Morgunblaðið - 05.06.2004, Blaðsíða 22

AKUREYRI
22 LAUGARDAGUR 5. JÚNÍ 2004 MORGUNBLAÐIÐ
MIKILL áhugi virðist vera fyrir íbúðum sem
hugmyndir er um að byggja á lóð Baldurshaga,
sunnan Þórunnarstrætis og norðan lög-
reglustöðvar á Akureyri. SS-Byggir hefur keypt
lóð Baldurshaga og ganga hugmyndir forráða-
manna fyrirtækisis út á að byggja þar allt að 12
hæða fjölbýlishús ásamt félagsaðstöðu fyrir eldri
borgara. Gert er ráð fyrir að í húsinu verði 44
íbúðir en þegar hafa 46 aðilar skráð sig sem
áhugasama kaupendur að íbúðum í húsinu.
Hugmyndin var kynnt á fundi á fimmtudags-
kvöld og mætti þangað fjöldi manns.
„Mér sýnist helst að fólk hafi mikinn áhuga
fyrir því að komast nær miðbænum,“ sagði Sig-
urður Sigurðsson, framkvæmdastjóri SS-Byggis.
„Ég hef nú bara ekki orðið var við annan eins
áhuga á þeim 26 árum sem ég hef rekið fyr-
irtækið hér í bænum.“
Þær hugmyndir sem kynntar voru á fundinum
sýna 12 hæða byggingu, krossforma turn með
fjórum íbúðum á hverri hæð og hafa þær allar
þrjár gluggahliðar. Þá er auk félagsaðstöðunnar
gert ráð fyrir bílakjallara.
Sigurður vonast til að hugmyndin verði að
veruleika og að unnt verði að hefjast handa við
fyrirhugaða byggingu strax næsta haust. „Ef allt
gengur eftir vona ég að við byrjum á þessu verk-
efni í haust,“ sagði hann.
Þá hefur SS-Byggir fengið svonefndan Sjalla-
reit, í miðbæ Akureyrar til umráða og þar verða
byggðar nýjar íbúðir. „Fólk sýnir því máli líka
mikinn áhuga og þó svo að framkvæmdir hefjist
ekki þar fyrr en eftir svona eitt og hálft ár eru
þegar komnir 12 áhugasamir kaupendur á lista
hjá okkur,“ sagði Sigurður. Það sagði hann ótví-
rætt dæmi þess að fólk vildi komast í miðbæinn.
„Ég held þetta geti verið gott innlegg í þær hug-
myndir sem menn eru að skoða núna um að blása
nýju lífi í miðbæinn.“
Morgunblaðið/Skapti Hallgrímsson
Séð yfir svæðið, þar sem hugmyndir eru um að byggja háhýsið, frá Odd-
fellowhúsinu við Sjafnarstíg. Til hægri sést í horn lögreglustöðvarinnar en
Baldurshagi er fyrir miðri mynd. Þórunnarstrætið fremst á myndinni.
Tölvumynd af húsinu, sem hugmynd er um að reisa á lóðinni neðst við Þór-
unnarstræti. Þórunnarstrætið fremst, Hamarkotsklappir til vinstri, aftan
við húsið og til hægri liggur Brekkugata og þar sést yst í lóð lögreglustöðv-
arinnar. Arkitekt fyrirhugaðs húss er Logi Már Einarsson.
Hugmyndir um að reisa 12 hæða fjölbýlishús við Baldurshaga
Byrjað í haust ef allt gengur að óskum
KOSIÐ verður um sameinginu Hrís-
eyjarhrepps og Akureyrarkaupstað-
ar samhliða forsetakosningum, laug-
ardaginn 26. júní næstkomandi.
Samstarfsnefnd um sameiningu
sveitarfélaganna tveggja hefur
ákveðið að leggja til að íbúar þess-
ara sveitarfélaga greiði atkvæði um
sameiningu þeirra í eitt sveitarfélag.
Sameiningin mun taka gildi 1.
ágúst næstkomandi reynist fleiri
kjósendur í báðum sveitarfélögum
fylgjandi sameiningu en þeir sem
eru andvígir.
„Það er beggja hagur að sveit-
arfélögin sameinist og í rauninni
borðleggjandi, hvort heldur sem er
út frá efnahagslegum eða félagsleg-
um rökum,“ segir Kristján Þór Júl-
íusson, bæjarstjóri á Akureyri.
