Bændablaðið - 22.07.2021, Qupperneq 50

Bændablaðið | Fimmtudagur 22. júlí 202150
Um þessar mundir eru tíu ár
síðan fyrstu vefnaðarvörurnar
undir vörumerkinu Lagður fóru
á markað. Af þessu tilefni var efnt
til afmælishátíðar að Hólabaki í
Húnavatnshreppi á föstudaginn
síðastliðinn.
Það rigndi eins og hellt
væri úr fötu þetta síðdegið, en
Húnvetningar létu það ekki aftra
sér og fjölmenntu til að samfagna
Hólabaksfjölskyldunni. Boðið var
upp á heimabakaðar tertur og grill-
aðar pylsur, sem um 150 gestir gerðu
góð skil. Tónlistarmaðurinn Eyþór
Ingi mætti á svæðið og tók lagið fyrir
viðstadda af sinni alkunnu snilld.
Fjölbreytt starfsemi
Hólabak er staðsett í hjarta Húnaþings.
Bærinn ber nafn sitt af Vatnsdalshólum
sem er kennileiti sem margir þekkja.
Á Hólabaki er búið með nautgripi og
hross, en jafnframt er þar starfrækt
fyrirtæki sem sérhæfir sig í framleiðslu
hágæða vefnaðar- og gjafavara.
Vörur fyrirtækisins eru seldar
undir vörumerkjunum LAGÐUR
og TUNDRA. Í lagerhúsnæði
fyrirtækisins er einnig rekin verslun.
Á Hólabaki búa þrjár kynslóðir.
Björn Magnússon og Aðalheiður
Ingvarsdóttir keyptu jörðina 1972
og hafa byggt upp og hlúð að síðan.
Ingvar Björnsson og Elín Aradóttir
hafa búið á Hólabaki ásamt börnum
sínum þremur, Aðalheiði, Ara og
Elínu, síðan 2013. Þau reka kúabúið í
dag, sem og gjafavöruframleiðsluna.
Þingeyskur hrútur í aðalhlutverki
Vörumerkið Lagður rekur uppruna
sinn til íslensku sauðkindarinnar,
nánar tiltekið til hrútsins Lagðs frá
Brún í Þingeyjarsveit. Lagður er því
hrútsnafn. Orðið er stytting á orðinu
ullarlagður, sem merkir lokkur
eða hnoðri af kindaull. Hrúturinn
Lagður var í eigu foreldra Elínar og
var fyrsta varan, sem framleidd var,
prýdd ljósmynd af Lagði. Fyrstu
vörur fyrirtækisins fóru á markað í
júlí 2011, en þá var starfsemin rekin
í smáum stíl meðfram annarri vinnu,
en eigendurnir áttu á þeim tíma
heima á Akureyri. Árið 2013 flutti
fjölskyldan að Hólabaki. Áherslan var
í fyrstu á framleiðslu púðavera með
ljósmyndum úr íslenskri náttúru, sem
f.o.f. var dreift í heildsölu í gjafavöru-
og ferðamannaverslanir.
Í dag hafa margar fleiri
vörurtegundir bæst við, s.s. svuntur,
rúmfatnaður, postulín, ýmis
eldhúsvarningur og fleira.
Fjörtíu og níu þúsund púðaver
Starfsemin hefur með tímanum þróast
mikið. „Við bjóðum nú fjölbreyttar
vörur og jafnframt hefur smásala hér
heima í búðinni, sem og í gegnum
vefverslunina okkar tundra.is aukist,“
segir Elín. Heildsala á púðaverum er
þó enn mikilvægur hluti starfseminnar,
þó svo að Covid hafi vissulega sett
strik í reikninginn á síðasta ári, enda
sala til ferðamannaverslana í algjöru
lágmarki. „Við höfðum sett okkur
það markmið að ná að selja fimmtíu
þúsund púðaver fyrir tíu ára afmæli
fyrirtækisins, en það náðist því miður
ekki. Ríflega fjörtíu og níu þúsund er
nú samt bara nokkuð góð tala og við
erum stolt af okkar árangri,“ bætir
Elín við.
Fegurðin við fætur þér
Íslensk náttúra og nánasta umhverfi
hefur frá upphafi verið innblástur
vöruhönnunar hjá fyrirtækinu.
Þannig hafa ljósmyndir af gróðrinum
í vegkantinum á heimreiðinni á
Hólabaki orðið að myndskreytingum
á rúmfatnaði og postulíni.
Fjallahringurinn hefur verið prentaður
á silkislæður og ljósmyndir af
húsdýrum og nálægum náttúruvættum
hafa ratað á púðaver og svuntur svo
eitthvað sé nefnt. „Við kappkostum
að nýta þjónustu innlendra aðila
hvað varðar aðföng og útfærslu eins
og kostur er. Stór hluti saumaskapar
er á höndum fagfólks á íslenskum
saumastofum. Þannig viljum við stuðla
að atvinnusköpun og tryggja yfirsýn.
Þetta er mjög mikilvægt í okkar huga,“
segir Elín.
