Verktækni - 2019, Síða 23

23

Aðferðafræði
Þessi rannsókn var framkvæmd annars vegar með greiningu á ritrýndum greinum til að finna fyrri
rannsóknir á þessu sviði og hins vegar með greiningu á gögnum sem safnað var á þeim 12 árum sem
fyrsta árs námskeiðið „Tölvuteikning og framsetning“ var kennt í véla- og iðnaðarverkfræði við Háskóla
Íslands.
Staða þekkingar
Stuðst var við Web of Science gagnagrunninn, sem hefur sérstaka stöðu í vísindasamfélaginu og er
viðhaldið af Clarivate Analytics, þegar leitað var að fyrri rannsóknum á tengslum vendikennslu og
árangurs nemenda. Leitað var að greinum með tveimur leitarskilyrðum. Skilyrðin sem notuð voru við
fyrri leitina voru:
TS = (Student* NEAR (perc* OR asses* OR measur* OR eval*) AND ((revers* OR flip* OR invert*) NEAR/2
(classroom* OR teach*) )) AND SU=("EDUCATION SCIENTIFIC DISCIPLINES" OR "EDUCATION
EDUCATIONAL RESEARCH").
Leitin skilaði 83 niðurstöðum (6. júní 2016). Leitarskilyrðin sem notuð voru fyrir seinni leitina voru:
TS = (((revers* OR flip* OR invert*) NEAR/2 (classroom* OR teach*)) AND engineering* ) AND
SU=("EDUCATION SCIENTIFIC DISCIPLINES" OR "EDUCATION EDUCATIONAL RESEARCH")
Leitin skilaði 16 niðurstöðum (6. júní 2016). Samanlagt fengust því 91 leitarniðstöður. Útdrættir þessara
greina voru lesnir með það að markmiði að finna greinar sem tengdust efni þessarar rannsóknar. Eftir
lesturinn fækkaði greinunum niður í 53 og stuðst var við þær við skrif þessarar greinar.
Gagnasöfnun
Til að sannreyna tilgáturnar þá voru notuð þrjú sett af gögnum. Gögnin komu frá 12 ára sögu fyrsta árs
verkfræðinámskeiðs í tækniteikningu. Á árunum 2004-2016, þá var fjöldi nemenda í lokaprófi á bilinu 70
og 90, samtals 945 nemendur öll árin. Flöktið í fjölda nemenda sem þreyttu lokaprófið á hverju ári má
rekja til margra þátta; t.d. fjölda nemenda sem hefja nám í verkfræði á hverju ári og fjölda nemenda sem
hætta námi á fyrsta ári. Það má benda hér á að þar sem engin skólagjöld eru innheimt í Háskóla Íslands –
einungis skráningargjöld – þá er mögulegt að skuldbinding nemenda sé ekki eins mikil og ef þeir greiddu
skólagjöld.
Öll 12 árin sá sami fyrirlesari um fyrirlestrana, skipulagi námskeiðsins var haldið óbreyttu, markmiðum
námskeiðsins haldið óbreyttum og kennslubókin (á ensku) var einnig sú sama. Skipt var þrisvar um
aðstoðarkennara á tímabilinu og komu þeir úr röðum fyrrverandi nemenda. Hluti af mati nemenda var 3
klukkutíma lokapróf þar sem nemendur voru prófaðir í teikniaðferðum. Á hverju ári höfðu nemendur
aðgang að lokaprófum síðustu ára og vikuverkefni hvers árs byggðu á lokaprófum síðasta árs.
Námskeiðið sitja nemendur í iðnaðar- og vélaverkfræði á öðru misseri (1. ár) í BS námi. Námskeiðið er 6
ECTS (150-180 klst.) og er haldið hvert vor og kennt á íslensku. Námskeiðið kynnir grunnhugtök og
aðferðir við gerð verkfræðilegra teikninga og framsetningu á tæknilegum upplýsingum. Í hverri viku voru
haldnir tveir fyrirlestrar (80 mín.) og tveir tölvuverstímar (80 mín.). Í 10 vikur unnu nemendur vikuleg
heimaverkefni sem skilað var útprentuðum. Nemendur gátu valið um að vinna verkefnin sem
einstaklingsverkefni eða hópverkefni í litlum hópi (2 til 3 nemendur). Verkefni voru metin til einkunnar af
aðstoðakennurum og skilað aftur í tölvuverstíma þegar unnið var að næstu verkefnaskilum.
Vikuverkefnin og lokaprófið voru á íslensku.
Árið 2015 var skipt yfir í vendikennslu. Hefðbundnu fyrirlestrunum var skipt út fyrir tveggja tíma
upptökur sem gerðar voru aðgengilegar á vefsíðu námskeiðsins. Upptökurnar samanstóðu af rödd