Morgunblaðið - 01.11.2003, Blaðsíða 26
MATARKISTAN
26 LAUGARDAGUR 1. NÓVEMBER 2003 MORGUNBLAÐIÐ
ÞEGAR ég fer að huga að bakstri ensku jólakökunnar
þá hefst undirbúningur jólanna,“ segir Paul Newton,
eigandi verslunarinnar Pipar og salt, sem hefur alla
sína búskapartíð bakað slíka köku fyrir jólin. Hann er
alinn upp í Bretlandi og fékk ætíð slík sætindi á jóladag
og getur ekki hugsað sér annað en að baka hana á
hverju ári.
„Ég baka kökuna yfirleitt í lok októbermánaðar eða í
byrjun nóvember í síðasta lagi. Kakan þarf að standa í
tvær vikur áður en ég fer að vökva hana með koníaki,
en það geri ég svo vikulega uns tvær vikur eru til jóla.
Þá hyl ég hana með marsípani og viku fyrir jól set ég á
hana sykurhúð og skreyti með marsípanfígúrum.“
Paul segist ekki halda í marga siði að heiman en ann-
an í jólum eldar hann kalkún að breskum sið og um ára-
mótin býður hann gjarnan upp á enskan jólabúðing.
„Ég held að flestir Englendingar borði svona ávaxta-
köku um jólin, hún er hluti af matarmenningu okkar í
kringum hátíðarnar og ómissandi finnst þeim. Á hinn
bóginn eru margir orðnir mjög uppteknir á þessum árs-
tíma og kaupa því kökuna tilbúna úti í búð.“
Paul selur enska jólaköku fyrir hátíðarnar í búð sinni
Pipar og salt og segir að sömu viðskiptavinirnir komi ár
eftir ár og margir hverjir séu þá að kaupa jólagjöf fyrir
einhverja ættingja sína.
Í lok október eða byrjun nóvember bakar Paul Newton jólaköku sem
hann vökvar reglulega og nostrar við fram að jólum. Guðbjörg R.
Guðmundsdóttir fékk að fylgjast með kökugerðinni hjá Paul, en ensk
jólakaka er borin fram með kaffi og sérrístaupi á jóladag. Svona líturhefðbundin
ávaxta-jóla-
kaka út á
borði Eng-
lendinga á
jóladag.
Undirbýr jól með sérstakri kökugerð
JÓLASIÐIR | Flestir Englendingar borða ávaxta-jólaköku sem bökuð er löngu fyrir hátíðirnar og látin standa
gudbjorg@mbl.is
Ensk jólakaka
350 g ósaltað smjör
350 g púðursykur
450 g hveiti
6 egg
salt á hnífsoddi
½ tsk. kanill
½ tsk. múskat
½ tsk. negull
300 g sykraðir blandaðir ávextir
(fæst tilbúið í Pipar og salt)
450 g ljósar rúsínur (fást m.a. í
Yggdrasil)
450 g kúrenur (fást m.a. í
Yggdrasil)
125 g rúsínur
125 g möndluflögur
30 ml síróp með hálfri teskeið af
matarlit út í til að kakan verði
dökkbrún
1 bolli koníak.
Byrjið á að taka til springform
sem er 23 cm í þvermál eða tvö lítil
sem eru 18 cm í þvermál.
Setjið þrjú lög af smjörpappír á
botninn á 23 cm springformi (eða
tveimur 18 cm springformum) og
smyrjið með smjörinu. Lögin af
pappír eru svona mörg svo kakan
brenni ekki því það þarf að baka
hana í allt að sex klukkustundir.
Sama gildir um hliðar köku-
formsins.
Hliðarnar eru huldar með smjör-
pappír og síðan er brúnum mask-
ínupappír vafið utan um formið og
bundið með bómullargarni. Á bök-
unarplötuna eru síðan sett tvö lög
af brúnum maskínupappír.
Að þessu loknu hefst vinnan við
deigið.
Blandið saman í skál kúrenum,
ljósum rúsínum, venjulegum rúsín-
um, ávöxtum, möndluflögum og
kryddi.
Þeytið í annarri skál smjör og
púðursykur uns létt og ljóst og
bætið svo einu og einu eggi í og
hrærið saman.
Sigtið hveitið og blandið í eggja-
hræruna.
Blandið nú eggjahrærunni (sem
búið er að setja hveitið út í) saman
við ávextina og hrærið. Að lokum
er koníakinu bætt saman við og sír-
ópinu sem búið er að setja saman
við matarlit. Matarlitnum er bætt
saman við til að kakan nái dökkum
lit. Deigið er tilbúið ef það dettur af
sleif.
Deigið er nú sett í formið og það
má alveg fylla formið því kakan
lyftir sér lítið enda ekkert lyftiduft
í uppskriftinni.
