Morgunblaðið - 01.03.2005, Blaðsíða 17
Morgunblaðið/Kristján
Hrímuð tré Fólk á gönguför um elsta hluta Akureyrar, Innbæinn, við ískristallana sem prýddu trén við Aðalstræti.
ÞEIR eru eflaust margir sem farið
hafa á stjá með myndavél um öxl nú
um liðna helgi, hugsandi sér gott til
glóðarinnar að ná jólamyndinni
2005. Lauftré og barrtré hrímuð
frá rótum til efstu greina sköpuðu
einmitt réttu stemninguna. Sjón
sem þessi er óvenjuleg á Akureyri
enda aðstæðurnar sem urðu til þess
að ískristallarnir mynduðust á
trjánum fremur sjaldgæfar. Eyja-
fjörður þykir ekki þokusæll fjörður
miðað við marga aðra, á bilinu 10
til 20 þokudagar á ári að meðaltali
á árunum 1931 til 1973 að því er
fram kemur í yfirliti Náttúru-
gripasafns Akureyrar.
Þar segir að skipta megi þokum í
Eyjafirði í þrjá flokka, m.a. þoku
sem myndast þegar kalt sjávarloft
streymir inn yfir tiltölulega hlýtt
landið og er hún tíðust á vorin og
framan af sumri, oftast samfara
hafgolu. Hún er tíðust þegar sjór er
kaldur og hafís við landið. Einnig
þoka sem myndast vegna útgeisl-
unar og kólnunar á yfirborðinu og
loks sjóþoka eða frostreykur sem
myndast þegar ískalt loft streymir
út eftir dölum og út á tiltölulega
hlýjan sjó. Slík þoka liggur oft yfir
Oddeyri og miðbæ Akureyrar og
teygir sig út fjörðinn.
Heilluð af hrímuðum trjánum
MORGUNBLAÐIÐ ÞRIÐJUDAGUR 1. MARS 2005 17
MINNSTAÐUR
Lögfræðitorg | Baldur Dýrfjörð
flytur fyrirlestur á lögfræðitorgi í
dag, þriðjudaginn 1. mars, kl. 12 í
stofu L102, Sólborg.
Í erindi sínu fjallar Baldur um
þau sjónarmið sem koma til skoð-
unar þegar metið er hvort semja
skuli í ágreiningsmálum eða fara
dómstólaleiðina, en m.a. verða
skoðuð þau mál sem höfðuð hafa
verið á hendur Akureyrarbæ á
grundvelli jafnréttislaga á und-
anförnum árum.
Baldur Dýrfjörð er starfs-
mannastjóri FSA. Hann var í rúm
átta ár bæjarlögmaður hjá
Akureyrarbæ.
SÝNINGIN Norðurland 2005 verð-
ur haldin í Íþróttahöllinni á Akureyri
um komandi hvítasunnuhelgi, 13.–
16. maí. Sýningunni er ætlað að end-
urspegla fjölbreytileika í norðlensku
atvinnulífi og þjónustu um leið og
hún er kjörinn vettvangur til kynn-
ingar á þeim viðburðum sem í boði
eru á Norðurlandi á komandi sumri,
sumarvörum og -þjónustu. Mark-
miðið er að gestir á sýningunni fái á
einum stað þverskurð atvinnulífs,
þjónustu og mannlífs á Norðurlandi
og fræðist um fjölbreytni Norður-
lands hvað varðar búsetu og atvinnu-
tækifæri segir í frétt um sýninguna.
Um framkvæmd hennar sjá kynn-
ingarfyrirtækið Athygli á Akureyri
og handknattleiksdeild Íþrótta-
félagsins Þórs á Akureyri.
Sýningunni Norðurland 2005 er
ætlað að höfða til fólks um allt land
og ekki síst af þeim ástæðum hefur
hvítasunnuhelgin orðið fyrir valinu
sem sýningarhelgi, enda ein af
stærstu ferðahelgum ársins.
Langt er um liðið síðan haldin hef-
ur verið sýning af þessum toga á
Norðurlandi
Sýningin verður í Íþróttahöllinni á
Akureyri og er sýningarsvæði innan-
húss um 1.300 fermetrar að stærð.
Einnig er boðið upp á útisvæði sem
er tæplega 2.000 fermetrar að stærð.
Aðstandendur sýningarinnar
hvetja eigendur samkomu- og veit-
ingastaða á Norðurlandi til að vera
með sérstaka viðburði og uppákom-
ur sýningardagana.
Sýning um norðlenskt líf
Boraði göt á vatnsleiðslu |
Héraðsdómur Norðurlands eystra
hefur dæmt tæplega fimmtugan
karlmann í 30 þúsund króna sekt
fyrir að bora þrjú göt á vatns-
leiðslu í eigu Ólafsfjarðarkaup-
staðar við dæluskúr í Bursta-
brekkudal. Skaðabótakröfu
Ólafsfjarðarbæjar, 28 þúsund
króna, var hins vegar vísað frá
dómi þar sem hún var ekki talin
nægilega reifuð.
