Fréttablaðið - 22.08.2008, Blaðsíða 72

52 22. ágúst 2008 FÖSTUDAGUR
PEKING 2008 Kínverjar hafa svo
sannarlega gert sitt til þess að
Ólympíuleikarnir í Peking verði
þeir bestu í sögunni en tveir menn
eiga stærstan heiðurinn af því að
leikarnir verða á vörum fólks
næstu áratugi ef ekki lengur.
Afrek þeirra Michael Phelps og
Usain Bolt hafa skilið menn eftir
orðlausa af undrun.
Þegar bandaríski sundmaðurinn
Michael Phelps varð fyrsti íþrótta-
maður sögunnar til þess að vinna
átta gullverðlaun á sömu leikum
var enginn í vafa um að þetta yrðu
hans Ólympíuleikar en hrokafull-
ur og hávaxinn spretthlaupari úr
karabíska hafinu hefur þó stolið
svolítið þrumunni af sundmannin-
um hlédræga.
Ótrúlegt afrek Phels
Afrek Michaels Phelps er ótrúlegt
og það er nánast ómennskt að hann
hafi viljann og úthaldið í að vinna
átta gull á níu dögun. Til þess
þurfti hann að synda alls 17 sinn-
um og í hvert skipti á móti nýjum
og ferskum sundmönnum sem
allir höfðu augun á að verða þeir
fyrstu og jafnvel einu sem ná að
stoppa hann.
Það er kannski hægt að sjá fyrir
sér sundmann með hæfileika til
þess að vinna öll þessi sund ein og
sér með næga hvíld inn á milli en
það er erfiðara að sjá út hvernig
þessum 23 ára Bandaríkjamanni
tókst að vinna sig í gegnum press-
una og þreytuna og halda einbeit-
ingu og hundrað prósent árangri
út alla sundkeppnina.
Í lok keppninnar brosti Phelps
sínu breiðasta og kom fram af
hógværð og virðuleika. Hann hafði
endurskrifað sundsöguna en var
strax farinn að hugsa um hvernig
hann gæti fundið sér ný krefjandi
verkefni í lauginni.
Vildi breyta sundíþróttinni
„Það er aldrei hægt að segja að
eitthvað sé ómögulegt. Það er allt
hægt ef þú ert tilbúinn að leggja
allt á þig. Mitt markmið hefur allt-
af verið að breyta sundíþróttinni
og ég vildi gera eitthvað sem eng-
inn hafði gert áður,“ sagði Phelps
eftir að áttunda gullið var í höfn.
Það var þó félagi hans Aaron
Peirsol sem orðaði það best. „Hug-
takið Sptiz-afrek er úrelt og hér
eftir tölum við um Phelps-afrek.“
Met Marks Spitz stóð í 36 ár og
eftir að keppnin harðnaði í nútíma
sundi bjóst enginn við því að það
yrði nokkurn tímann slegið. Phelps
er þegar farinn að tala um næstu
Ólympíuleika sem fara fram í
London 2012.
„Ég er spenntur fyrir að prófa
nýjar greinar og synda í öðrum
greinum en ég gerði í Peking. Það
verður gaman að fá að prófa eitt-
hvað nýtt þessi fjögur ár,“ segir
Phelps en mestar líkur eru á að
hann einbeiti sér að styttri sund-
um og gefi jafnvel tvær sterkustu
greinar sínar upp á bátinn, 200 og
400 metra fjórsund.
Stanslaus sýning hjá Bolt
Yfirburðir Usains Bolt í tveimur
greinum, sem vinnast oftast á
sjónarmun, hafa hins vegar einnig
skilið menn eftir orðlausa.
Hafi Phelps sýnt ómennska
hæfileika í að halda út í svo mörg-
um sundum þá sýndi Bolt að því er
virðist ómennska yfirburði í
tveimur vinsælustu greinum
frjálsra íþrótta. Hann var svo
langt á undan hinum að hann gat
liggur við snúið sér við og bakkað
síðustu metrana inn í markið. Bolt
fullkomnaði þá list að slaka á í lok
undanrásanna og taka hina hlaup-
arana á taugum með alls konar
látalátum.
Hann er langfljótastur, hann
sýndi það á brautinni og lét síðan
alla vita það þegar hann fagnaði
frábærum árangri með dönsum,
töffaraskap og almennum hroka
löngu eftir að hlaupunum lauk. En
hvað var hægt að segja og þessi
látalæti sáu til þess að hann stal
sviðsljósinu í öllum heimshornum
nema kannski í Bandaríkjunum.
Bandaríkjamenn voru örugglega
ekki ánægðir með að sjá Bolt gera
lítið úr helstu hlaupastjörnum
þeirra og skyggja auk þess á afrek
stjörnusundmannsins.
Heyrðu, þessi gæi er fljótur
„Ég vissi að þetta væri hröð braut
en ég bjóst aldrei við þessu. Ég er
í sjokki. Ég kom mér á óvart og ég
kom öllum heiminum á óvart,“
sagði Bolt á milli þess að hann
fagnað sigrinum með því að sýna
skóna, dansa um og horfa á endur-
sýninguna af hlaupunum.
„Ég var að horfa á sjálfan mig
og sagði: Heyrðu, þessi gæi er
fljótur,“ sagði Bolt í léttum tón.
