Skessuhorn - 17.08.2022, Blaðsíða 10

MIÐVIKUDAGUR 17. ÁGÚST 202210
Skaginn 3X hefur samið um að
útvega háþróaða vinnslulínu um
borð í nýjan, byltingarkenndan
togara fyrir norska útgerðarfé-
lagið Bluewild. Í tilkynningu frá
fyrirtækinu kemur fram að togar-
inn er hannaður af Ulstein Des-
ign & Solutions AS og smíðaður
af Westcon skipasmíðastöðinni í
Noregi. Hönnun togarans byggir
á því sem framleiðendurnir hafa
kallað Ecofive hugmyndafræði sem
felst í sjálfbærni, hagkvæmni og
gæðum. Ný skrúfutækni, ný með-
höndlun á trollum, vistvæn dæl-
ing á aflanum og nýstárleg vinnslu-
tækni mun þannig gjörbylta fram-
legð og vistspori togarans.
Tímamótasamningur
Heildarverðmæti samningsins er
rúmlega einn milljarður íslenskra
króna. „Samningurinn markar
tímamót fyrir okkur,“ segir Ragnar
A. Guðmundsson, yfirmaður
sölumála hjá Skaganum 3X fyrir
Skandinavíu og Evrópu. Ragnar
hefur leitt þetta verkefni fyrir hönd
Skagans 3X. „Við höfum unnið
náið með Bluewild teyminu síð-
astliðin tvö ár. Ótal fundir og til-
raunir skiluðu þessum árangri og
við höfum þróað nýja og spennandi
kerfislausn sem samrýmist virkilega
vel stefnu þeirra,“ segir Ragnar.
Nýsköpun tilnefnd
til verðlauna
Sjálfbærni er kjarninn í Ecofive
nálguninni sem Bluewild og sam-
starfsaðilar þeirra hafa þróað. Hún
er hugsuð sem leið til að framleiða
vörur í hæsta gæðaflokki með sem
minnstum orkukostnaði. Verkefnið
er tilnefnt til Nýsköpunarverðlauna
Nor-Fishing Foundation 2022.
„Það er ótrúlegt tækifæri að vera
valinn til að afhenda lausn í nýsköp-
unarverkefni eins og Ecofive. Kerf-
islausn okkar fellur ótrúlega vel að
kröfum viðskiptavinarins um sjálf-
bærar veiðar, hámarks nýtingu og
aukið verðmæti bæði afurða og
aukaafurða,“ segir Ragnar.
Nýjar leiðir
til sjálfbærni
Þegar aflinn mun koma um borð
í nýja skipið er hann fluttur beint
í vatnsfyllta birgðatanka sem eru
fyrir neðan sjólínu. Þar er hann
geymdur lifandi áður en hann er
fluttur í verksmiðjuna. Aflinn er
færður á efra verksmiðjudekkið
með yfirþrýstingslosun sem kemur
í veg fyrir hið dæmigerða tjón sem
getur orðið við notkun annars
konar dælingar. Vinnslukerfi Skag-
ans 3X tekur þar við og mun vinna
fiskinn í flök og bita. Einnig verður
heildstæð rækjulína um borð sem
mun vinna soðna lausfrysta rækju
sem og frysta iðnaðarrækju til frek-
ari vinnslu í landi. „Við leggjum
áherslu á gæði og hámarks afurða-
nýtingu,“ útskýrir Ragnar. „Þetta
þýðir að hver og einn fiskur fær
toppmeðhöndlun í öllu ferlinu, allt
frá lifandi fiski til frystra afurða.
