Fréttablaðið - 07.05.2004, Síða 61

33FÖSTUDAGUR 7. maí 2004
Við áttum
skilið að vinna
Guðríður Guðjónsdóttir og stelpurnar hennar í Val jöfnuðu úrslitaein-
vígið gegn ÍBV með 28-27 sigri á Hlíðarenda í gær.
HANDBOLTI Valsstúlkur jöfnuðu
metin gegn ÍBV í úrslitaeinvígi
liðanna um Íslandsmeistaratitil
kvenna í handbolta þegar þær
unnu annan leikinn, 28–27, á
Hlíðarenda í gær. ÍBV vann
fyrsta leikinn í framlengingu og
báðir hafa þessir leikir verið
æsispennandi og frábær
skemmtun fyrir áhorfendur.
Berglind Íris Hansdóttir varð 14
af 21 skoti sínu í seinni hálfleik,
þar af tvö víti frá stórskyttum
Eyjaliðsins, Önnu Yakovu og
Öllu Gokorian, á síðustu fjórum
mínútum leiksins. Berglind Íris
hefur varið 42 skot í fyrstu
tveimur leikjum liðanna, þar af
3 víti og 9 hraðaupphlaup.
Þjálfari Valsliðsins, Guðríður
Guðjónsdóttir, var í skýjunum
eftir leik. „Við erum bara
staðráðnar í því að við ætlum að
selja okkur alveg rosalega dýrt.
Við vorum ofboðslega ósáttar
við leikinn á þriðjudaginn því
okkur fannst við eiga skilið að
vinna. Það var því bara að duga
eða drepast fyrir okkur. Vörnin
er grunnurinn og svo Berglind í
markinu. Það er náttúrulega
ekkert ódýrt að fá svona tvö víti
í lokin,“ sagði Guðríður og vísar
til vítanna sem Berglind Íris
varði á lokamínútunum en hún
greip seinna vítið frá Öllu
Gokorian. „Við áttum skilið að
vinna þennan leik því mér
fannst þær stela sigrinum í
fyrsta leiknum. Við erum með
rosalega góðan mannskap sem
er í góðu formi. Þetta var
frábær sigur, nú er bara að
vinna úti í Eyjum og klára síðan
hér heima,“ sagði Guðríður.
Ágústa Edda Björnsdóttir átti
mjög góðan leik hjá Val í vörn
og sókn, skoraði 7 mörk og átti 6
stoðsendingar. Sigurlaug Rún-
arsdóttir og Elfa Björk
Hreggviðsdóttir skoruðu báðar
fimm mörk en Elfa skoraði 5 af
12 hraðaupphlaupsmörkum
Valsliðsins. Bestu menn
Valsliðsins skoruðu þó hvorugar
mark, Berglind Íris varði
frábærlega í markinu allan
leikinn og Anna María
Guðmundsdóttir lokaði miðju
Valsvarnarinnr og braut niður
flestallar sóknir Eyjaliðsins.
Anna María hefur komið gríðar-
lega á óvart með grimmum en
skynsömum varnarleik sínum.
Aðalsteinn Eyjólfsson, þjál-
fari ÍBV, var óánægður með leik
sinna stelpna. „Valsliðið er á
mikilli siglingu, er búið að bæta
sig jafnt og þétt seinni hluta
móts og þær eru að koma upp
eftir gríðarlega góða hvíld en á
sama tíma erum við búin að
keyra á fullri ferð frá því í
febrúar. Það á ekki að koma
neinum á óvart hvað þær eru að
spila vel. Við getum fyrst og
fremst okkur sjálfum um kennt
hvernig við erum að spila þessu
frá okkur. Það vantar aga til að
klára vissa hluti og þess vegna
erum við ítrekað að missa þetta
frá okkur. Sóknarleikur liðsins
er afleitur í augnablikinu og
leikmenn leyfa ekki boltanum
að vinna. Við þurfum að fara
yfir okkar leik og hvernig við
ætlum að spila úr framhaldinu
því þetta einvígi ræðst fyrst og
fremst á því,“ sagði Aðalsteinn
en leikirnir hafa verið frábær
skemmtun og afar spennandi.
„Þetta er full mikil spenna
fyrir marga enda hefur maður
heyrt að nokkrir séu komnir í
sprengitöflurnar í Eyjum. Nú er
bara að girða sig í brók og mæta
tilbúnar í næsta leik í Eyjum,“
sagði Aðalsteinn að lokum.
Birgit Engl var best hjá ÍBV í
vörn sem og sókn þar sem hún
skoraði 7 mörk í 7 skotum. Alla
Gokorian og Anna Yakova sko-
ruðu báðar 6 mörk og Sylvia
Strass bætti við fjórum. Yakova
hefur þó „aðeins“ skorað 9 mörk
úr 27 skotum í einvíginu og
gengur illa gegn frábærri vörn
Önnu Maríu og Hafrúnar
Kristjánsdóttur sem vinna vel
saman við að stoppa þessa
stórskyttu. ■
www.bluelagoon.com
ferskleika
Gefðu
Verð aðeins 2.490 kr.
