Saga - 2019, Blaðsíða 179

fyrir nema Háskóla Íslands í fornleifafræði.15 Þá var safnið í forsvari
fyrir uppbyggingu Urtagarðs í Nesi í samstarfi við bæjarfélagið,
Garðyrkjufélags Íslands og Lyfjafræðisafn.16 Garðurinn er byggður
upp á sögulegum grunni og er hluti af sérstæðri sögu Seltjarnarness
sem vöggu nútímalækninga og lyfjagerðar á Íslandi.
Urtagarður í Nesi er ágætt dæmi um hið góða samstarf sem
Lækningaminjasafnið átti við Lyfjafræðisafnið. Mikill styrkur var að
því að þau tvö söfn sem störfuðu á sviði heilbrigðissögu á Íslandi
voru bæði staðsett í Nesi. Það styrkti starf beggja safnanna og tölu-
verðar væntingar voru uppi af hálfu Lækningaminjasafns um sam-
starf við áframhaldandi innviðauppbyggingu og við söfnun, skrán-
ingu, rannsóknir og miðlun lækningaminja. Árið 2012 var sú vinna
sem fram fór í Bygggörðum farin að skila sér í ágætri yfirsýn yfir
safneignina, styrkleika hennar og veikleika. Vænta má að sú yfirsýn
hefði fljótlega leitt af sér samstarf við önnur söfn á landinu um
markvissari skráningu og söfnun lækningaminja. Þar skipti tilvist
gagnagrunnsins Sarps höfuðmáli og því var Lækningaminjasafnið
farið að beina sjónum að því hvernig hann gæti betur nýst sem tæki
til þess að ná utan um þennan flokk flókinna minja.17 Augljóst var
að tvennt myndi auðvelda umsýslu með lækningaminjum á Íslandi.
Annars vegar að bæta við gagnagrunninn flokkunarkerfi fyrir lækn-
ingaminjar sem gæti fangað blæbrigði þeirra. Undirbúningur að
þessu var hafinn og þá var horft til samstarfs við norræn lækninga-
minjasöfn sem þegar hafa hannað flokkunarkerfi fyrir lækninga-
minjar. Hins vegar var nauðsynlegt að auka gæði þeirra upplýsinga
sem skráðar voru um minjar í Nesstofusafni og þannig tryggja að
þekking um notkun þeirra varðveittist.
Lækningaminjasafn Íslands var ábyrgðarsafn og ætlað það hlut-
verk að leiðbeina um varðveislu minja. Á þeim forsendum voru
viðræður að hefjast við Minjanefnd Landspítalans um aðstoð við að
skipuleggja og meta varðveislugildi umfangsmikils safns lækninga-
í minningu safns 177
15 Vef. „Samningur um sköpun kennsluvettvangs fyrir nemendur í fornleifafræði
við Háskóla Íslands“, Seltjarnarnesbær, http://www.seltjarnarnes.is/frettirog-
utgefidefni/frettir/nr/6182, 30. júlí 2019.
16 Urtagarður í Nesi. Plöntuvísir. Ritstj. Lilja Sigrún Jónsdóttir (Seltjarnarnes:
Urtagarður í Nesi 2010).
17 Töng er ekki bara töng og pilla ekki bara pilla. Söfnun lækningaminja byggir á
sérfræðiþekkingu um notkun þeirra og sögulega þróun. Hvernig var notkun
áhalds háttað, hvenær var það notað og af hverjum? Hversu algengt var það?
Eru til eldri eða yngri útgáfur af áhaldinu? Ef ekki, hvers vegna?