Morgunblaðið - 24.10.2003, Blaðsíða 4

FRÉTTIR
4 FÖSTUDAGUR 24. OKTÓBER 2003 MORGUNBLAÐIÐ
KIRKJUÞING samþykkti í gær að
fela kirkjuráði að vinna að því að
greiðslur fyrir skírn og fermingar-
fræðslu verði teknar út úr gjaldskrá
fyrir aukaverk presta en færð inn í
föst laun þeirra í meðförum kjara-
nefndar. Átta önnur mál voru sam-
þykkt á þinginu í gær, en því lýkur á
morgun í Grensárkirkju.
Prestafélag Íslands fór fram á það
við kirkjuráð að endurskoða
greiðslur fyrir aukaverk presta og
fermingarfræðslu þar á meðal. Í
greinargerð með þingsályktunartil-
lögunni, sem flutt var af Karli Sig-
urbjörnssyni biskup, segir m.a. að
þegar lögin hafi verið sett árið 1931
um embættiskostnað sóknarpresta
og aukaverk þeirra hafi flest presta-
köll landsins verið álíka fjölmenn og
tekjur af aukaverkum svipaðar. Nú
sé íbúafjöldi í prestaköllum mjög
misjafn og tekjurnar þar af leiðandi
líka. Erlendis þekkist þessar
greiðslur ekki og hafi verið felldar
niður á Norðurlöndunum „fyrir
löngu“. Þess má geta að ný gjaldskrá
fyrir fermingarfræðslu tók gildi 1.
október sl. sem kveður á um 9.300
kr. greiðslu fyrir hvert fermingar-
barn.
Hlutkesti varpað í
jöfnu biskupakjöri
Af fleiri samþykktum málum
Kirkjuþings í gær má nefna að
kirkjuráði var falið, í samvinnu við
fræðslusvið Biskupsstofu, að móta
heildarstefnu í fræðslumálum þjóð-
kirkjunnar á grundvelli starfs-
mannastefnu og stefnumótunar.
Einnig var samþykkt að vinna að
svonefndri kærleiksþjónustu við
börn í leik- og grunnskólum.
Þá var samþykkt að breyta starfs-
reglum um kosningu biskups Íslands
og vígslubiskupa þannig að ef at-
kvæði falla jöfn, líkt og gerðist í síð-
asta kjöri Hólabiskups, þá skal
varpa hlutkesti en ekki vísa málinu
til kirkjumálaráðherra. Sömuleiðis
var samþykkt að allir þeir sem hafa
kosningarétt í slíku kjöri skuli vera í
þjóðkirkjunni.
Níu mál voru samþykkt á Kirkjuþingi í gær
Skírnir og fermingar
inn í föst laun presta „ÞETTA hefur
stundum verið
erfitt en afar
skemmtilegt,“
segir Ágúst Ólaf-
ur Ágústsson,
þingmaður Sam-
fylkingarinnar,
sem útskrifast
með tvær há-
skólagráður,
embættispróf í
lögfræði og BA próf í hagfræði, frá
Háskóla Íslands á morgun, en sam-
kvæmt óformlegri könnun innan
Háskólans hefur alþingismaður
ekki verið útskrifaður frá skól-
anum síðan Ragnhildur Helgadóttir
útskrifaðist fyrir um hálfri öld.
Ágúst Ólafur hóf nám í lögfræði
fyrir sex árum og bætti hagfræð-
inni fljótlega við. „Mér fannst þetta
passa vel saman og svo tengjast
þessar greinar mínu aðaláhuga-
máli, stjórnmálunum, eru pólitískar
greinar í eðli sínu og því alveg rak-
ið að blanda þeim saman.“
Í kosningunum í vor sem leið var
Ágúst Ólafur, sem er 26 ára, kjör-
inn á Alþingi, en hann segir að
hann geti vel hugsað sér að fara í
framhaldsnám erlendis í framtíð-
inni. „Ég held reyndar að það sé
ekki sérstök þörf á fleiri lögfræð-
ingum á þing en mér sýnist að það
sé mikil þörf á fleiri hagfræð-
ingum,“ segir hann og bætir við að
aðaltriðið nú sé að standa sig á Al-
þingi og leggja þar eitthvað af
mörkum. „Ég ætla samt ekki að
verða ellidauður í pólitík enda ekk-
ert öruggt í pólitík og því þarf mað-
ur að hafa útgönguleið, en ég vona
að þetta nám geti verið slík leið ef
til þess kemur.“
Þingmaður
útskrifast með
tvær háskóla-
gráður
Ágúst Ólafur
Ágústsson
HRAFN Jökulsson, formaður Hróks-
ins, segir að verið sé að endurskipu-
leggja Skákfélagið Hrókinn með það
fyrir augum að í framtíðinni verði
Hrókurinn fyrst og fremst barna-
skákfélag.