„Ávinningurinn ætti að vera öllum
ljós, bæði Hríseyingum og Akureyr-
ingum. Sameining sveitarfélaganna
við Eyjafjörð er það sem koma skal
og hér er stigið mikilvægt og í raun-
inni táknrænt skref í þá áttina.“
Samstarfsnefnd um sameininguna
hefur útbúið kynningarbækling sem
dreift verður á öll heimili í sveit-
arfélögunum tveimur í næstu viku. Í
honum er fjallað um þau áhrif sem
fyrirhuguð sameining mun hafa, yf-
irstjórn hins sameinaða sveitarfé-
lags og ýmsa aðra málaflokka í
rekstri þess. Einnig eru birtar þar
tölulegar upplýsingar og fleira sem
málinu viðkemur.
Nái sameiningin fram að ganga
mun bæjarstjórn Akureyrar fara
með stjórn sameinaðs sveitarfélags
fram að almennum sveitarstjórnar-
kosningum árið 2006. Fram að þeim
tíma verður starfandi samráðs-
nefnd, sem er núverandi hrepps-
nefnd Hríseyjar, og mun hún hittast
reglulega og koma sjónarmiðum
Hríseyinga á framfæri við fagnefnd-
ir sameinaða sveitarfélagsins. Fag-
nefndir Akureyrar munu fara með
stjórn málaflokka fram að næstu
kosningum. Samþykkt um stjórn
Akureyrar og fundarsköp bæjar-
stjórnar munu gilda í sameinuðu
sveitarfélagi og mun það bera heitið
Akureyrarkaupstaður.
Alls munu 11 fulltrúar verða
kjörnir í stjórn hins sameinaða
sveitarfélags í næstu sveitarstjórn-
arkosningum. Eignir, skuldir, rétt-
indi og skyldur sem tilheyra sveit-
arfélögunum munu falla til nýja
sameinaða sveitarfélagsins.
Hefur ekki í för með sér skulda-
aukningu fyrir Akureyringa
„Það er ljóst að Hríseyjarhreppur
er því miður nokkuð skuldugt sveit-
arfélag ef mið er tekið af íbúa-
fjölda,“ segir Kristján Þór.
„Hins vegar mun sameining ekki
hafa í för með sér neina verulega
skuldaaukningu fyrir Akureyringa,
einfaldlega vegna þess hversu fjöl-
menn við erum og því vegur skulda-
aukning engu sem orð er á hafandi.
Kostirnir og það sem vinnst með
sameiningunni vegur miklu
þyngra.“
Skrifstofuhald og fundaraðstaða
fyrir samráðsnefnd og fagnefnd
verður í Hrísey eftir sameiningu til
ársins 2006, en öll almenn þjónusta
verður veitt í þjónustuanddyri í
Ráðhúsinu á Akureyri. Gert er ráð
fyrir að skrifstofa hins sameinaða
sveitarfélags verði opin í Hrísey.
Áhaldahús verður starfrækt í
Hrísey sem bækistöð fyrir Fram-
kvæmdamiðstöð og Fasteignir Ak-
ureyrarbæjar. Þau störf í Hrísey
sem heyra undir sameinað sveitarfé-
lag er starf á skrifstofu, störf í
grunnskóla og leikskóla og starf í
áhaldahúsi. Þá munu koma til sum-
arstörf við áhaldahús, sundlaug og
nú á þessu ári einnig störf ferða-
málafulltrúa og við vinnuskóla.
Utankjörfundaratkvæðagreiðsla
er þegar hafin. Atkvæði utan kjör-
fundar eru greidd hjá sýslumönnum
um land allt, en erlendis fer at-
kvæðagreiðsla fram á skrifstofum
sendiráðs eða á öðrum stöðum sam-
kvæmt ákvörðun utanríkisráðuneyt-
is.
Kosið um sameiningu Akureyrar og Hríseyjar í sumar
Táknrænt skref að
sameiningu allra sveit-
arfélaga við Eyjafjörð
Ný seglskúta | Siglingaklúbb-
urinn Nökkvi mun á morgun, sjó-
mannadag 6. júní taka í notkun
seglskútu sem félagið hefur nýver-
ið fest kaup á við hátíðlega athöfn
sem hefst kl. 16.
