Strandapósturinn - 01.06.2016, Page 87

85
Nokkru utar stendur lítill klettur fram úr bökkunum og heitir
hann Biskup (75). Efst á honum er áberandi strýtumynduð
hundaþúfa. Litlu utar taka við Torfvíkur (76). Upp af þeim var
áður rist torf og þótti gott til húsagerðar. Víkurnar eru tvær, Innri-
Torfvík (77) og Ytri-Torfvík (78), og á milli þeirra er breitt nafn-
laust nes. Ofan við Innri-Torfvík er klettahöfði sem nefnist Torf-
víkurhöfði (79).
Utan við Torfvíkurnar tekur við breitt nes. Þar heita Miðhús
(80). Þar mun hafa verið búið fyrir nokkrum öldum. Í Jarðabók-
inni 1706 er tekið svo til orða að þar hafi „til forna verið býli“ og
„munnmæli eru um að það býli skuli eyðilagst hafa af snjóflóði“. Í
ferðabók Ólafs Olaviusar eru nefnd Miðhús í Ingólfsfirði og þar
er sagt að þau hafi farið í eyði 1750–59. Þar segir einnig að Miðhús
hafi eyðst af skriðum og snjóflóðum og að þar væri byggilegt ef
bærinn yrði fluttur. Ólafur Olavius ferðaðist um Árneshrepp árið
1775. Svo er að sjá sem byggt hafi verið upp á Miðhúsum á fyrri
hluta átjándu aldar en um stuttan tíma. Síðan hefur ekki verið
búið þar. Á þessum stað er einna mesta snjóflóðahætta í landi
Munaðarness og hafa komið þar flóð sem engin mannvirki geta
staðist. Miðhúsatangi (81) er neðan við Miðhús. Á Miðhúsum
voru miklar tóftir sem jafnaðar voru út þegar tún var gert þarna
fyrir nokkrum árum. Enn þá sést þó til tófta utan við tún-
girðinguna og eru þær líklega af nausti. Á Miðhúsum var grund
með sjónum sem náði út að Stekknum og nefnist hún Miðhúsa-
grund (82). Grundin hefur nú verið brotin og er þar tún.
Fyrir utan og ofan Miðhús eru klettar sem heita Miðhúsaklif
(83). Það gengur skáhallt upp frá ströndinni. Í gegnum
Miðhúsaklif er grasi gróin laut og neðan við hana er nokkuð hár
klettastandur. Það var kallað „að fara í gegnum Klifið“ (84) eða
„að fara í gegnum Miðhúsaklifið“ þegar farið var um lautina.
Huldufólk átti að eiga bústað í Miðhúsaklifinu. Þar sem
Miðhúsaklifinu sleppir að innanverðu tekur við grasi gróinn
bakki sem nær inn á móts við Torfvíkurhöfða. Hann heitir Torf-
víkurbakkar (85). Utan við Miðhús er Stekkur (86) og eru þar
stekkjarhleðslur á grasgrund niðri við sjóinn. Stekkjarbakkar (87)
eru ofan og innan við Stekkinn en þar fyrir utan taka við Standa-
víkurbakkar (88) út að Standavíkurhöfða. Undan Miðhúsum eru
Miðhúsasker (89). Skammt þar utar með ströndinni er Stekkj-