Goðasteinn - 01.09.1966, Page 24

Árni Sigurðsson Mýrdal, en svo hét hann fullu nafni, var fæddur
á Giljum í Mýrdal í Vestur-Skaftafellssýslu 18. okt. 1872, en þar
höfðu forfeður hans búið mann fram af manni. Foreldrar hans voru
Sigurður Sigurðsson Mýrdal og kona hans Valgerður Jónsdóttir, en
Árni tjáði þeim, er þetta ritar, að nokkuru áður en hann lagði af
stað til Vesturheims hefði Sigurður faðir hans tilkynnt það í
Þjóðólfi, að hann hefði ákveðið að taka sér ættarnafnið Mýrdal.
Sumarið 1876 fluttizt Árni með foreldrum sínum vestur um haf
til Nýja íslands í Manitoba. Voru fyrstu árin þar foreldrum hans
og sjálfum honum mikil hörmungarár, því að þrjár systur hans dóu
þar úr farsóttum, bólusýki og skarlatssótt, á árunum 1876-78. Hefir
Árni lýst þeim atburðum á átakanlegan og eftirminnilegan hátt í
endurminningum sínum; en þær komu fyrst á ensku í Heimskringlu
(23. og 30. des. 1953 og 6. jan. 1954) og á íslenzku í Lögbergi-Heims-
kringlu haustið 1961. Eru þessar endurminningar, eins og annað,
sem frá hendi Árna kom, vel í letur færðar, greinagóðar og fróð-
legar, og bregða birtu bæði á þau æviár sjálfs hans, er þar um ræðir,
og einnig á landnámslíf og baráttu Islendinga vestan hafs.
Vorið 1880 fór Árni með foreldrum sínum suður til Pembina í
Norður Dakota og dvaldist þar, og víðar á þeim slóðum, þangað
til hann fluttist með þeim vestur að Kyrrahafi, til Victoriuborgar á
Vancouvereyjunni í British Columbia fylki í Kanada, í aprílmán-
uði 1887. Eftir sjö ára dvöl þar, lá leið hans til Point Roberts, og
átti hann þar síðan heima.
Var hann, ásamt Sigurði föður sínum, í hópi þeirra fimm fslend-
inga frá Victoríu, er fóru í landskoðun til Point Roberts vorið 1894,
og leizt svo vel á sig þar, að þeir festu sér þar land og fluttu þang-
að búferlum stuttu síðar. Ekki voru þeir þó fyrstu íslenzku land-
námsmennirnir á þeim slóðum, því að fjórir íslendingar frá Bell-
ingham, Washington, fluttust þangað árið áður. (Um landnám
fslendinga á Point Roberts geta menn lesið í hinni skilmerkilegu
og fróðlegu frásögn Margrétar J. Benedictsson, „íslendingar á
Kyrrahafsströndinni," Almanak Ölafs S. Thorgeirsscniar 1925).
í þeirri ritgerð Margrétar er einnig að finna prýðisgóða og glögga
lýsingu á Róbertstanga, þessari farsælu byggð íslendinga, þar sem
22
Goðasteinn