Sveitarstjórnarmál - 2021, Qupperneq 5

Ein heild í þína þágu
LÁTTU OKKUR SJÁ UM HÝSINGU
OG REKSTUR TÖLVUKERFA
FYRIR ÞITT FYRIRTÆKI
www.trs.is - 480-3300
FORYSTUGREIN
Ríkisstjórn Vinstri grænna, Sjálfstæðisflokks og Framsóknar hlaut skýrt umboð kjósenda
til áframhaldandi stjórnarsetu í kosningunum sem nú eru nýafstaðnar. Þegar þetta er
skrifað liggur ekki fyrir hvernig komandi ríkisstjórn verður skipuð en næsta líklegt má
telja að hún verði ekki svo mjög frábrugðin þeirri sem við höfum þekkt undanfarin fjögur
ár enda helstu leikendur á sviðinu þeir sömu og áður. Það vekur þó athygli að rétt
um helmingur þingmanna er nýr á Alþingi og því greinilegt að endurnýjun þingmanna
er jafn hröð og í sveitarstjórnum þar sem helmingur sveitarstjórnarmanna hefur verið
nýr undanfarnar tvennar kosningar. Þessi mikla endurnýjun er bagaleg og nokkuð
ljóst að það verður að leita allra leiða til að reynsla og þekking þingmanna sem og
sveitarstjórnarmanna nýtist betur og lengur en nú er reyndin.
Allir þingmenn fengu eftir kosningar póst frá sambandinu þar sem gerð er grein fyrir
mikilvægi góðs samstarfs milli ríkis og sveitarfélaga og að skilningur sé til staðar á þeim
fjölbreyttu verkefnum sem sveitarfélögin sinna. Er það von okkar sveitarstjórnarmanna
að Alþingismenn hafi þessar áherslur til hliðsjónar í störfum sínum og muni um leið að
þessar áherslur voru mótaðar af fulltrúum allra sveitarfélaga og hafa því mikið vægi við
stefnumörkun í landinu.
Ég vænti þess að í ríkisstjórnarsáttmála sjáist þess merki að Alþingismenn hafi kynnt
sér þær áherslur sem sveitarstjórnarstigið vinnur eftir. Ég ætla einnig að trúa því að
allir þingmenn geri sér glögga grein fyrir mikilvægi þess að sveitarfélögum séu tryggðir
nauðsynlegir tekjustofnar svo þau geti veitt þá þjónustu sem lögboðin er. Öflug
sveitarfélög eru hryggjarstykkið í stjórnsýslu landsins og ein meginstoð velferðar,
lýðræðis og mannréttinda í landinu.
Við sveitarstjórnarmenn þekkjum það best hversu illa hefur oft tekist til við að
kostnaðarmeta lög og reglugerðir með tilheyrandi útgjaldaauka fyrir sveitarfélögin.
Við slíkt er ekki hægt að una enda hefur Sambandið beitt sér af krafti gegn ýmsum
þeim breytingum sem komnar hafa verið á rekspöl ef að ekki hefur legið fyrir ítarlegt
kostnaðarmat og viðbótar fjármunir hafi þeir reynst nauðsynlegir.
Það er mikilvægt að allir ráðamenn þjóðarinnar geri sér grein fyrir því að Samband
íslenskra sveitarfélaga er ekki almennur hagsmunaaðili sem velja má að sniðganga
að vild heldur er Sambandið lögformlegur samskiptaaðili milli ríkis og sveitarfélaga.
Sveitarfélögin eru stjórnsýslustig og veita ásamt ríkinu íbúum mikilvæga þjónustu. Í
ljósi þessa verða samskipti ríkis og sveitarfélaga að vera góð og þessi tvö stjórnsýslustig
verða að vera samstíga við þróun og veitingu opinberrar þjónustu sem stenst
gæðasamanburð við það besta sem gerist í nágrannalöndum okkar.
Ég óska ráðherrum og ríkisstjórn farsældar í þeirra störfum með von um áframhaldandi
gott samstarf næstu árin.
Með ósk um
gott samstarf!
Aldís Hafsteinsdóttir
Formaður stjórnar Sambands íslenskra
sveitarfélaga