Séra Gunnlaugur Garðarsson
blessar skútuna og gamlir félagar
verða heiðraðir. Öllum áhuga-
mönnum um siglingar er boðið að
koma og kynna sér starfsemi
klúbbsins sem er að fara í gang
um þetta leyti, fá sér pylsu á grill-
inu og gera sér dagamun í tilefni
sjómannadags. Eftir helgina hefj-
ast svo námskeið kúbbsins fyrir
börn á aldrinum 8–14 ára ásamt
æfingum eldri krakka. Með góðum
stuðningi Akureyrarbæjar er
klúbburinn í góðum vexti og að-
stæður klúbbsins við Drottning-
arbraut eru stöðugt að batna, seg-
ir í frétt frá Nökkva.
  
Myndlist | Eygló Harðardóttir
opnar einkasýningu í 02 Gallery
á Akureyri í dag kl. 15. Eygló er
fædd í Reykjavík 1964 og lauk
framhaldsnámi í myndlist frá
Hollandi 1990. Þetta er tíunda
einkasýning hennar en síðast
sýndi hún árið 2003 í Listasafni
Reykjavíkur, Kúlunni í Ásmunda-
safni.
  
Sýning Jóhönnu | Jóhanna Júl-
íusdóttir nemandi í Myndlistaskóla
Arnar Inga skilar lokaverkefni sínu
með sýningu í Klettagerði 6 á Ak-
ureyri á morgun, sunnudag, frá kl.
14 til 18. Sýningin samanstendur af
olíumálverkum sem unnin voru síð-
astliðin þrjú ár.
UMHVERFISRÁÐ
hefur samþykkt að
leggja til við bæjarstjórn
að samþykktum bíla-
stæðasjóðs verði breytt
á þann veg að í stað
stöðumæla og fjölmæla
verði teknar upp fram-
rúðuklukkur. Þetta er í
samræmi við niðurstöð-
ur vinnuhóps um endur-
skoðun og breytingar á
fyrirkomulagi gjaldtöku
á bílastæðum í miðbæ
Akureyrar, en hann skil-
aði lokaskýrslu í lok maí.
Málið verður kynnt frek-
ar á fundi bæjarráðs í næstu viku.
Fram kemur í bókun umhverfis-
ráðs að það sé trú þess að með
breyttu fyrirkomulagi megi koma til
móts við óskir hagsmunaaðila í mið-
bænum um að auðvelda aðgengi
þeirra sem kjósa að koma þangað á
bíl. „Einnig er það trú ráðsins að nýt-
ing bílastæða á miðbæjarsvæðinu
aukist verulega og verkefnið verði
þegar til lengri tíma litið arðbært,“
segir í bókun ráðsins.
Guðmundur Jóhannsson, formað-
ur umhverfisráðs og formaður vinnu-
hópsins, segir það hafa verið niður-
staðan að breyta fyrirkomulaginu
algjörlega. Hætt verður að taka gjald
svo sem verið hefur en þess í stað
verða svonefndar framrúðuklukkur
teknar í notkun en þær munu öku-
menn geta nálgast á ýmsum stöðum í
miðbænum. Um er að ræða pappa-
skífur sem líta út eins og klukka og
stilla menn tímann á þeim. Hug-
myndin er að boðið verði upp á 15
mínútna stæði næst miðbænum og
síðan 60 og 120 mínútur eftir því hve
fjarlægðin frá miðbæ er meiri.
Guðmundur sagði að Bifreiða-
stæðasjóður yrði vissulega fyrir
tekjutapi í kjölfar fyrirhugaðra
breytinga, en tekjur sjóðsins eftir
breytingar verða sektir sem þeir bíl-
eigendur þurfa að greiða sem eru
lengur á stæðum en klukkan segir til
um. Þá munu einnig verða leigð út
langtímastæði að sögn Guðmundar,
sennilega til 3ja og 6 mánaða og til
eins árs.
„Að mínu mati er þetta mjög fram-
sækin breyting og ég vona að með
henni muni aukið líf færast í miðbæ-
inn. Þessi breyting er ekki síst gerð
til að svara kalli Miðbæjarsamtak-
anna en gjaldtaka fyrir bílastæði hef-
ur lengi verið þeim þyrnir í augum,“
sagði Guðmundur.
Hann kvaðst fastlega búast við að
tillagan yrði samþykkt og væntir
þess að breytingin taki gildi sem
fyrst, helst ekki seinna en næsta
haust.
Morgunblaðið/Skapti Hallgrímsson
Stöðumælar í göngugötunni á Akureyri; tæki
sem hugsanlega verða þar ekki mikið lengur.
Framrúðuklukkur
í stað stöðumæla?