Morgunblaðið - 08.08.2007, Blaðsíða 17
MORGUNBLAÐIÐ MIÐVIKUDAGUR 8. ÁGÚST 2007 17
LANDIÐ
www.stilling.is // stilling@stilling.is
sýnum stillingu í umferðinni
Flúðir | Talið er að 1500-1700 manns
hafi verið á Flúðum um verslunar-
mannahelgina sem nutu veðurblíðu
og þess sem fram fór á staðnum.
Meðal þess sem boðið var upp á var
hin árlega heimsmeistarakeppni í
traktorstorfæru sem fram fór í Litlu-
Laxá. Er miðað við að vélarnar séu
ekki yfir 50 hestöfl. Nær 2000 manns
fylgdust með atganginum í ánni.
Garðyrkjubændur kynntu afurðir
sínar í grænmetistorgi. Þeir lands-
kunnu listamenn Maggi Eiríks og
KK héldu tónleika í Félagsheimilinu
á laugardagskvöldið og skemmtu
áheyrendur sem voru hátt á þriðja
hundrað sér frábærlega og tóku oft
undir með þeim snillingum. „Þið eru
bestu áheyrendur sem við höfum
haft,“ sagði Maggi. Varðeldur sem og
brekkusöngur gladdi marga í blíð-
unni.
Á sunnudeginum fór m.a. fram ár-
leg furðubátakeppni á Litlu-Laxá
sem gleður mörg börnin sem og for-
eldra. Leikfélagið Lotta sýndi Dýrin
í Hálsaskógi og Baðstofukvöld var í
golfskálanum Ásatúni. Þar fór Bjarni
Harðarson alþingismaður með gam-
anmál, Grétar Hallur Þórisson kvað
rímur og Druslukórinn söng með sín-
um hætti. Að sögn Jónasar Egilsson-
ar umsjónarmanns Iðandi daga fór
allt vel fram.
Heimsmeistaramót
í traktorstorfæru
Morgunblaðið/Sigurður Sigmundsson
Mannamót Garðyrkjubændur buðu gestum upp á grænmeti á Iðandi dögum.
Keppni Ölvir Karl Emilsson var sigurvegari í traktorstorfærunni en hér
eru keppendur allir saman í ánni í lokaatriði keppninnar í Litlu-Laxá.
Skeiða- og Gnúpverjahreppur | Síðastliðinn sunnudag
kom allnokkur hópur fólks saman í Skaftholtsréttum,
allmargir ríðandi en þeir höfðu áður verið við guðs-
þjónustu á Stóra-Núpi.
Íslenski fáninn var dreginn að húni á fánastöng sem
ábúendur í Eystra-Geldingaholti voru að gefa til minn-
ingar um Jón Ólafsson, fyrrverandi bónda þar. Við
stöngina hefur og verið komið fyrir minningarsteini
með áletraðri plötu sem nafn Jóns er greypt í. Margrét
Eiríksdóttir ekkja Jóns flutti ávarp og afhenti gjöfina.
Ólafur sonur hjónanna í Eystra-Geldingaholti annaðist
um kaffiveitingar sem voru með myndarbrag á vegum
félagsins
Hafist var handa við að byggja upp Skaftholtsréttir
snemma í fyrravor. Þetta fallega mannvirki, sem er
hlaðið úr torfi og grjóti, var afar illa farið eftir jarð-
skjálftann mikla sem reið yfir 17. júní árið 2000. Stofn-
aður var félagsskapur sem heitir Vinir Skaftholtsrétta.
Í félaginu eru auk fjölda heimamanna burtfluttir sveit-
ungar og fleiri áhugasamir velunnarar réttanna. Mikil
sjálfboðavinna hefur verið innt af hendi við uppbygg-
inguna en allmikil vinna er þó enn eftir. Margar stofn-
anir og einstaklingar hafa lagt málefninu lið. Hleðslu-
maður við grjótvinnuna er Kristján Ingi Gunnarsson en
torfvinnuna Víglundur Kristjánsson. Að sögn Kristjáns
Guðmundssonar eins af forsvarsmönnum félagsins er
áætlaður kostnaður um 20 milljónir króna.