Margir geyma kökuna nú í ís-
skáp fram á næsta dag en það má
líka baka hana strax. Úðið aðeins
yfir kökuna með vatni og hyljið svo
með tveimur lögum af smjörpappír
sem búið er að smyrja aðeins með
smjöri og klippa á loftgat.
Kakan er bökuð við 140 gráðu
hita í 6 klukkustundir en ef formin
eru tvö þá er hún bökuð í 3 klukku-
stundir.
En þó búið sé að baka kökuna er
verkið aðeins hálfnað.
Nú þarf að pakka kökunni inn
eftir kúnstarinnar reglum þegar
hún kólnar. Fyrst er henni pakkað í
tvöfalt lag af smjörpappír og papp-
írinn er festur kirfilega með
gúmmíteygjum. Svo er álpappír
pakkað utan um hana og hún sett í
loftþétt kökubox. Þar fær kakan að
standa óhreyfð í nokkra daga.
Vikulega er kakan nú tekin fram og
gerðar litlar holur í botn og topp
með grillprjóni og koníaki hellt yfir
svona eins og tveimur matskeiðum
í hvert skipti.
Marmelaði
1 krukka hreint apríkósumauk
550 g möndlumarsípan.
Þegar hálfur mánuður er til jóla
tekur Paul kökuna fram og penslar
hana alla ríkulega með hreinu aprí-
kósumarmelaði sem hann hitar
fyrst. Það gerir hann til að marsíp-
anið festist betur við kökuna. Hann
notar möndlumarsípan sem hann
rúllar út og leggur yfir kökuna.
Marsípanið má kaupa tilbúið í
stórmörkuðum eða hjá bakara.
Viku fyrir jól er svo komið að
skreytingu kökunnar með flórsyk-
ursbráð. Það getur verið vanda-
samt að bera bráðina á kökuna og
sumir kjósa að lita marsípanið hvítt
og láta það duga. En hér kemur
uppskrift að flórsykursbráðinni.
Marsipan
675 g flórsykur
4 eggjahvítur
1 msk. sítrónusafi
2 tsk. glýserín (fæst í apóteki)
Sigtið flórsykur. Þeytið eggja-
hvítur uns þær eru orðnar að hálf-
gerðu frauði. Bætið þá saman við
msk. í einu af flórsykri og ofurhægt
og þeytið vel á milli uns flórsyk-
urinn er búinn.
Bætið við sítrónusafa og glý-
seríni og haldið áfram að þeyta
þangað til blandan er orðin eins og
marengs.
Hyljið skálina með rökum klút
og geymið í 1–2 klukkustundir til
að leyfa loftbólum að koma á yf-
irborðið. Flórsykursbráðina má lita
með matarlit ef vill.
Berið nú flórsykursbráðina á
marsípanhúð kökunnar. Byrjið á
toppi kökunnar og jafnið bráðina út
með pönnukökuspaða. Látið þorna
í að minnsta kosti klst. áður en þið
byrjið á hliðum kökunnar.
Kakan er svo skreytt með mar-
sípanskrauti sem hægt er að lita í
jólalegum litum að vild.
Morgunblaðið/Ásdís
1 2
3
4
5
6
7
8
9
1. Paul byrjar á því að gera köku-
formið tilbúið. Hann klippir út þrjú
lög af smjörpappír fyrir botn mótsins
og tvö fyrir toppinn. Síðan klippir
hann til tvöfaldan pappír fyrir hliðar
mótsins og að lokum brúnan mask-
ínupappír til að vefja utan um mótið.
Allt þetta er gert til að koma í veg
fyrir að kakan brenni en hún þarf að
vera í ofninum í sex klukkustundir.
2. Þegar búið er að gera kökuformið
tilbúið mælir Paul í skál rúsínur,
hnetur, sykraða ávexti og krydd.
3. Smjör og púðursykur þeytir Paul
vel saman og bætir í einu og einu
eggi í einu.
4. Hveitið þarf að sigta áður en því
er bætt út í eggjahræruna.
5. Blandið nú saman ávöxtum og
eggjahræru.
6. Í lokin er koníakinu hellt út í deig-
ið og sírópinu sem búið er að setja
smávegis af matarlit útí.
7. Kakan komin í form.
8. Rétt áður en kakan er sett í ofn-
inn er smávegis vatni hellt yfir kök-
una og svo tvö lög af smjörpappír
sem búið er að gera á loftgöt.
9. Þegar búið er að baka kökuna og
hún hefur fengið að kólna er henni
pakkað inn í tvöfalt lag af smjörpapp-
ír og bundið utan um með gúmmí-
teygju. Síðan er henni pakkað inn í
álpappír. Að lokum fer kakan ofan í
loftþétt box.