Fréttablaðið - 04.09.2006, Qupperneq 67

MÁNUDAGUR 4. september 2006
Á heimasíðu Þjóðleikhússins er nú
hægt að fræðast um leikferð Pét-
urs Gauts til Osló en þar bloggar
Tinna Gunnlaugsdóttir Þjóðleik-
hússtjóri um ævintýri hópsins á
heimavelli leikskáldsins Henriks
Ibsen. Þar í borg stendur nú yfir
Ibsenhátíð í tilefni af hundrað ára
ártíð leikskáldsins og greinir Tinna
frá því að íslensk uppsetning á
hans þekkta ljóðaleik hafi fallið
vel í kramið hjá áhorfendum Þjóð-
leikhússins í Osló, menn hafi þar
klappað og blístrað sem annars sé
ekki algengt hjá frændum vorum.
Uppfærsla leikstjórans Balt-
asars Kormáks á Pétri Gaut sló
eftirminnilega í gegn hjá íslensk-
um leikhúsgestum í vetur og var
uppselt á flestar sýningarnar.
Þjóðleikhúsinu hefur einnig verið
boðið að ferðast með sýninguna
til Bretlands og er fyrirhugað að
setja hana upp í Barbican-menn-
ingarmiðstöðinni í London í febrú-
ar. Næstu sýningar hérlendis
verða um miðjan september. - khh
TINNA GUNNLAUGSDÓTTIR Leikhússtjóri
bloggar um velgengni Péturs Gauts í
Noregi á www.leikhusid.is.
Leikhússtjórablogg
Lestrarhestar í Grafarvogi hafa
lagt að baki fjölda hillumetra í
sumar því í Foldasafni hefur
staðið yfir lestrarátak undir
yfirskriftinni „Sumarlestur ber
ávöxt“. Sigrún Ása Sigmarsdóttir
bókasafnsfræðingur segir að
rúmlega níutíu börn hafi tekið
þátt í átakinu og lesið alls 102.870
síður af margskonar bókum.
„Börnin hafa lesið allt frá einni
bók og upp í 114 en það met á einn
strákanna. Það tóku 33 strákar
þátt í sumar sem er mjög ánægju-
legt því alltaf er verið að ýja að
því að þeir lesi ekki neitt,“ segir
hún. Forsvarsmenn bókasafnsins
eru einkar ánægðir með þátt-
tökuna og árangurinn en þrisvar
sinnum fleiri krakkar tóku þátt í
sumar en í fyrra.
Krakkarnir fengu lukkumiða í
formi ávaxtar fyrir hverja lesna
bók en þeir fylltu einnig út upp-
lýsingar um lesturinn í þar til
gerða bók og fengu að launum
límmiða. Fyrr í vikunni var síðan
dregið úr ávaxtamiðunum og
fengu heppnir þátttakendur
skemmtilega vinninga en allir
þátttakendur fengu einnig bóka-
gjöf frá Eddu útgáfu og að lokum
var boðið upp á ávaxtahlaðborð
úr „uppskeru sumarsins“.
Sigrún Ása segir lestrarátakið
hafa þríþætt markmið. „Við vilj-
um styðja krakkana í að viðhalda
þeirri lestrarfærni sem þeir hafa
áunnið sér í námi en það skiptir jú
miklu máli í framtíðinni. Síðan
viljum við vitanlega fá þá sem oft-
ast í heimsókn á safnið því við telj-
um að hér sé góður heimur að
sækja heim fyrir börn og í þriðja
lagi gerum við þetta til að sanna
það sem ekki allir vita að það getur
verið gaman fyrir krakka að hafa
bækur sem áhugamál.“ - khh
LESTURINN BAR DRJÚGAN ÁVÖXT Krakkarnir gæddu sér á hlaðborði bókmennta og
ávaxta.
LESANDI SUMARSINS Sindri Snær las 114 bækur í sumar. FRÉTTABLAÐIÐ/HEIÐA
GLAÐBEITTUR LESANDI HEILSAR BÓKA-
MÚSINNI GERONIMO Níutíu krakkar á
aldrinum 6-12 ára tóku þátt í lestrarátaki
Foldasafns.
Ríkuleg uppskera