Stuðlaberg - 01.12.2016, Qupperneq 12

12 STUÐLABERG 2/2016
„Við fáum víst þrettán um jólin“
Dægurvísur Stuðlabergs eru að þessu sinni
um aðventuna og jólin. Bjarni Sigtryggsson
byrjar. Þetta kallast Jólavísa um VISA-jól:
Af fjöllunum skreiðast brátt fólin;
við fáum víst þrettán um jólin.
Fjölskyldan engist
er fjárhagur þrengist,
unz herðist að hengingarólin.
Ingólfur Ómar Ármannsson er á hefð­
bundnu nótunum:
Senn við höldum heilög jól
hress með bljúgu geði.
Þá færist yfir foldarból
friður, ró og gleði.
Guðmundur Víkingsson sendir lesendum
aðventukveðju með þessari hringhendu:
Lokast skólinn, ljósið dvín
lækkar sólarhnötturinn.
Fái ei kjólinn frúin mín
fagnar jólakötturinn.
Einar Thoroddsen minnist þeirra tíma
þegar fyrir kom að rafmagnið brást á örlaga­
stundu vegna álags:
Um jólin ertu á baki ber
beiskt það herma sögur
ef elektrissitíið fer
er telur klukkan fjögur.
Vignir Víkingsson yrkir undir fornyrðis­
lagi:
Laufa er skorið
af list brauð.
Börnin spennt
bíða jóla.
Bekrar við stall
bretta grönum
komir þú,
kær aðventa.
Jóna Guðmundsdóttir yrkir um matinn á
aðventunni:
Soðningu ljótt er að lasta
ég get lifað á skyri og pasta.
En átveisla er
á aðventu hér
sem áður hét jólafasta.
Við endum á vísu eftir Gunnar Kr. Sigur­
jónsson. Hann er augsýnilega tengdur inn í
nútímann:
Um jól er ætíð sælt að sjá,
þá sindrar eldsins skíman,
er börnin kveikja kertum á
— komið er „app“ í símann!
Stuðlaberg þakkar hagyrðingum og óskar
lesendum gleðilegra jóla.
RIA.
Hagyrðingar yrkja dægurvísur