Goðasteinn - 01.09.1966, Page 84

eyddur af uppblæstri, og Kampastaðir, eyddir af reimleika fyrir
löngu. Þetta haust settu Oddhverfingar þenna fénað á vetur:
Oddaprestur: 16 kýr, 4 naut, 9 kálfa, 85 kindur, 30 hross.
Sex hjáleigubændur: 38 kýr, 1 naut, n kálfa, 535 kindur, 70 hross.
Samtals er þá á fóðrum: 79 nautgripir, 620 kindur og 100 hross.
Almennt manntal fór fram á fslandi 1816. Þá bjó Steingrímur
Jónsson í Odda, sá er síðar varð biskup. Hjá honum voru þá 26
manns í heimili. Heimilisfólk sjö hjáleigubænda var samtals 36.
Kotin: Tröð og Dvergasteinn voru þá með öllu horfin úr byggð,
hafa ef til vill orðið sandfoki að bráð. Uppblástur hrjáði Oddalönd
lengi, austan og norðan bæja. En nú eru nefndar tvær nýjar hjá-
leigur, For og Ráðleysa. Fljótlega hverfur Ráðleysa úr skjölum.
en Strympa kemur í staðinn.
Að næstu átta árum liðnum, síðasta ár séra Steingríms í Odda,
var búfjárframtal Oddhverfinga þetta:
Oddaprestur: 16 kýr, 108 sauðkindur, 22 hross, fullorðin.
Sjö hjáleigubændur: 9 kýr, 166 kindur, 21 hross, fullorðið.
Kvígildi ca. 12 kýr, 48 ær. Búfjártala hjáleigubænda verður þá:
21 kýr, 214 kindur, 21 hross, fullorðið. Meðaltal sjö bænda: 3 kýr,
30 kindur, 3 hross. Þessar tölur sýna þó ekki rétta mynd af fátækt
sumra hjáleigubændanna. Tveir hinna sjö töldu fram meira en helm-
ing sauðfjárins. Við það minnkar meðaltal hinna um þriðjung, niður
í 20 kindur. Þó var sauðbú sumra til muna minna. Hinsvegar hafa
þeir líklega, flestir, verið mcð þrjár kýr á búi.
Árið 1834 voru bændur á Oddahjáleigum tíu. Heimamenn í
Oddahverfi voru þá 65.
Um 1790 er getið Oddahjáleigu, sem kölluð er Bakrangur. Þá
voru kotin Ráðleysa og Strympa hvorugt komin til sögu. Gæti
þetta því verið skyndinafn, eins og Ráðleysa ef til vill einnig var.
Er nú loks ótalin yngsta hjáleigan, Sólvellir. Guðmundur Einars-
son, ungur maður, alinn upp hjá vandalausum, reisti nýbýli 1930
yzt í Oddahögum. Hann skírði bæ sinn fögru nafni og hefur búið
þar þriðjung aldar, oftast einsamall.
Eru þá upptalin fjórtán nöfn Oddakota. En óvíst er, að verið
hafi fleiri en sjö í ábúð samtímis.
82
Goðasteinn