Norræn jól : ársrit Norræna félagsins - 01.12.1986, Side 32

200 ára
Naumast hefur það farið framhjá nokkrum íslendingi að á þessu ári voru tvær
aldir liðnar frá því að Reykjavík öðlaðist kaupstaðaréttindi, enda hefur þess
verið minnst með ýmsu móti, m. a. veglegum hátíðahöldum borgarinnar
sjálfrar að áliðnu sumri. Afmælisdagurinn er venjulega talinn 18. ágúst því að
þann dag árið 1786 var gefin út konungstilskipun um kaupstaðarréttindin. Af
því tilefni birtist hér að neðan ljósmynd Páls Stefánssonar úr Reykjavíkurbók
bókaútgáfunnar Hagals, tekin yfir Tjörnina og miðbæinn og þær slóðir þar sem
talið er að landnámsbærinn hafi staðið. Byggð hefur verið í Reykjavík frá því á
ofanverðri níundu öld og hún hefur þá sérstöðu umfram aðrar höfuðborgir
Norðurlanda að hafa risið þar sem fyrsti landnámsmaðurinn tók sér bólfestu.
Yfir myndinni er sá heiði og hreini svipur sem löngum hefur heillað heimamenn
og gesti og borgarbúum tekst vonandi enn að varðveita um langan aldur í friði
og farsæld.
Hér á síðunni birtist einnig mynd af Hallgrímskirkju sem fullbyggð var á
afmælisárinu cftir nær hálfrar aldar byggingarsögu og vígð 26.-27. október.
Margir Norðurlandabúar hafa látið fé og gjafir af hendi rakna til kirkjunnar.