Fréttablaðið - 11.04.2005, Blaðsíða 38

22 11. apríl 2005 MÁNUDAGUR
Byggt í grónum garði
Steinbær frá 1912 fær að
standa á lóðinni á horni
Hraunteigs og Hrísateigs og
fjölskrúðugur garðurinn verð-
ur friðaður eftir föngum þótt
þrjú ný parhús rísi.
Miklar breytingar eru fyrirhug-
aðar á horni Hrísateigs og Hraun-
teigs í Reykjavík. Verið er að rífa
gömul hús sem upphaflega voru
útihús en var breytt í íveruhús á
síðari árum og tilheyrðu Hrísa-
teigi 6. Þó á gamall steinbær að fá
að standa. Hann var byggður 1912
af Magnúsi Egilssyni, steinsmiði
og hét upphaflega Kirkjuland.
Einn af þeim sem á bernskuminn-
ingar þaðan er Sigurður A. Magn-
ússon rithöfundur er minnist þess
í bók sinni Undir kalstjörnu að
hafa átt heima í þessum litla
„álfabæ“.
Guðsteinn Eyjólfsson klæð-
skeri keypti bæinn árið 1925.
Berklar höfðu komið upp á heim-
ili hans við Laugaveg og læknir
ráðlagði honum að fara með fjöl-
skylduna út fyrir borgina á sumr-
in þar sem hreint loft og hollur
matur myndi flýta fyrir bata. Þá
voru Teigarnir teigar. Eitt fyrsta
verk Guðsteins var að byggja fjós
og hlöðu við Kirkjuland, auk þess
hafði hann þar hænur og ræktaði
matjurtir á landinu í kring. Krist-
inn, sonur hans, tók við húsinu og
hóf umfangsmikla ræktun í garð-
inum á sjötta áratugnum, ásamt
konu sinni Elísabetu Magnúsdótt-
ur. Þau fluttu inn fjölmargar teg-
undir sem síðan hafa farið í fram-
leiðslu hjá skógræktinni í Reykja-
vík, til dæmis mun Kasmírreynir
sem til er í gróðrarstöðvum í dag
vera þaðan kominn. Laukblóm og
prímúlur ræktaði Kristinn í þús-
undum afbrigða bæði í garðinum
og í gróðurhúsi sem þar stóð. Á
síðustu árum hefur garðurinn
tekið á sig æ villtari mynd og
þykknið verið þétt.
Tillögur liggja fyrir um að Ný-
mót ehf. byggi þrjú þriggja hæða
parhús á þessari lóð og eru þær
tillögur nú í grenndarkynningu
hjá Borgarskipulagi. Garðurinn
verður friðaður að svo miklu leyti
sem hægt er og tré verða ekki
felld nema með samþykki garð-
yrkjustjóra borgarinnar.
Heimildir: Mannlíf við Sund eftir
Þorgrím Gestsson; Dagur, ág. 2000
gun@frettabladid.is
Þessi mynd var tekin af Kirkjulandi skömmu eftir að Guðsteinn Eyjólfsson og fjöl-
skylda hans keyptu kotið 1925. Eitt af því fyrsta sem þau gerðu var að reisa fjós og
hlöðu og hefja ræktun á landinu. Myndin er úr bókinni Mannlíf við Sund eftir Þor-
grím Gestsson og birtist hér með leyfi hans.
Steinbærinn er 25 fer-
metrar að stærð og
hann fær að standa
áfram, annað hvort
sem geymsla undir
garðyrkjuáhöld allra
íbúanna eða sem hluti
af einni eign.
Hér stóð bær. Gömlu útihúsunum var breytt í íbúðarhúsnæði en nú víkja þau fyrir
nýjum bústöðum.
Garðurinn var meiri safngarður en lystigarður enda var erfiðleikum bundið að ganga um hann. Þessi mynd úr bakgarðinum var
tekin árið 2000.
Ingimundur Sveinsson arkitekt hefur gert tillögur að deiliskipulagi á lóðinni að
Hrísateigi 6. Þær eru nú til kynningar hjá Borgarskipulaginu.
Útlit nýju parhúsanna, samkvæmt tillögu Ingimundar Sveinssonar. Þau munu
tilheyra Hraunteigi.
Eldhúsið var ótrúlega huggulegt í gamla fjósinu. Svona leit það út árið 2000.