Fram kemur í dómnum að mað-
urinn viðurkenndi brot sitt en ekki
kemur fram hvers vegna maðurinn
boraði götin á leiðsluna. Dómarinn
taldi að maðurinn hefði gerst sek-
ur um minni háttar eignaspjöll.
Hann hefur ekki brotið gegn al-
mennum hegningarlögum fyrr.
Tengsl | Á dögunum komu nem-
endur og kennarar Kárahnjúkaskól-
ans í heimsókn til nágranna sinna í
grunnskólanum að Brúarási í Jök-
ulsárhlíð. Hópurinn samanstóð af tíu
nemendum og tveimur kennurum.
Þetta var sú fyrsta af nokkrum fyr-
irhuguðum heimsóknum og frekari
samskiptum, námi og verkefnum,
sem verða unnin í hvorum skóla fyr-
ir sig og í tölvusamskiptum.
Á vef Fljótsdalshéraðs, egilsstad-
ir.is, segir að þetta sérstaka verk-
efni hafi verið sniðið að aldurs-
hópnum 1.–7. bekk. Gestirnir komu
kl. 10:30 og nemendur í Brúarási
tóku á móti þeim. Fram að hádegi
var samvera í íþróttasal undir stjórn
kennara, þar sem lögð var áhersla á
íþróttir og að kynnast á jafnrétt-
isgrundvelli, óháð tungumálaerf-
iðleikum. Í hádeginu var sameig-
inlegur hádegisverður og að honum
loknum var unnið að sameiginlegu
listaverkefni sem fól í sér tónlist,
söng og dans. Nemendum var skipt í
hópa, íslenskum og erlendum nem-
endum blandað saman undir styrkri
stjórn tónlistarkennarans Suncönu
Slamnig. Hver hópur fékk verkefni
til að glíma við, til dæmis var sum-
um falið að gera tónverk um veð-
urfarið á Íslandi. Hér tókst fram-
úrskarandi vel til og allir lögðu sitt
af mörkum, jafnt heimamenn sem
gestir. Það voru ánægðir nemendur
Kárahnjúkaskólans sem yfirgáfu
Brúarás eftir að hafa tekið þátt í
skemmtilegum vinnudegi, og um-
fram allt eignast nýja vini en til þess
var jú leikurinn gerður.
Magnús Sæmundsson, skólastjóri
Brúarásskóla, segist mjög ánægður
með þennan dag. Samvinnuverkefni
Brúarásskóla og Kárahnjúkaskólans
fari vel af stað og reyndar svo vel, að
fyrsti hluti vinnunnar hafi farið
langt fram úr björtustu vonum
þeirra sem að undirbúningi verkefn-
isins hafa komið.
Skipt um deildarstjóra | Sviðs-
stjóri tækni- og umhverfissviðs hef-
ur lagt til að Jónas Vigfússon, verk-
efnastjóri framkvæmdadeildar, taki
við starfi deildarstjóra fram-
kvæmdadeildar af Guðmundi Guð-
laugssyni. Í minnisblaði sem lagt
var fram á fundi framkvæmdaráðs
er vitnað í starfsmannastefnu Ak-
ureyrarbæjar og þeirrar megin-
reglu, að forstöðumenn og deild-
arstjórar stærstu málasviða láti af
þeim störfum við 65 ára aldur og að
þeim gefist þá jafnframt kostur á að
fá önnur störf hjá Akureyrarbæ og
jafnframt minnka við sig starfshlut-
fall.
Einnig kemur fram í minnisblaði
sviðsstjóra, að á grundvelli þessarar
meginstefnu og umræðu fyrr á
þessu ári í framkvæmdaráði hafi
verið gengið frá samkomulagi við
deildarstjóra framkvæmdadeildar
Guðmund Guðlaugsson um starfslok
hans sem deildarstjóra og að hann
taki að sér önnur störf á tækni- og
umhverfissviði. Þá var lagt til að að
Jónas Vigfússon verkefnastjóri á
framkvæmdadeild gegni starfi
deildarstjóra tímabundið til næst-
komandi áramóta. Guðmundur hef-
ur verið ráðinn í fullt starf sem
framkvæmdastjóri Sorpeyðingar
Eyjafjarðar bs. frá 1. mars 2005 til
ársloka 2006 en hann hefur verið
framkvæmdastjóri í hlutastarfi.
Seyðisfjörður | Undanfarið hafa
rannsóknir vegna áforma um nýja 7
MW virkjun í Fjarðará á Seyðisfirði
staðið yfir. Það er fyrirtækið Ís-
lensk orkuvirkjun sem ásamt bæj-
aryfirvöldum á Seyðisfirði hefur
staðið að rannsóknunum.
Í Fjarðará er fyrir ein elsta virkj-
un landsins, Fjarðarselsvirkjun.
Seyðfirðingar hafa lengi horft til
frekari virkjunar í Fjarðará, enda
er fallhæð mikil ofan af Fjarðar-
heiði.