Hrókurinn efnir til skákhátíðar í
Vetrargarðinum í Smáralind um
helgina undir kjörorðinu Við erum ein
fjölskylda. Hrafn segir að félagið
standi á vissum tímamótum og nú sé
tækifæri til að láta langþráða og stóra
hluti gerast í íslensku skáklífi. „Við
höfum á undanförnum árum einbeitt
okkur að tvennu. Annars vegar að því
að byggja upp áhuga barna á skák og
hins vegar að því að halda alþjóðlega
skákviðburði. Á síðustu 20 mánuðum
höfum við skipulagt 10 alþjóðleg mót
af öllu tagi og á sama tíma höfum við
farið í mörg hundruð skólaheimsóknir
og dreift skákbókum, en í lok vetrar
verða alls 12.000 krakkar komnir með
bókina í hendur. Einstök stemmning
hefur skapast fyrir skák í landinu,
sama hvar borið er niður, og skákin er
að verða sú almenningseign sem hæf-
ir þjóðaríþróttinni. Í Smáralind ætl-
um við að líta um öxl, skoða hvað hef-
ur áunnist og fagna.“
Á hátíðinni, sem hefst klukkan 17 í
dag og verður fram haldið á morgun
og sunnudag, verður meðal annars
sögusýning í tilefni fimm ára afmælis
félagsins, myndasýning frá skák-
keppni á Grænlandi, risafjöltefli þar
sem stórmeistarar tefla við börn og
fullorðna, bein útsending frá Íslands-
móti skákfélaga og ýmis skemmtiat-
riði auk þess sem stuðningsfyrirtæki
Hróksins verða með vörusýningar og
miðasala hefst í sóknarhappdrætti
Hróksins, sem er fjáröflunarhapp-
drætti félagsins.
Metnaðarfull framtíðarsýn
„Við snúum okkur til almennings
og biðjum fólk að leggja okkur lið,“
segir Hrafn. „Við erum með mjög
metnaðarfulla framtíðarsýn og
stefnum að því að á næsta ári verði
hægt að festa í sessi mjög mikilvæga
hluti bæði innan og utan skólakerf-
isins. Að það verði hægt að byggja
upp skáklíf hringinn umhverfis landið
og alþjóðleg mót verði fest í sessi. Við
boðum til kosninga. Leggjum fram
það sem við höfum gert og það sem
við viljum gera. Við biðjum fólk um að
kjósa Hrókinn, veita okkur liðsinni
með því að taka þátt í þessu fjáröfl-
unarátaki okkar, því jafnframt því
sem við stöndum í stórræðum á sviði
alþjóðlegra móta eins og Mjólkur-
skákmótinu á Hótel Selfossi í næstu
viku og einvígi Larsens og Friðriks á
Hótel Loftleiðum um miðjan nóvem-
ber erum við að endurskipuleggja
Skákfélagið Hrókinn með það fyrir
augum að í framtíðinni verði Hrók-
urinn fyrst og fremst barnaskák-
félag.“
Skákhátíð Hróksins, Við erum ein fjölskylda, í Smáralind í Kópavogi
Hrókurinn verði barnaskákfélag
AUSTURBÆJARBÍÓ hefur bæði
menningarsögulegt gildi og gildi fyrir
umhverfi sitt og auðvelt er að laga það
að breyttri notkun. Því eiga borgaryf-
irvöld ekki að heimila niðurrif hússins
heldur finna leiðir til varðveislu þess.
Þetta kemur fram í bréfi sem Hús-
friðunarnefnd ríkisins sendi skipu-
lags- og byggingarnefnd 26. ágúst en í
því var jafnframt óskað eftir upplýs-
ingum um hvar málið væri statt í
ákvarðanaferli stjórnsýslunnar. Að
sögn Magnúsar Skúlasonar, forstöðu-
manns Húsfriðunarnefndar, hafa enn
engin svör borist við þeirri fyrir-
spurn.
Orðrétt segir í bréfi Húsfriðunar-
nefndar: „Nefndin telur að húsið hafi
bæði menningarsögulegt gildi og gildi
fyrir umhverfi sitt. Í dag skemmir
málning frá síðari tímum útlit húss-
ins, en yrði upprunaleg ytri áferð þess
og litaval kölluð fram, myndi húsið
sóma sér vel á nýjan leik. Húsið er
rúmgott, innra fyrirkomulag þess
haganlegt og auðvelt að laga það að
breyttri notkun. Því verður ekki ann-
að séð en að húsið geti áfram þjónað
samfélaginu við hagstæðar aðstæður.
Nefndin tekur undir umsögn
Minjasafns Reykjavíkur og bygging-
arlistadeildar Listasafns Reykjavík-
ur, dags. 26. mars 2002, og skorar á
borgaryfirvöld að heimila ekki niður-
rif hússins og finna leiðir til varðveislu
þess,“ segir í bréfi Húsfriðunarnefnd-
ar ríkisins.
Ekki verði
heimilað að
rífa Austur-
bæjarbíó
HÆSTIRÉTTUR staðfesti í gær
dóm Héraðsdóms Reykjavíkur um 5
ára fangelsi yfir Rúnari Ben Maits-
land, sem tók þátt í að flytja 890
grömm af amfetamíni og 979 grömm
af hassi til landsins. Efnin fundust á
þýskum ríkisborgara þegar hann
kom til landsins á síðasta ári. Sá var
dæmdur í 2½ árs fangelsi í Héraðs-
dómi Reykjavíkur og undi dómnum.