Auk þess er kerfið hannað til að
nýta allar aukaafurðir til hin ýtrasta
til að hámarka verðmæti þeirra.“
Samvinna er
lykillinn að árangri
Skipið og öll kerfi þess eru hönnuð
og smíðuð af teymi sérfræðinga
frá Westcon skipasmíðastöðinni,
Ulstein Design & Solutions AS,
CFlow Systems, PTG og nú Skag-
anum 3X. „Við erum stolt af því að
viðskiptavinurinn hefur valið okkur
með í þetta verkefni og afar stolt af
því að vera hluti af þessum hópi,“
segir Ragnar. „Reynsla okkar af
íslenskum og alþjóðlegum fisk-
iðnaði hefur gert okkur kleift að
byggja upp teymi á heimsmæli-
kvarða. Okkar teymi leggur ítar-
lega vinnsluþekkingu, nýsköp-
unarhugsun og tæknilega sérfræði-
þekkingu til þessa verkefnis.“
Um Skagann 3X
Skaginn3X er fyrirtæki sem hefur
vaxið upp í sterku samstarfi við
íslenskan sjávarútveg og er nýstár-
legur hátækniframleiðandi á kæli-,
frysti- og vinnslukerfum fyrir
alþjóðlegan matvælaiðnað og í raun
alþjóðlegur leiðtogi í uppsjávar-
vinnslukerfum. Systurfyrirtæki
þess, Baader Ísland er innflytjandi,
framleiðandi og þjónustuaðili fyrir
Baader, Trio og Seac fiskvinnslu-
vélar. Öll fyrirtækin eru nú undir
einu þaki á Íslandi og að fullu í eigu
Baader sem er alþjóðlegur leiðtogi
í þróun og framleiðslu fiskvinnslu-
tækja. „Sameiginleg staðsetning og
stjórnun á Íslandi hefur það að mark-
miði að hraða samstarfi við atvinnu-
greinina með framúrskarandi þjón-
ustu og nýsköpun að leiðarljósi sem
mun nýtast sjávarútvegi á Íslandi og
alþjóðlega,“ segir í tilkynningu frá
Skaganum 3X.
mm/ Ljósm. og teikningar aðsendar
Eins og íbúar í Borgarnesi hafa orðið
varir við standa nú yfir framkvæmdir
við Borgarbraut á milli Böðvarsgötu
og Egilsgötu. Verið er að endurnýja
fráveitulagnir, hitaveitu- og vatns-
lagnir ásamt því sem yfirborð götu
og gangstíga verður endurnýjað.
Gatan er því lokuð og umferð beint
um eina hjáleið sem sérstaklega var
lögð vegna þessa; yfir Kveldúlfsvöll og
um Berugötu. Upphaflega stóð til að
hjáleið vegna þessa verkefnis í gamla
bæjarhlutanum yrði um Böðvars-
götu, Þórólfsgötu og Sæunnargötu,
en því var mótmælt m.a. af íbúum
við göturnar, fagaðilum og bif-
reiðastjórum. Því ákvað byggðarráð í
sumar að leggja fyrrnefnda hjáleið yfir
Kveldúlfsvöll og um Berugötu.
Í tilkynningu frá byggðarráði fyrr í
sumar sagði að markmiðið með þessari
hjáleið væri að draga úr umferð-
arþunga sem annars lægi allur um
Böðvars götu, Þórólfsgötu, Sæunnar-
götu og Bjarnarbraut. „Um er að ræða
vandasama ákvörðun þar sem horft
var til fjölmargra þátta en þar vega
öryggismálin þyngst,“ sagði í bókun
byggðarráðs. Íbúi við Berugötu, sem
hafði samband við ritstjórn, er hins
vegar allt annað en sáttur við hvernig
staðið er að stýringu umferðar um
götuna og telur umferðina ógn við
öryggi. Auglýstur umferðarhraði
væri vissulega 20 km/klst en hraði
umferðar væri þó mun meiri. Við-
komandi segist ekki hafa fengið svör
við athugasemdum og fyrirspurnum
hjá sveitarfélaginu. Segir að íbúum
hafi í sumar verið kynnt þessi fram-
kvæmd þannig að um hringakstur yrði
að ræða, að umferð í aðra áttina yrði
beint um Berugötu en í hina áttina
yrði henni beint um Sæunnargötu,
Þórólfsgötu og Böðvarsgötu. Við
það hafi hins vegar ekki verið staðið
og allri umferð beint um götuna hjá
þeim. Íbúi þessi segir umferðahraða
alltof mikinn með tilheyrandi hættu
fyrir börn og aðra gangandi umferð.