„Það sem er merkilegt við þessa
virkjun er að þarna er tekið sér-
stakt tillit til umhverfisverðmæta,“
sagði Tryggvi Harðarson, bæjar-
stjóri á Seyðisfirði, í samtali við
Morgunblaðið. „Áður hafði sú hug-
mynd komið fram að byggja þarna
margfalt stærri virkjun og það hefði
kostað miklu meira rask á allri
ásýnd Fjarðarár og Fjarðarheiðar.
Menn eru ekki að reyna að hámarka
nýtingu vatnsöflunar, heldur er
meginforsenda að virkjunin trufli
ekki eða skemmi ásýnd Fjarðarár.“
Vatnsrennsli ekki raskað
Um er að ræða 7 MW þrepavirkj-
un í Stöfunum ofan við Seyðisfjörð.
Gert er ráð fyrir stöðvarhúsi við
svonefndan Efri-Staf og öðru stöðv-
arhúsi skammt frá gömlu virkjun-
inni sem fyrir er í Fjarðará. Stíflur
verða reistar í gömlu stíflustæði og í
heiðinni og lagðar pípur þaðan og
m.a. að Neðri-Staf. Þar er lón, sem
mun stækka nokkuð og þarf að
byggja utan um það varnargarða.
Tryggvi segir reiknað með að píp-
urnar verði niðurgrafnar, þær fari
að mestu leyti með vegum og allt
rask verði í lágmarki. „Það sem
verður sýnilegt er að lónið mun
stækka og varnargarðar þar verða
sjáanlegir. Eitthvað þarf að breyta
vegalagningu, sem er unnið í sam-
vinnu við Vegagerðina og svo eru
þessi tvö stöðvarhús, sem þegar
hafa verið teiknuð og hönnuð og
falla vel inn í umhverfið. Fram-
kvæmdin mun hafa sáralítil áhrif á
Fjarðarána og það hefur verið for-
senda allt frá byrjun að vatnsrennsli
hennar verði ekki raskað sem neinu
nemur og gert ráð fyrir því að lág-
marksrennsli verði alltaf tryggt.“
„Vinna við þróun á þessu verkefni
hófst árið 2003 og hefur staðið yfir
síðan,“ segir Birkir Þór Guðmunds-
son, framkvæmdastjóri Íslenskrar
orkuvirkjunar. „Þegar ráðist var í
þetta verkefni var lögð áhersla á að
athuga hvort hægt væri að virkja
Fjarðará án þess að skaða útlit
hennar og umhverfi. Gengið var út
frá því að lágmarka öll áhrif vegna
fyrirhugaðra framkvæmda og orku-
vinnsla látin ráðast af því. Áform
um virkjunar árinnar er því bundin
þeirri hugmyndafræði að saman
geti farið hagkvæm virkjun, með
fullu tilliti til þeirrar náttúru sem
skapar og umlykur aflið sem virkjað
er.“
Birkir segir Íslenska orkuvirkjun,
sem leiði verkefnið, setja það sem
skilyrði þegar verkefni af þessu tagi
eru unnin að orkuvinnsla og um-
hverfisvernd fari saman.
Stefna félagsins sé að nýta minni
vatnsföll til hagkvæmrar orkuöflun-
ar þar sem tillit er tekið til þeirrar
náttúru og þess samfélags sem fyrir
áhrifum verður. „Þetta er í sam-
ræmi við þá stefnu sem viðhöfð er
víða erlendis í orkuöflunarmálum og
flokkast ótvírætt undir skilyrði sem
sett eru fyrir vistvænni orku-
vinnslu.“
Eignarhald óvisst
Tillaga um að koma skipulagstil-
lögu í auglýsingu er nú til afgreiðslu
hjá umhverfismálaráði og bæjarráði
Seyðisfjarðar og fer þaðan fyrir
bæjarstjórn. Ekki er farið að taka
afstöðu til hluta eins og eignarhalds
á virkjuninni. Menn hafa velt því
upp hvort Seyðisfjarðarbær eða
heimamenn vilji koma að eignar-
haldi en það mun allt opið ennþá.
„Ef verkefnið kemst á það stig að
samþykkt liggi fyrir um skipulag
geta menn farið að horfa á eign-
arhluti og framkvæmdir,“ segir
Tryggvi. Orkuframleiðsla virkjunar-
innar á að fara beint inn á lands-
dreifikerfið. Framkvæmdin mun
kosta u.þ.b. milljarð króna og reikn-
ar Íslensk orkuvirkjun með að tvö
ár taki að byggja virkjunina.
Seyðfirðingar með áform um enn meiri orkuframleiðslu í Fjarðará
Tillit tekið til þeirrar náttúru
sem skapar og umlykur aflið
Ný virkjun í farvatninu Afstöðumynd sem sýnir hluta af mannvirkjum nýrrar Fjarðarárvirkjunar í Stöfum.
AKUREYRI
AUSTURLAND