Stuðlaberg - 01.12.2016, Side 5

STUÐLABERG 2/2016 5
„Um ljósvakann loforðin svífa“
Hagyrðingamót austur á Jökuldal
Hagyrðingamót var haldið að Skjöldólfs­
stöðum á Jökuldal föstudaginn 28. október
síðastliðinn. Þar var þá haldið kótilettukvöld
með tilheyrandi skemmtiatriðum. Þau sem
mættu á pallinn voru öll sauðfjárbændur;
Andrés Björnsson á Gilsárvelli á Borgarfirði
eystra, Sigþrúður Sigurðardóttir á Brenni­
stöðum í Eiðaþinghá, Sólveig Björnsdóttir í
Laufási í Hjaltastaðaþinghá og Baldur Grét­
arsson á Kirkjubæ í Hróarstungu. Stjórnandi
var Ragnar Ingi Aðalsteinsson.
Ein spurningin sem lögð var fyrir hag­
yrðingana var þannig: Hvernig leggst vetur­
inn í þig? Andrés svaraði því á þessa leið:
Ég veit ekki á hverju veturinn lumar
að velta mér upp úr því reyni ég síst.
Hann gæti orðið snjóþyngri en síðasta
sumar
en samt er það bara ekkert víst.
Önnur spurning hljóðaði þannig: Hvað
finnst ykkur um það ef á að loka Reykjavíkur­
flugvelli?
Sigþrúður svaraði þannig:
Þetta er lífæð landans,
látið því málið kjurt.
Þeir mega fara til fjandans
sem flytja vilja hann burt.
Þessi samkoma var haldin kvöldið áður en
kosið var til Alþingis. Umfjöllun um flokka
og frambjóðendur var því nokkuð áberandi
þarna á pallinum. Meðal annars var spurt:
Hvað finnst ykkur um kosningaloforðin? Eru
þau stærri en venjulega?
Sólveig hefur að sögn fylgst lengi með
stjórnmálum á Íslandi og hún átti svar við
þessu:
Með frábærar hugmyndir fara þau
þarna inn
og fá vilja hljómgrunn á það sem að
í þeim blundar,
svo rembast þau eins og rjúpa við
staur um sinn;
rölta svo þegjandi út líkt og
barðir hundar.
Baldur orti líka um loforð frambjóðenda
og greip þar til samlíkingar úr fornum hey­
skapar háttum; var ekki bjartsýnn á gengi
þeirra sem voru í boði:
Um ljósvakann loforðin svífa,
loddarar fylla bekkinn.
Ég trúi' ekki að tindalaus hrífa
taki hér saman flekkinn.
Hagyrðingarnir fá bestu þakkir fyrir frá­
bæra skemmtun. RIA.
Frá vinstri: Baldur, Sigþrúður, Sólveig og Andrés.