Fáanlegt í verslunum Bláa Lónsins
í heilsulind og við Aðalstræti 2 í Reykjavík.
Mæðradagur
Blue Lagoon rakakrem fyrir líkamann inniheldur steinefni, kísil
og þörungakjarna úr Bláa lóninu sem viðhalda rakastigi húðar-
innar og auka mýkt hennar og styrk. Léttur og frískandi ilmur.
algae & mineral body lotion
– rakagefandi krem fyrir líkamann
Prufa af Blue Lagoon andlitskremi fylgir með.
Kvennalið Stjörnunnar verður fyrir áfalli:
Tvær í þýska boltann
HANDBOLTI Hið efnilega kvennalið
Stjörnunnar í handknattleik mun
væntanlega verða fyrir miklu
áfalli á næstu dögum þegar tvær
af sterkustu leikmönnum liðsins
skrifa undir samning við þýska
úrvalsdeildarfélagið TuS
Weibern. Aðalsteinn Eyjólfsson,
þjálfari ÍBV, mun stýra þessu liði
á næstu leiktíð og hann stendur
fyrir því að félagið semji við
þessar efnilegu örvhentu stúlkur.
Þær eru Jóna Margrét Ragn-
arsdóttir og Sólveig Lára Kjærne-
sted en Jóna Margrét sagði í sam-
tali við Fréttablaðið í gær að hún
biði bara eftir því að fá samning-
inn til undirskriftar. Samkomulag
hefði tekist um einstök atriði og
ef það stæði líka á pappírunum
væri ekkert því til fyrirstöðu að
skrifa undir og byrja að pakka. ■
Seinni undanúrslitaleikir Evrópukeppni félagsliða:
Newcastle datt úr leik
FÓTBOLTI Seinni undanúrslitaleik-
irnir í Evrópukeppni félagsliða
fóru fram í gærkvöld en þá mætt-
ust annars vegar vegar Marseille
og Newcastle í Frakklandi og hins
vegar Valencia og Villareal á
Spáni.
Fyrri leikirnir enduðu báðir
með markalausu jafntefli en
reyndin varð önnur nú því bæði
heimaliðin tryggðu sér sigur.
Marseille bar sigurorð af
Newcastle með tveimur mörkum
gegn engu. Bæði mörkin gerði
Knattspyrnumaður ársins í
Frakklandi, Didier Drogba, það
fyrra á 18. mínútu og það seinna á
þeirri 82. Þar með heldur ævin-
týri Frakka áfram en í gær
tryggði Mónakó sér einmitt sæti í
úrslitaleik meistaradeildarinnar.
Í hinum leiknum fóru leður-
blökurnar frá Valencia með 1-0
sigur af hólmi í Spánarbardagan-
um mikla. Eina mark leiksins
gerði Miguel Mista úr vítaspyrnu
á 16. mínútu. Valencia á því enn
góðan möguleika á að hampa
tveimur titlum á þessari leiktíð en
liðið er með fjögurra stiga forskot
á Real Madrid í deildarkeppninn á
Spáni þegar aðeins tveimur um-
ferðum er ólokið.
Úrslitaleikurinn fer fram 19.
maí á Ullevi-leikvanginuum í
Gautaborg í Svíþjóð. ■
JÓNA MARGRÉT RAGNARSDÓTTIR
Á leið til Þýskalands ásamt stöllu sinni
Sólveigu Láru Kjærnested.
Valdimar Þórsson:
Fer hvergi
HANDBOLTI Einn besti leikmaður
Fram í handboltanum, miðjumað-
urinn Valdimar Þórsson, verður
að öllu óbreyttu áfram í herbúð-
um Framara næsta vetur. Samn-
ingur Valdimars við Framara
rann út eftir tímabilið og fjöldi
liða hafði áhuga á að tryggja sér
þjónustu þessa snjalla leikmanns.
Valdimar sagði í samtali við
Fréttablaðið í gær að samninga-
viðræður hans og Framara væru á
réttri leið og að hann væri bjart-
sýnn á að þeir myndu ná saman
fljótlega. Hann sagðist helst
kjósa að vera áfram í herbúðum
Framara enda liði honum vel hjá
félaginu. ■
ÁGÚSTA EDDA BJÖRNSDÓTTIR Í GÓÐUM GÍR Í GÆRKVÖLD
Ágústa Edda Björnsdóttir skoraði sex af sjö mörkum sínum í seinni hálfleik og lék vel í vörn sem sókn.
FRÉTTAB
LAÐ
IÐ
/VILH
ELM