„Nú er innan við vika í að grunn-
skólinn hefji starfsemi sína og þá stór-
eykst umferð gangandi fólks þarna
um. Það er algjört lágmark, að mínu
mati, að þarna verði settar upp hraða-
hindranir þannig að raunhraði verði
20 km/klst og helst sett upp ljós sem
sýna ökumönnum raunhraða. Þá er
mönnuð gæsla lífsnauðsynleg þegar
skólabörnin bætast við á leið sinni í
grunnskólann,“ segir þessi íbúi við
Berugötu í samtali við Skessuhorn.
Þarf að sýna þolinmæði og
umburðarlyndi
Stefán Broddi Guðjónsson sveit-
arstjóri segir að framkvæmdir við
Borgar braut séu til þess að koma
veitumálum í neðri bænum á góðan
stað og þar með mikið lífsgæða-
mál fyrir íbúa. „Í þeim felst óneitan-
lega mikið rask fyrir íbúa og atvinnu-
líf. Á móti munum við fá nýjar lagnir
og betri götur. Þangað til stöndum
við frammi fyrir því að velja illskásta
kostinn varðandi miðlun umferðar
milli bæjarhluta. Það er svo sem ekk-
ert nýtt undir sólinni þar enda við-
fangsefni sem stjórnendur í þéttbýli
um allan heim þurfa að fást við þegar
framkvæmdir eru annars vegar,“ segir
Stefán Broddi. Hann segir það rétt
að fyrsta hjáleið hafi legið um langan
veg, um Böðvarsgötu, yfir holtið og
Sæunnargötu. „Sama hvernig á það
er litið er það enn verri kostur heldur
en sú hjáleið sem varð fyrir valinu. Ég
held að langflestir sem málið varðar
séu sammála því. Því miður bitnar
það á íbúum í botnlanganum við
Berugötu og við biðjum þá um að
sýna þolinmæði og umburðarlyndi.“
Hann segir að umferðarhraði hafi
síðan verið færður niður í 20 kíló-
metra um hjáleiðina. „Síðan það var
gert hefur aðeins einn aðili viðhaft
gagnrýni við mig á þessari útfærslu.
Þessi gagnrýni er málefnaleg og ég
held að við höfum sýnt að við erum
tilbúin að bregðast við. Nú styttist í
skólasetningu og þegar börn verða á
leið í skóla verður gangbrautarvörður
á staðnum en mér heyrist mikil
ánægja hafa verið með störf gang-
brautarvarðar á þessum stað síðustu
áratugi. Ég kannast ekki við að íbúum
hafi verið kynnt að áformað væri að
hjáleiðin yrði hluti af hringakstri. Ég
veit að sú hugmynd var rædd en náði
ekki lengra enda hefði hún líklega
engu breytt varðandi umferðarhraða.
Varðandi verkið sjálft þá heyrist mér
að nú sé búið að ljúka snúnum áfanga
er varðar fráveitumálin og brátt verði
því hægt að fjölga starfsmönnum í
framkvæmdavinnu. Það er allra hagur
að verkið gangi hratt. Borgarbyggð
á um tíunda hlut af verkinu og snýr
að endurnýjun gangstétta en erum á
reglulegum verkfundum með verk-
aðila,“ segir Stefán Broddi í samtali
við Skessuhorn. mm/ Ljósm. glh
Skaginn 3X gerir stóran samning við BlueWild
BlueWild teymið. Frá vinstri: Frank R. Myklebust, COO BlueWild, Helge Kittilsen,
CCO BlueWild, Ragnar A. Guðmundsson frá Skaganum 3X, Tore Roaldsnes CEO
BlueWild, og Gunnar Hessen verkefnastjóri BlueWild.
Skaginn 3X mun framleiða háþróaða vinnslulínu um borð í nýjan, byltingarkennd-
an togara fyrir norska útgerðarfélagið Bluewild.
Berugatan.
Telur ekki boðlegt hvernig staðið
er að umferðarstýringu um hjáleið
Horft til suðurs eftir hjáleiðinni um Berugötu.