„Mig hefur dreymt um þetta síðan
ég var lítill strákur og þess vegna
er sigurinn í 200 metra hlaupinu
mér meira virði en 100 metra
hlaupið,“ sagði Bolt eftir að seinna
gullið var í höfn. ooj@frettabladid.is
Stærstu stjörnur leikanna í Peking
Bandaríski sundmaðurinn Michael Phelps og spretthlauparinn frá Jamaíku Usain Bolt eru tvær stærstu stjörnur Ólympíuleikanna í
Peking. Þeir sáu til þess að leikarnir eru ekki aðeins einstaklega vel heppnaðir heldur einnig sögulegir. Sigurgleði beggja er óumdeil-
anleg en fögnuðurinn er hins vegar á ólíkum nótum enda gerólíkir persónuleikar, annar hógvær en hinn hrokinn uppmálaður.
ÁTTA GULL Á NÍU DÖGUM Michael Phelps fór átta sinnum upp á pall, fékk í hvert
skipti gullpening og að hlusta á bandaríska þjóðsönginn. NORDICPHOTOS/AFP
TVÖ MÖGNUÐ HEIMSMET Usain Bolt
setti heimsmet í bæði 100 (að ofan) og
200 metra hlaupum. NORDICPHOTOS/AFP
USAIN BOLT
Íþróttagrein: Frjálsar íþróttir
Land: Jamaíka
Gælunafn: Lightning Bolt
(Eldingin Bolt)
Fæddur: 21. ágúst 1986 (22 ára)
Fæðingarstaður: Trelawny, Jamaíka
Hæð: 196 sm
Þyngd: 86 kg
Ólympíugull 2008: 2
Heimsmet á ÓL 2008: 2
Ólympíugull á ferlinum: 2
Sagan skrifuð: Níundi maðurinn í sögunni
til þess að vinna spretttvennuna (100 m
og 200 m hlaup) en sá fyrsti til þess að
gera það með því að setja heimsmet
í báðum sigurhlaupunum. Bolt er
einnig fyrsti maðurinn frá árinu 1979
sem á heimsmetin í báðum sprett-
hlaupunum.
Líkt við: Carl Lewis frá Bandaríkjunum sem var sá
síðasti til að vinna spretttvennuna, á Ólympíuleik-
unum í Los Angeles 1984. Samanburðurinn við
Michael Johnson er einnig óumdeilanlegur eftir
að Bolt sló „óbætanlega” heimsmetið hans í 200
metra hlaupi.
Sagt um hann: „Þetta er ótrúlegt og hvað er hægt
að segja um Usain Bolt. Hann ætlaði sér að bæta
metið og gerði það. Hann hljóp enn flottara hlaup
en þegar hann vann 100 metra hlaupið ef það var
hægt. Maður sem er 196 cm á hæð á ekki að geta
náð svona góðu starti. Hann á alveg að geta bætt
bæði þessi met og ég sé ekki annað en að hann gæti
farið að reyna við 400 metra hlaupið en ég er þó
ekki viss um að heimsmetið þar sé í hættu,” sagði
Michael Johnson um Bolt.
MICHAEL PHELPS
Íþróttagrein: Sund
Land: Bandaríkin
Gælunafn: The Baltimore-bullet
(Byssukúlan frá Baltimore)
Fæddur: 30. júní 1985 (23 ára)
Fæðingarstaður: Baltimore,
Maryland
Hæð: 193 cm
Þyngd: 91 kg
Ólympíugull 2008: 8
Heimsmet á ÓL 2008: 7
Ólympíugull á ferlinum: 14
Sagan skrifuð: Fyrstur í sögunni
til þess að vinna átta
gullverðlaun á
sömu leikum og sá íþróttamaður
sem hefur unnið flest gullverðlaun
frá upphafi. Phelps hefur nú unnið
14 gull og alls 16 verðlaun á
Ólympíuleikum. Phelps bætti þar
met Larissu Latynina (fimleikar,
Sovétríkin), Paavos Nurmi (frjálsar,
Finnland) Marks Spitz (sund,
Bandaríkin) og Carl Lewis (frjálsar,
Bandaríkin) sem öll höfðu unnið
9 gull. Hann er sá eini sem hefur
unnið á annan tug gullverðlauna.
Líkt við: Mark Spitz, bandarísk-
an sundmann sem vann sjö
gullverðlaun á Ólympíuleikunum í
München 1972. Phelps mistókst að
jafna metið hans Spitz í Aþenu fyrir
fjórum árum (sex gull og 2 brons)
en bætti úr því í Peking.
Sagt um hann: „Þetta sýnir okkur
að hann er ekki aðeins besti sund-
maður allra tíma og besti íþrótta-
maður Ólympíuleikanna heldur er
hann kannski besti íþróttamaður
sögunnar. Hann er mesti keppn-
is maður sem hefur
gengið á þessarri
jörðu,“ sagði Mark
Spitz um Phelps.
Michael Phelps
400 metra fjórsund Heimsmet
4 x 100 m skriðsund Heimsmet
200 metra skriðsund Heimsmet
200 metra flugsund Heimsmet
4 x 200 m skriðsund Heimsmet
200 metra fjórsund Heimsmet
100 metra flugsund Ólympíumet
4 x 100 m fjórsund Heimsmet
Usain Bolt
100 metra hlaup Heimsmet
200 metra hlaup Heimsmet
GULLMENNIRNIR