Þjóðverjinn viðurkenndi að hafa
tekið við efnunum frá erlendum
manni og sagðist hafa átt að koma
þeim til viðtakanda hér á landi og
lýsti sig fúsan til að aðstoða lögreglu
við rannsókn málsins. Lögregla
skipti á fíkniefnunum og útbjó pakka
með gerviefni, sem Þjóðverjinn af-
henti ákærða Rúnari Ben á hótelher-
bergi og lá fyrir í málinu hljóðupp-
taka af samtali þeirra.
Hæstiréttur taldi, að ráða mætti af
hljóðupptöku af samtali mannanna
tveggja, að ákærði hafi staðið í fíkni-
efnaviðskiptum við umræddan er-
lendan mann og að þau viðskipti hafi
verið hafi í föstum skorðum. Ákærða
var gefið að sök að hafa tekið þátt í
innflutningi Þjóðverjans með því að
hafa tekið við úr hendi hans pökkum
sem hann hafi álitið vera fíkniefni, í
því skyni að selja þau hér á landi. Þar
sem efnin sem ákærði tók við voru
gerviefni, þótti Hæstarétti skorta á
það hlutræna samhengi að brot hans
gæti orðið fullframið og var háttsemi
hans metin sem tilraun til brots.
Þetta hafði þó engin áhrif á refsi-
ákvörðun í málinu.
Málið dæmdu hæstaréttardómar-
arnir Pétur Kr. Hafstein, Ólafur
Börkur Þorvaldsson og Haraldur
Henrysson, fyrrverandi hæstaréttar-
dómari. Verjandi ákærða var Ólafur
Sigurgeirsson hrl. Málið sótti Ragn-
heiður Harðardóttir saksóknari hjá
ríkissaksóknara.
5 ára fangelsi
fyrir fíkni-
efnasmygl
STEINUNN Valdís Óskarsdóttir,
formaður skipulags- og bygging-
arnefndar Reykjavíkur, segir að
bréf Húsfriðunarnefndar ríkisins
um hugsanlega friðun Austurbæj-
arbíós hafi enn ekki verið rætt í
skipulags- og bygginganefnd. „Það
hefur ekki verið tekið fyrir og
ástæðan er sú að bréfið barst okkur
nýlega og frá því það kom hefur
málið ekki verið formlega til um-
ræðu í skipulagsnefndinni. Um leið
og málið er formlega inni í nefnd-
inni verður bréfið lagt fram. Það er
ekki venja í stjórnsýslunni, hvorki í
skipulagsnefnd né annars staðar,
að leggja fram slík bréf nema þau
tengist málum á dagskrá.“
Steinunn segir kynningarfund
vegna málefna Austurbæjarbíós
hafa verið haldinn á miðvikudag á
reitnum með íbúum og hags-
munaaðilum. Sjálf sé hún stödd er-
lendis en varaformaður skipulags-
nefndar og fólk af skipulags- og
byggingarsviði hafi verið á þeim
fundi og farið yfir og kynnt verk-
efnið. „Málið er sem sagt í byrj-
unarkynningarferli núna,“ segir
Steinunn.
Málið í kynn-
ingarferli
„HANN sýndi þessu mikinn áhuga og hefur auðsjáan-
lega mikinn áhuga á að taka til hendinni í þessum málum
í heimalandi sínu,“ sagði Alma Eir Svavarsdóttir, starf-
andi yfirlæknir heilsugæslustöðvarinnar í Efstaleiti í
Reykjavík, um heimsókn Rudolf Zajac, heilbrigð-
isráðherra Slóvakíu, sem er í opinberri heimsókn hér á
landi.
Heilbrigðisráðherrann skoðaði heilsugæslustöðina í
gær og Alma Eir og Guðmundur Einarsson, fram-
kvæmdastjóri Heilsugæslunnar í Reykjavík, fluttu fyr-
irlestra um heilbrigðiskerfið hér á landi, heilsugæsluna
og framhaldsnám í heimilislækningum en Alma Eir er
kennslustjóri framhaldsnáms sem fer að hluta til fram
við heilsugæslustöðina í Efstaleiti.
Rudolf Zajac er læknir og sagðiAlma Eir að hann
hefði sýnt mikinn áhuga á uppbyggingu framhaldsnáms í
heimilislækningum hér á landi og hefði haft orð á því að
margt mætti af því læra. „Það er alltaf gaman að hitta
fólk frá öðrum löndum og skiptast á skoðunum,“ bætti
Alma Eir við.
Fékk heilbrigðisráðherra Slóvakíu í heimsókn
Morgunblaðið/Árni Sæberg
Rudolf Zajac ræddi meðal annars við Ölmu Eir Svavarsdóttur þegar hann skoðaði heilsugæslustöðina í Efstaleiti.
Hefur áhuga á að taka til hendinni
♦ ♦ ♦