Faxi - 01.12.2021, Síða 2

2 FAXI
Útgefandi: Málfundafélagið Faxi, Keflavík
Ritstjóri: Svanhildur Eiríksdóttir, sími 894 5605,
netfang: svei@simnet.is
Blaðamaður: Dagný Maggýjar
Blaðstjórn: Eysteinn Eyjólfsson formaður, Jóhann
Friðrik Friðriksson, Ríkharður Ibsen, Kristinn Óskarsson,
Hannes Einarsson, Kristján Jóhannsson og Stefán B. Ólafsson.
Öll prentvinnsla: Stapaprent ehf. Vesturbraut 8, 230 Reykjanesbær
sími 421 4388, netfang: stapaprent@gmail.com
Netfang vegna auglýsinga: eysteinne@gmail.com
Auglýsingasími: 698 1404.

Forsíðumynd: Þráinn Kolbeinsson fyrir SSS.
1. tölublað - 81. árgangur - 2021
Al l i r myndatextar í þessu og öðrum heftum
Faxa eru b laðsins nema annað sé tek ið f ram.
Árið hefur sannarlega verið viðburðaríkt
fyrir okkur Reyknesinga. Óróinn sem við
höfðum nokkurn veginn vanist var eftir
allt fyrirboði eldgoss sem hófst með krafti
í Geldingadölum 19. mars sl. Þegar þetta
er ritað hefur óvissustigi við gosið verið
aflétt. Áfram verður þó fylgst með þróun
atburða og almannavarnastig endurmetið
reglulega. Fólki er bent á að fara varlega á
svæðinu, en í samtali við Boga Adolfsson
formann Björgunarsveitarinnar Þorbjarnar
í Grindavík kom fram að nokkur hundruð
manns ganga um svæðið á degi hverjum.
Við gerum þessum atburðum nokkur skil í
blaðinu með viðtali við áðurnefndan Boga,
með göngufrásögn á gosslóðum og viðtali við
Sigríði Hagalín Björnsdóttur sem gaf út skáld-
sögu um eldgos á Reykjanesi um það leyti sem byrjaði að gjósa.
Hún heitir Eldarnir og rímar sem betur fer ekki við reynslu
okkar af gosinu við Geldingadali. Það varð fljótlega ljóst að það
yrði ekki skaðræðisgos.
Athygli okkar beinist ekki síður að konu sem hefur gert góða
hluti í íþróttaheiminum á þessu ári, Elsu Pálsdóttur kraft-
lyftingakonu sem hefur sett fjölmörg Íslands- og heimsmet í
hnébeygju og réttstöðulyftu. Þó hún hafi verið íþróttakona um
langt skeið er stutt síðan hún byrjaði að æfa klassískar lyftingar
af krafti og hefur náð undraverðum árangri á stuttum tíma.
Framundan eru fleiri mót og það verður gaman að fylgjast með
árangri Elsu þar.
Hvaða hlutverki gegnir skipulag í bæjarfélögum, hvað þarf að
hafa í huga og hvernig virkjum við íbúa svo allir geti átt samtal?
Með þessum vangaveltum hefst samtal við Jón Stefán Einarsson
arkitekt sem hefur verið ötull við að koma með hugmyndir að
uppbyggingu og skipulagi í Reykjanesbæ. Handbragð hans má
sjá víða í bænum.
Í Sögu húsanna verður nokkuð víða farið því fjallað verður um
húsnæði brunavarna og slökkviliðs á Suðurnesjum í gegnum
tíðina. Tilefnið er ekki síst glæsileg slökkvistöð Brunavarna
Suðurnesja við Flugvelli sem tekin var í notkun fyrir rúmu ári
síðan og var mikil bylting fyrir starfsemina. Slökkvistöðin við
Hringbraut/Flugvallarveg var ekki síður mikil bylting þegar hún
var tekin í notkun árið 1967.
Annað glæsilegt hús sem fær athygli og
umfjöllun í blaðinu er nýjasta skólabygging
Reykjanesbæjar, Stapaskóli þar sem á að
vera skemmtilegt, eins og kemur fram í
greininni.
Tveimur afmælum eru gerð skil í blaðinu, 75
ára afmæli Kaupfélags Suðurnesja og 60 ára
afmæli Leikfélags Keflavíkur. Afmælissýning
félagsins, Fyrsti kossinn, er enn í fullum
gangi en þar er á ferðinni verk eftir ungt par
sem um nokkurt skeið hefur sett svip sinn
á starfsemi félagsins. Einnig verður litið til
baka og rætt við Ernu Sigurbergsdóttur sem
er ein af stofnendum leikfélagsins Stakks, en
svo hét leikfélagið áður en það fékk nafnið
Leikfélag Keflavíkur. Einnig tókum við viðtal
við Guðnýju Kristjánsdóttur sem hefur verið einn af mátt-
arstólpum félagsins og fagnar 40 ára leikafmæli á árinu.
Vinirnir Sigurður Eyberg Jóhannesson og Pétur Gauti Val-
geirsson skrifuðu grein í Faxa þegar blaðið stóð á hálfrar aldar
tímamótum, Faxi fimmtugur og yngri kynslóðin þar sem þeir
töluðu m.a. um visku og mátt Faxa fyrir yngri kynslóðina undir
kjörorðinu Kemur þetta heim og saman? Nú rúmum þremur
áratugum síðar stinga þeir félagar aftur niður penna en í þetta
sinn sem miðaldra karlar enda Faxi orðin 81 árs.
Hér og nú pistilinn skrifar Sólborg Guðbrandsdóttir söngkona og
aðgerðasinni sem hefur lagt lóð sín á vogarskálarnar í barátt-
unni gegn ofbeldi, ekki síst kynbundnu og stafrænu ofbeldi. Hér
reifar hún tíðaranda dagsins í dag, talar um háskólagráðublæti
og hvað sé hægt að læra af yngri kynslóðinni.
Faxi er því sem fyrr stútfullur af áhugaverðu efni sem gott
verður að geta notið nú á aðventu og yfir jólahátíðina. Ég óska
lesendum gleðilegs árs og farsældar á nýju ári og vona svo
sannarlega að hækkandi sól muni færa okkur betri tíð þar sem
hægt verður að koma böndum á kórónaveiruna.
Svanhildur Eiríksdóttir
Ritstjóraspjall