Morgunblaðið - 01.12.2001, Qupperneq 24

VIÐSKIPTI/ATHAFNALÍF
24 LAUGARDAGUR 1. DESEMBER 2001 MORGUNBLAÐIÐ
ÁRNI Bjarnason, skipstjóri frá Ak-
ureyri, var kjörinn forseti Far-
manna- og fiskimannasambands Ís-
lands á 40. þingi sambandsins í gær.
Árni hlaut 21 atkvæði í kjöri til for-
seta en Grétar Mar Jónsson, fráfar-
andi forseti, hlaut 15 atkvæði. Einn
kjörseðill var auður. Árni sagðist að
loknu forsetakjörinu vona að í kjöl-
far þingsins yrði hægt að sameina
krafta sambandsins og að félagar
þess yrðu samherjar að nýju.
Árni sagðist í samtali við Morg-
unblaðið boða breyttar áherslur í
samskiptum við útvegsmenn. „Ég
vil reyna að opna fyrir þann mögu-
leika að viðsemjendur geti byrjað að
ræðast við á eðlilegum nótum varð-
andi öll hagsmunamál stéttarinnar.
Staðan hefur því miður verið þannig
undanfarið að samskiptin hafa verið
í algeru lágmarki og aðilar aðeins
hist við samningaborðið. Ég vil
reyna að koma málum í þann farveg
að menn geti talað saman á mál-
efnalegum grundvelli. Það hlýtur að
vera til hagsbóta fyrir alla aðila.“
Á þinginu kom fram töluverð
gagnrýni á núverandi fiskveiði-
stjórnunarkerfi og sagðist Árni ekki
eiga von á öðru en að sú umræða
héldi áfram. „Þingið ályktaði um
fiskveiðistjórnunarmál á nokkuð
víðari hátt en oft áður. Ég skil það
þannig að menn séu tilbúnir að
skoða leiðir í núverandi kerfi í stað
þess að hafna því alfarið.“
Árni er skipstjóri á Akureyrinni
EA, frystitogara Samherja hf. á Ak-
ureyri, stærsta útgerðarfélags
landsins. Hann segist ætla að láta af
sjómennsku í bili og sinna forseta-
starfinu alfarið. „Það er útilokað að
ég geti sinnt bæði starfi forseta
FFSÍ og um leið starfað hjá Sam-
herja. Ég byrja reyndar á því að
fara út á sjó og klára næstu veiði-
ferð. Ég mun síðan stinga mér í
djúpu laugina strax eftir áramótin,“
sagði Árni.
Tilslökun skilar ekki góðu
veðri hjá útvegsmönnum
Grétar Mar Jónsson, fráfarandi
forseti, sagði að vissulega væri alltaf
svekkjandi að tapa kosningum.
Hann sagði að í þessari niðurstöðu
fælist að hluta til dómur á störf sín
undanfarin tvö ár en sagði að senni-
lega væri helsta ástæðan hvernig
kosningu hans bar að fyrir tveimur
árum.
Grétar sagðist ekki hafa trú á að
tilslökun í samskiptum við útgerð-
armenn ætti eftir að skila árangri.
„Það er langur vegur frá því að til-
slökun á okkar kröfum eigi eftir að
skila okkur góðu veðri hjá útvegs-
mönnum. Nýkjörinn forseti verður
vitanlega að vinna eftir samþykkt-
um þingsins og nú hefur þingið
hafnað núverandi fiskveiðistjórnun-
arkerfi og vill skoða önnur stjórn-
kerfi á fiskveiðum.“
Grétar sagðist síður en svo vera
hættur afskiptum af hagsmunabar-
áttu sjómanna og mun fylkja sér
bak við nýja forsetann. „Ég er
áhugamaður um sjávarútvegsmál og
mun halda áfram að láta skoðanir
mínar óspart í ljós. Ég tel að við
eigum að standa á bak við okkar
forseta og berjast með honum eins
og við kunnum og getum,“ segir
Grétar.
Í ályktun þingsins um stjórn fisk-
veiða segir að reynslan af uppbygg-
ingu botnfiskstofna, samhliða þeirri
fiskveiðistjórnun sem nú er og átti
að stuðla að því að tryggja til fram-
tíðar hámarksafla úr fiskistofnun-
um, sé slæm. Leggur þingið til að ef
ekki takist að laga núverandi kerfi
svo viðunandi sé verði teknar upp
aðrar veiðistýringaraðferðir sem
betur tryggi uppbyggingu og bætta
umgengni við botnfiskstofnana.
Þingið hafnar óbreyttri fram-
kvæmd núverandi fiskveiðistjórnun-
arkerfis og krefst þess að skýr
ákvæði um þjóðareignarrétt á auð-
lindum verði fest í stjórnarskrá.
Telur þingið að tryggja verði með
löggjöf að óumdeilt verði að fjölda
skipa, stærð og aflvísi fiskiskipaflot-
ans megi takmarka svo að unnt
verði að stjórna fiskveiðum í fram-
tíðinni. Strax verði tekið á brott-
kastsvandanum og leyft að landa
afla utan aflamarks. Þá telur þingið
að takmarka verði framsal veiði-
heimilda og auka veiðiskyldu á
hvert skip.
Árni Bjarnason skipstjóri kjörinn formaður FFSÍ
Verðum vonandi
samherjar að nýju
Morgunblaðið/Þorkell
Árni Bjarnason, nýkjörinn forseti Farmanna- og fiskimannasambands Ís-
lands, þakkar stuðninginn við lok 40. sambandsþings sambandsins í gær.
TAP Plastprents hf. fyrstu níu
mánuði ársins nam 62 milljónum
króna en tapið var 18 milljónir
króna á sama tíma í fyrra. Hagn-
aður þriðja ársfjórðungs yfirstand-
andi árs var 26 milljónir króna, en
tapið á fyrstu sex mánuðum ársins
nam 88 milljónum króna. Í tilkynn-
ingu Plastprents segir að bætt af-
koma skýrist annars vegar af mun
minna gengistapi á þriðja ársfjórð-
ungi og hins vegar sé sá ársfjórð-
ungur alla jafna sá besti í rekstri
félagsins.
Rekstrartekjur Plastprents hf á
á fyrstu níu mánuðum ársins 2001
námu 1.092 milljónum króna sem
er 35% aukning frá fyrra ári en þá
voru rekstrartekjur 804 milljónir
króna. Meginskýringin er kaup fé-
lagsins á meirihluta í Akoplastos
hf. í lok sl. árs.
Rekstrargjöld félagsins hækk-
uðu eins og tekjurnar um 35% milli
ára og námu þau 1.018 milljónum
króna á fyrri hluta árs en 756 millj-
ónum króna á sama tíma á fyrra
ári. Rekstrarhagnaður án fjár-
munatekna og fjármagnsgjalda var
74 milljónir króna en rekstrar-
hagnaður 48 milljónir króna árið
áður.
Fjármagnsgjöld umfram fjár-
munatekjur námu 145 milljónum
króna sem er 78 milljóna króna
nettóaukning frá fyrra ári. Skýrist
aukningin nær eingöngu af 96
milljóna króna auknu gengistapi
skulda í erlendum gjaldmiðlum frá
sama tímabili á fyrra ári. Hins veg-
ar hækkuðu verðbreytingatekjur
um 20 milljónir króna á milli ára.
Bætt afkoma hjá Plastprenti