Kostir og gallar við staðsetninguna
En er eitthvert vit í því að reka
gjafavörufyrirtæki í fámennu héraði á
landsbyggðinni? „Okkar staðsetning
hefur bæði kosti og galla. Þó
heimamarkaður sé vissulega lítill, þá
eigum við hér afar trygga viðskiptavini.
Almennt finnum við fyrir mikilli
velvild í garð okkar starfsemi. Hér eru
ekki starfandi mörg fyrirtæki á okkar
sviði og því auðvelt að vera sýnilegur,“
segir Elín.
„Fjarlægðin frá höfuðborgarsvæðinu
og stærri markaði, getur auðvitað
vera hamlandi að einhverju leyti,
sérstaklega þegar litið er til kostnaðar
og flækjustigs við að koma frá okkur
vörum og til okkar aðföngum. Við
höfum síðan í lok árs 2018 rekið
vefverslun og svo lengi sem Pósturinn
býður upp á þjónustu hér í héraðinu, þá
er þetta ekki verri staður en hver annar
fyrir slíkan verslunarrekstur.“
Bjartsýn á framtíðina
Nú virðist sem ferðaþjónustan
hérlendis sé aftur að komast á skrið.
„Við sjáum merki um aukna eftirspurn
hjá okkar viðskiptaaðilum. Við erum
í heildsöluviðskiptum við margar
ferðamannaverslanir og þar eru menn
greinilega að komast aftur í gírinn.“
Varðandi íslenskan gjafavörumarkað
þá er ekki ástæða til annars en bjartsýni.
„Heimilið er okkar griðastaður og þar
viljum við hafa í kringum okkur hluti
sem hafa tilgang og láta okkur líða
vel. Nú á tímum ofgnóttar held ég að
sífellt fleiri séu að verða meðvitaðri um
að velja sér frekar færri og vandaðri
hluti til að hafa í kringum sig. Eitt af
því sem heimsfaraldurinn hefur líka
kennt okkur er að líta okkur nær og
huga að því hvernig hægt er að styðja
við íslenska framleiðslu og efla okkar
eigið hagkerfi um leið,“ segir Elín að
lokum. /EA-ehg
Lely Center Ísland
Reykjavík Krókháls 5f – Sími 414 0000 – www.LCI.is
Akureyri Óðinsnes 2 – Sími 464 8600
ASPLA rúlluplast
frá 9.900.- + vsk.
Það hefur gengið mjög vel og
greinilegt að gestir eru ánægðir
með að eiga þess kosta að kaupa
veitingar hér,“ segir Ann-Marie
Schlutz, frumkvöðull á Egilsstöðum
í Fljótsdal. Hún opnaði nýverið
matarvagn handan árinnar á móts
við upphaf göngustígsins inn að
Hengifossi í Fljótsdal.
Hengifossárgil í Fljótsdal dregur
að sér fjölda gesta ár hvert. Það er
ekki síst Litlanesfoss, sem einnig
hefur borið nafnið Stuðlabergsfoss
sökum fagurra stuðla sem umlykja
fossinn, og Hengifoss í botni gilsins
sem er einn hæsti foss landsins. Fyrr
í sumar opnaði Ann-Marie matarvatn
við upphaf leiðarinnar, en vagninn
gengur undir nafninu Hengifoss Food
Truck. Ann-Marie á veg og vanda
að rekstri Sauðagulls ehf. sem þróað
hefur gæðavörur úr sauðamjólk, enn
einn draumur hefur að hennar sögn
ræst með rekstri matarvagnsins. Þar
verður hægt að gæða sér m.a. á súpu,
vöfflum, sauðamjólkurís og heitum
og köldum drykkjum.
Allt seldist upp
Matvara sem er mikið til úr stað-
bundnum og ferskum hráefnum
sem framreidd eru af ástríðu og
kjörin í maga eftir góðan göngutúr
upp gilið. „Það seldist allt upp hjá
mér einn sunnudaginn, m.a. allur ís
sem ég var búin að framleiða. Það
er greinilegt að fólk er
meira en til í að prófa
sauðamjólkurísinn
og það á líka við um
börnin sem mér finnst
alveg frábært,“ segir
Ann-Marie.
„Fólk er ánægt með
að eitthvað sér að ger-
ast við Hengifoss, það
koma margir þar að
og nú loks er hægt að
kaupa þar veitingar.“
Bæði Íslendingar og
útlendir ferðamenn
hafa undanfarið verið
á svæðinu að hennar sögn.
/MÞÞ
Matarvagn settur upp við leiðina að Hengifossi:
Góðar viðtökur og ánægja með framtakið
Ann-Marie á Egilsstöðum á Fljótsdal hefur komið upp matarvagni við upphaf gönguleiðar að Hengifossi.
LÍF&STARF
Lagður 10 ára:
Húllumhæ á Hólabaki
Elín Aradóttir og Ingvar Björnsson,
eigendur gjafavörufyrirtækisins á
Hólabaki.
Ari Ingvarsson og Ari Teitsson sáu um að grilla fyrir gesti.
Eyþór Ingi tók lagið við góðar undirtektir.