Borgfirðingabók - 01.12.2015, Page 190
190
B O R G F I R Ð I N G A B Ó K 2015
Skúrinn var síðar lengdur og honum breytt. Strákar í öðrum endanum,
stelpur í hinum og kútageymsla á milli. Þá voru notaðir sundkútar
sem soðnir voru saman úr gúmmíslöngum. Gamall ungmennafélagi,
Þórarinn Magnússon, skósmiður í Reykjavík, framleiddi þá og seldi á
góðu verði til uppeldisfélags síns.
Eitthvað var reynt að gera við skúrinn. Vorið 1948 veitti sýslunefnd
til dæmis fé til endurbóta á búningsklefum og kaldavatnsleiðslu. Þó var
hann enn það lélegur þegar barnaskólinn tók til starfa að ekki var talið
fært að kenna börnunum að vetrinum, að óbreyttu. Skólanefndin bauð
fram efni úr barnaskólabyggingunni ef ungmennafélagið vildi lagfæra
skúrinn. Guðleif Andrésdóttir var í fyrsta árgangi barnaskólans, 1954-
55. Henni var minnisstætt, þegar Þórunn Eiríksdóttir ræddi við hana
vegna ritunar 30 ára sögu Varmalandsskóla, að fyrst þegar nemendur
fóru í gömlu laugina urðu þeir að klæða sig í og úr í jeppa Ólafs Ingvars-
sonar skólastjóra. „Búningsklefarnir voru ónothæfir, ekki hægt að loka
dyrunum, engir snagar og engin upphitun. En þetta var lagað um vetur-
inn.“
ÞRENGIST UM
Ekki var gengið frá samningum um lands- og hitaréttindi fyrir sundlaug-
ina til framtíðar áður en hún var byggð. Fyrir 1930 var engin leiga greidd
fyrir stæði gömlu torflaugarinnar eða heita vatnið í hana en stundum var
greitt smávegis gjald fyrir hestabeit. Eftir að nýja sundlaugin var byggð
mun þáverandi eigandi og ábúandi Stafholtsveggja, Björn Ólafsson,
hafa ákveðið að árleg leiga fyrir land og hita skyldi vera 50 krónur og
ungmennafélagið samþykkt það.
Ungmennafélagið reyndi strax eftir að laugin var opnuð að ná samn-
ingum við Björn um land við laugina til að byggja steinsteypta skúra.
Samn ingar tókust ekki. Síðar var farið að ræða um félagsheimilisbyggingu
í tengslum við laugina enda sáu ungmennafélagar fram á að missa aðstöðu
sína á Hlöðutúnsholti þegar skólinn flytti annað. Svo bættust við ýmsar
hugmyndir, eins og um íþróttavöll og ýmsa aðstöðu í kringum laugina,
áhorfendasvæði, sólbaðssvæði, svæði til að lengja laugina og fleira.
Nýir eigendur jarðarinnar ljáðu heldur ekki máls á að láta meira land.
Samkomuhúsdraumurinn var sannarlega mikil hugsjón hjá mörgum
fél ags mönnum og brýndu þeir forystu félagsins ákaft til að gera eitthvað
í málinu.