Stuðlaberg - 01.12.2016, Qupperneq 31

STUÐLABERG 2/2016 31
Rabbarbarasulta Emblu
Embla Rún Hakadóttir, sem áður hefur
komið við sögu í Stuðlabergi, setti saman þessa
skemmtilegu uppskrift. Þó að hún sé hér sett
upp eins og tíðkast í matreiðslubókum má sjá
fyrir sér önnur línuskil og lesa uppskriftina sem
ljóð:
Ágæt sulta. Einstök. Rauð. Uppskriftin er spari.
Með kvöldmat og í kökur, brauð:
Kíló rabarbari
600 g af sykri (já! Sultan endist vikur)
200 g (en meira má) mjúkur púðursykur
Vanilludropar (vel full skeið, vandar keiminn
pínu. Sumir sleppa samt í neyð)
Safi úr appelsínu.
Rabarbarann reynist gott að rista í litla bita.
Saman allt er sett í pott og soðið. (Vægan hita.)
Hvatvísi
Sonnettutilraun
Ef lít ég yfir löngu farinn veg
og læt þar hugann reika fram og aftur
er furðulegt hve tunga mín er treg
og tyrfinn jafnvel loðinn stríðniskjaftur.
En misjafnt er hvað mönnum líkar best
því margir vilja brestum sínum leyna
og einkum mun þó ýmsum gagnast verst
loks endanlega hamingju að treina.
En ekki' er þar með sagt ég dómbær sé
á samlíf hér á landsins ystu nöfum
en stundum hefur farið betra fé
þar forgörðum á glæ með hvítum tröfum.
Ef tíkar- ennþá týrir ljós á -skari
þá tóri' ég þar í óðar- lygnu -vari.
Höfundur er Páll Helgason, fyrrverandi
kennari og organisti á Siglufirði.
Vísnagátur
Sigurgeir Jónsson, rithöfundur í Vest­
mannaeyjum, er liðtækur hagyrðingur. Hér
má líta nokkrar vísnagátur eftir hann:
Notað yfir myndamót,
margoft lögð í spilarann.
Flöt og köntuð flekabót,
fær og gabbað náungann.
Sundur fína fjöl þú tekur,
fríðleiksstúlka engri lík.
Frásögn góð sem gleði vekur,
gistihús í Reykjavík.
Stundum mjór og mikill er,
mjög úr jörð á vorin skýst,
hann í marga hringi fer,
heiti dagblaðs, svo er víst.
Undir þaki oft má sjá,
andlitsprýði mörgum hjá.
Þá er lykli þetta á
og þorskhausana prýða má.
Embla Rún Hakadóttir.