Það þarf vart að skrifa mörg orð um hve réttir eiga
mikið rúm í huga þess fólks sem er fætt og uppalið í
sveit eða hefur dvalið þar mörgum stundum. Margir
minnast gleðistunda úr réttum. Það þótti sjálfsagt að
byggja upp jafn sögulegt og fagurt mannvirki sem
Skaftholtsréttir eru enda um menningarverðmæti að
ræða.
Vinir Skaftholtsrétta koma saman
Uppbygging Fjölmargir vinir Skaftholtsrétta komu saman um helgina, en unnið er að endurbyggingu hennar.
Seyðisfjörður | Norskar rætur eru
framundan á Seyðisfirði. Um er að
ræða hátíð fyrir alla fjölskylduna
sem er samstarfsverkefni Tækni-
minjasafnsins og skrifstofu ferða- og
menningarmála. Hátíðinni er ætlað
að vekja íbúa bæjarins og gesti til
vitundar um arfleifðina. Á Seyðis-
firði er einstakt safn norskra húsa og
fótspor Norðmanna meitluð í sögu
staðarins. Hinn norski athafnamað-
ur Otto Wathne er gjarnan nefndur
faðir Seyðisfjarðar og er hans því
minnst með lítilli athöfn á fæðingar-
degi hans 13. ágúst.
Ratleikur um slóðir Norðmanna
verður í gangi alla dagana. Helstu
dagskrárliðir Norskra róta eru tón-
leikar ryþma- og blússveitarinnar
KK og Frakkanna, en hljómsveitina
skipa auk KK þeir Björgvin Gísla-
son, gítar, Þorleifur Guðjónsson,
bassi, Siggi Perez, sax og Sigurður
Jakobsson á trommur. Á dagskránni
er einnig leiksýningin Vifterumpe
eða Dillirófa eins og heitið útleggst á
íslensku og kemur alla leið frá Vest-
erålen í Noregi.
Tvær myndlistarsýningar verða
opnaðar laugardaginn 11. ágúst.
Fyrst ber að nefna sýningu veflista-
konunnar Marlyn Vee og svo haust-
sýningu Skaftfells, en þar koma
saman þau Erla Þórarinsdóttir,
Hulda Hákon, Jón Óskar og Stein-
grímur Eyfjörð.
Norskar rætur á Seyðisfirði
Grímsey | Þeir koma frá sex þjóðum,
Þýskalandi, Frakklandi, Ítalíu,
Tékklandi, Sviss og Finnlandi, Ver-
aldarvinirnir sem dvelja í Grímsey í
hálfan mánuð við girðingarvinnu.
Fyrsta vísi að samtökum þeirra má
rekja allt til ársins 1918. Þá var það
maður einn sem kom á fót tengingu
milli ungmenna frá Frakklandi og
Þýskalandi til að byggja upp vináttu
og samvinnu eftir erfiðleika og
hörmungar fyrri heimsstyrjaldar-
innar.
Félagið Veraldarvinir hefur starf-
að formlega frá árinu 2001 víða um
heim. Hingað til Íslands hafa komið
margir hópar og unnið ýmis þörf
verk á mismunandi stöðum, í hálfan
mánuð í senn. Markmið félagsins,
sem er eingöngu áhugamannafélag,
er að stuðla að kynningu og sam-
vinnu ungs fólks frá fjölda þjóðlanda.
Unga fólkið skilar allavega 6 klukku-
stunda vinnuframlagi dag hvern.
Veraldarvinirnir sem gista í
Grímsey hafa notað tímann vel og
skoðað eyjuna, bæði fótgangandi og
eins hafa þeir siglt hringinn í kring-
um hana. Þeir hafa fylgst með fjöl-
breyttu fuglalífinu sem er einstak-
lega blómlegt hér á heimskautsbaug
þetta sumarið og auðvitað blandað
geði og spjallað við Grímseyinga
sjálfa.
Morgunblaðið/Helga Mattína
Heimsóknir Þrettán Veraldarvinir hafa að undanförnu verið norður í Grímsey að störfum og leik.
13 Veraldarvinir girða í Grímsey