna þess að
þar vantaði konur og það er svo
mikilvægt að við konur séum fleiri
í tæknigeiranum. Ég hef alltaf haft
yndi af stærðfræði, lestri og tækni-
legum hlutum og því var verkfræð-
in frábær leið til að blanda þeim
áhugamálum saman við skapandi
verkefnin mín,“ útskýrir Zöe.
Hún segir mikilvægt að skara
fram úr á sem flestum sviðum
tónlistarsköpunar til að viðhalda
skapandi sjálfstæði.
„Það er frábært að vera góður
höfundur en ef maður getur ekki
tekið upp eða framleitt sín eigin
lög sjálfur er maður alltaf í þeirri
stöðu að reiða sig á smekk annars
framleiðanda eða hljóðverk-
fræðings sem svo setur sinn brag á
hljóm manns sem listamanns. En
eftir því sem maður er sjálfstæðari
og meira sjálf bjarga, því frjálsari
verður maður og þeim mun fleiri
möguleikar opnast.“
Zöe segist alltaf hafa verið tón-
listarunnandi enda alin upp af
foreldrum sem voru tónlistarfólk,
á sjöunda og áttunda áratugnum.
„Ég ólst því upp við að hlusta
á klassískt rokk, þjóðlagatónlist,
djass og blús. Ég komst hins vegar
ekki í kynni við íslenska tónlist
fyrr en eftir 1990 þegar Björk og
Sigur Rós birtust á bandaríska
markaðnum.“
Svarið verður alltaf já
Í vikunni kom út nýtt lag með
Zöe sem vinnur að plötu sem hún
hyggst gefa út á nýju ári.
„Ætli það sé ekki best að skil-
greina tónlistina mína sem þunga
og djúpa en hún hefur líka í sér
fíngerð blæbrigði, sérstaklega nýja
efnið mitt. Þar reyni ég að tefla
fram fleiri litum, ljósi og gleði á
milli dimmu skýjanna til að skapa
dýnamíska tónlistarupplifun; ekki
bara í gegnum textana heldur líka
hljóðheiminn, áferðina og hljóð-
færaleikinn,“ segir Zöe.
Nýja lagið, Shook, fjallar um
umskipti og breytingar.
„Til er máltæki sem segir: „Þorst-
inn býr innra með mér. Vatnið er
þar líka“. Það er stemningin í text-
anum og tónverkinu. Að við séum
gæslumenn okkar eigin hindrana
og lausna. Við höfum alltaf val og
búum ávallt yfir kraftinum sem
þarf til að velja,“ útskýrir Zöe um
innihald nýju lagasmíðinnar.
Sjón er sögu ríkari þegar kemur
að litríku og skemmtilegu mynd-
bandinu við lagið.
„Vídeóið er 100 prósent sköpun-
arverk hinnar frábæru Birtu Ránar
Björgvinsdóttur. Hún kom til mín
annan hvern dag með brjálaðar
hugmyndir og á endanum sagði
ég: „Gerðu það sem þú vilt. Svarið
verður alltaf já.“ Ég hef nefnilega
þá trú að ef maður leyfir skapandi
fólki að gera óhindrað það sem það
er best í þá kemur það með allt sitt
besta að borðinu.“
Ísland hefur smeygt sér inn í
tónsmíðar Zöe.
„Það dylst engum hvernig
íslensk náttúra hefur haft áhrif á
hljóðheim minn, í samanburði við
hvernig hann var áður. Raddstíll-
inn hefur líka breyst og er miklu
frjálsari núna, sem og stíll hljóð-
hönnunar minnar sem hefur orðið
fyrir íslenskum, loftkenndum
áhrifum.“
Líf fullt af ást og sköpun
Zöe nýtur þess að lifa á meðal
Íslendinga á þessari eyju í norðri.
„Sú lífsreynsla sem ég upplifi
aftur og aftur og finnst enn svo
ótrúlega sjarmerandi og fyndin
er að fara í sundlaugina á hverjum
morgni og hlusta á tal eldri kvenna
sem sitja þar tímunum saman og
ræða heimsmálin. Þar sem ég hef
ekki enn fullt vald á íslenskunni
skil ég bara brot af því sem þær
segja en ég fæ mikið út úr því að
hlusta á þær, sérstaklega þegar
þær eiga í heitum samræðum um
pólitíkina vestan hafs,“ segir Zöe
og hlær dátt.
Hún elskar að fara út úr bænum
í langar gönguferðir og vera þar
dögum saman.
„Það fyllir hjarta mitt og huga
og er sá tími sem er mest skapandi
þegar kemur að lagasmíðum. Ef ég
væri um helgi í Los Angeles færi ég
í göngu í gegnum Malibu Canyon
og endaði á ströndinni með taco
og góða bók,“ segir Zöe sem elskar
líka að elda indverskan mat frá
grunni.
„En ég er afar slöpp í namminu.
Ég hef alltaf kostið salt umfram
sætt en nýt þess að fá mér sneið af
gómsætri súkkulaðiköku sem búið
er að skreyta með nafninu mínu
úr kökuskrauti,“ segir Zöe sem er
morgunhani að eðlisfari en finnst
þó gaman að vaka fram eftir um
helgar.
„Ég get líka horft á bíómynd-
irnar The Shining og Beetlejuice
milljón sinnum án þess að fá leiða
á þeim,“ segir hún kát.
„Mitt eina takmark er að lifa lífi
sem er fullt af ást og sköpun, og að
vera þakklát fyrir hverja einustu
lífsins gjöf og kraftaverk í kringum
mig.“
Zöe segir Ísland veita sér mikinn innblástur og hafa breytt bæði rödd sinni og tónsmíðum. Hún sækir mikið í náttúruna og bóklestur til að fá hughrif og gefur sér tíma til að nostra við minnstu smáatriði. FRÉTTABLAÐIÐ/ANTON BRINK
Ég botna í alvöru
ekki í fólki sem
semur tónlist án þess að
lesa bækur. Til að verða
góður höfundur verður
maður að lesa. Annað er
eins og að segjast vera
atvinnumaður í fótbolta
án þess að hafa nokkurn
tímann horft á leik.
Framhald af forsíðu ➛
Þórdís Lilja
Gunnarsdóttir
thordisg@frettabladid.is
2 KYNNINGARBLAÐ FÓLK 2 9 . ÁG Ú S T 2 0 2 0 L AU G A R DAG U R